Lands­bank­inn til ráð­gjaf­ar við sölu Al­vo­gen

Fyrirtækjaráðgjöf Landsbankans annaðist ráðgjöf við sölu á öllu hlutafé í Alvogen ehf., lyfjaheildsölu sem starfar á íslenskum markaði. Það var Orbital ehf. sem festi kaup á félaginu.

Alvogen hóf starfsemi árið 2014 í kjölfar yfirtöku á lyfjafyrirtækinu Portfarma. Alvogen Iceland ehf., dótturfélag eignarhaldsfélagsins Aztiq ehf., er eigandi að öllu hlutafé í Alvogen. Félögin eru óháð starfsemi Alvogen Pharma í Bandaríkjunum.

Orbital er nýstofnað félag í eigu Horns V slhf., sérhæfðs sjóðs í rekstri Landsbréfa hf. og Silfurbergs ehf.

Frá yfirtöku Alvogen á Portfarma hefur félagið aukið vöruframboð sitt verulega. Félagið flytur í dag inn um 100 lyf og markaðssetur yfir 200 heilsutengdar vörur og lækningatæki. Starfsemin nær meðal annars til innflutnings, markaðssetningar og dreifingar samheitalyfja, lausasölulyfja og frumlyfja auk annarra heilsutengdra vara til helstu heilbrigðisstofnana og apóteka landsins.

Kaupin eru háð hefðbundnum fyrirvörum, m.a. samþykki Samkeppniseftirlitsins.

Fyrirtækjaráðgjöf Landsbankans og BBA//Fjeldco voru ráðgjafar seljenda við söluferlið. LOGOS veitti kaupendum lögfræðilega ráðgjöf.

Frá vinstri: Hermann M. Þórisson, framkvæmdastjóri Horns V, Friðrik Kristjánsson, eigandi og stjórnarformaður Silfurbergs, Davíð Ólafsson, stjórnarformaður Alvogen Iceland, Jens Hilmar Wessman, meðstjórnandi Alvogen Iceland.