Reykjastræti 6 fyrst til að hljóta frábæra fullnaðarvottun
Hönnun Reykjastrætis 6 hlaut BREEAM-vottun strax sumarið 2023 og nú hafa framkvæmd byggingar og frágangur lokið sömu vottun. Báðir verkþættir hlutu einkunnina frábært (e. excellent) sem er næsthæsta þrep BREEAM-vottunarkerfisins. Er bygging bankans fyrsta framkvæmdin á Íslandi til að hljóta fullnaðarvottun með þeirri einkunn samkvæmt nýjum staðli frá 2016.
Við vistvæna hönnun og vottun bygginga samkvæmt BREEAM-vottunarkerfinu er lagt mat á ýmsa þætti, s.s. umhverfis- og öryggisstjórnun á byggingar- og rekstrartíma, góða innivist sem m.a. tekur til hljóðvistar, loftgæða og lýsingar, góðrar orkunýtni og lágmörkunar á ýmis konar mengun frá byggingunni. Þetta er eitt af mjög fáum verkefnum hér á landi þar sem lagt hefur verið í þá vegferð að fá ekki einungis BREEAM-vottun heldur einnig svo háa einkunn á nýbyggingu og var unnið að því markmiði í öllu ferlinu. Mikil áhersla var lögð á að velja sterka samstarfsaðila til að ná markmiðum. EFLA sá um verkfræðihönnun, ÞG verk sá um uppsteypu hússins og Íslenskir aðalverktakar um fullnaðarfrágang. Umsjónaraðili bankans var VSB. Framkvæmdir stóðu yfir 2018-2023 og var húsið tekið í notkun árin 2022 og 2023.
Í fyrra hlaut byggingin steinsteypuverðlaun Steinsteypufélags Íslands en félagið veitir árlega verðlaun fyrir mannvirki þar sem saman fer frumleg og vönduð notkun á steinsteypu í mannvirkjagerð.
„Það er virkilega góður árangur að hafa tvöfalda BREEAM-vottun,“ segir Lilja B. Einarsdóttir, bankastjóri Landsbankans. „Við settum markið hátt og unnum með frábærum hönnuðum og verktökum að byggingu hússins, sem eiga þakkir skildar fyrir gott verk. Við ákváðum að fara þessa leið því okkur var ofarlega í huga að það yrði hagkvæmt að byggja og reka húsið til framtíðar. Svo náðum við mikilvægasta markmiðinu sem var að skapa gott umhverfi fyrir starfsfólk þannig að við getum sett alla okkar orku í að veita viðskiptavinum frábæra þjónustu. Húsið hefur reynst okkur virkilega vel og við erum stolt af því hvernig til tókst og hversu vel við höfum nýtt húsið, bæði fyrir starfsemina og ýmsa viðburði.“
