Tveir fengu út­hlut­að úr Hvata­sjóði Lands­bank­ans

Háskólanemarnir Salvador Di Marzio Láruson og Oliwia Slodowska hljóta í ár styrk úr Hvatasjóði Landsbankans til grunnnáms við Háskólann í Reykjavík skólaárið 2027-2028.

Sjóðurinn styrkir nemendur sem hafa annað móðurmál en íslensku og náð hafa góðum árangri í framhaldsskóla. Við val á styrkhöfum er tekið mið af námsárangri auk fjölbreytileika og þátttöku nemenda á öðrum sviðum, t.d. íþróttum, tómstundastarfi og sjálfboðavinnu.  Styrkurinn felur í sér niðurfellingu á skólagjöldum fyrsta árið í grunnnámi.

Samstarf Landsbankans og Háskólans í Reykjavík á vettvangi Hvatasjóðs hófst árið 2023 og eru styrkir veittir árlega. Markmið sjóðsins er að jafna aðgengi að námi við HR.

Úthlutun úr Hvatasjóðnum fór fram við hátíðlega athöfn 27. ágúst sl. í húsnæði HR þar sem Sigríður Guðmundsdóttir, mannauðsstjóri Landsbankans, afhenti styrkina ásamt dr. Bryndísi Björk Ásgeirsdóttur, sviðsforseta samfélagssviðs. Þá flutti dr. Ragnhildur Helgadóttir, rektor HR, ávarp við upphaf athafnarinnar.

Við óskum styrkþegunum, Salvador og Oliwia, til hamingju með árangurinn og góðs gengis í framtíðinni!