Fréttir
Ný útgáfa af almennum viðskiptaskilmálum Landsbankans
Við vekjum athygli á breytingum á almennum viðskiptaskilmálum bankans. Almennir viðskiptaskilmálar gilda í viðskiptum milli bankans og viðskiptavina, hvort sem um er að ræða einstaklinga eða fyrirtæki. Auk skilmálanna gilda, eftir atvikum, ákvæði samninga, sérstakra skilmála og reglna um einstakar vörur eða þjónustu.
30. september 2021 - Landsbankinn
Nýju skilmálarnir gilda frá og með 1. október 2021 gagnvart nýjum viðskiptavinum. Gagnvart núverandi viðskiptavinum gilda eldri skilmálar til 30. nóvember 2021 en nýju skilmálarnir frá og með 1. desember 2021.
Almennir viðskiptaskilmálar Landsbankans (ný útgáfa)
Helstu efnisbreytingar á almennu viðskiptaskilmálunum eru eftirfarandi:
- Ákvæði um vinnslu persónuupplýsinga eru uppfærð (grein 2.1).
- Sett er nýtt ákvæði um hljóðritun símtala og varðveislu rafrænna samskipta (grein 2.1).
- Tekið er inn ákvæði um að bankinn geti fellt einhliða úr gildi umboð ef hann telur að hætta sé á misferli, svikum, peningaþvætti eða sambærilegu, og að umboð falli sjálfkrafa niður við andlát, niðurfellingu forsjár eða sviptingu fjárræðis viðskiptavinar eða umboðsmanns (grein 2.7).
- Veitt er útskýring á því hvað felst í sannvottun (aðferð við auðkenningu) og persónubundnum öryggisskilríkjum (t.d. PIN), sbr. ný lög um greiðsluþjónustu nr. 114/2021 (grein 3.1).
- Einskiptis auðkenningarnúmeri/kóða er bætt við sem dæmi um persónubundin öryggisskilríki (grein 3.1).
- Sett eru ný ákvæði um varúðarskyldu og ábyrgð viðskiptavinar gagnvart fölskum skilaboðum, auk leiðbeininga þar að lútandi (greinar 2.9, 3.1 og 5.4).
- Ákvæði um netbanka fyrirtækja eru uppfærð (grein 3.2).
- Veitt er útskýring á því að bankinn notar mismunandi heiti yfir greiðslureikninga og að það fari eftir eðli hvers reiknings hvort um sé að ræða greiðslureikning í skilningi laga um greiðsluþjónustu (grein 4.1).
- Ákvæði um greiðsluþjónustu eru uppfærð til samræmis við ný lög um greiðsluþjónustu (grein 4.3).
- Tímasetningar fyrir viðtöku og framkvæmd greiðslufyrirmæla eru uppfærðar til samræmis við framkvæmd (m.a. millibankakerfi Seðlabanka Íslands og SEPA) og lög um greiðsluþjónustu (grein 4.3).
- Tekið er fram að ef notandi greiðsluþjónustu bankans er ekki neytandi skuli tiltekin ákvæði nýrra laga um greiðsluþjónustu ekki gilda um þjónustuna (grein 4.3).
- Ákvæði um vaxtabreytingar á innlánsreikningum er fært til samræmis við ný lög um greiðsluþjónustu (grein 4.6).
- Ákvæði um greiðslukort eru færð til samræmis við ný lög um greiðsluþjónustu (kafli 5).
- Tekið er fram til skýringar að um greiðslukort gildi jafnframt alþjóðlegir skilmálar viðkomandi kortafyrirtækja (t.d. VISA eða MasterCard) sem birtir eru á vefsvæði þeirra (grein 5.1).
- Settur er sérstakur kafli (6. kafli) um ábyrgð vegna greiðsluþjónustu til samræmis við ný lög um greiðsluþjónustu.
- Tekið er inn ákvæði um að bankinn geti lokað reikningi og öðrum þjónustuþáttum eða slitið viðskiptasambandi m.a. á þeim grundvelli að viðskiptasambandið samrýmist ekki áhættustefnu bankans (greinar 4.9 og 7).
Ákvæði skilmálanna sem falla undir gildissvið laga um greiðsluþjónustu mynda rammasamning um greiðsluþjónustu milli viðskiptavinar og bankans í skilningi laga um greiðsluþjónustu. Núverandi viðskiptavinir hafa rétt á að tilkynna bankanum um uppsögn rammasamnings um greiðsluþjónustu fyrir 1. desember 2021 ef þeir vilja ekki samþykkja breytingarnar sem gerðar eru með nýju útgáfunni. Núverandi viðskiptavinur telst hafa samþykkt breytingarnar tilkynni hann bankanum ekki um annað fyrir 1. desember 2021.
Þú gætir einnig haft áhuga á
22. sept. 2023
Í dag er síðasti dagurinn sem dyr útibús Landsbankans við Austurstræti 11 standa opnar og lokar húsið klukkan 16.00.
21. sept. 2023
Amaroq Minerals, með auðkennið „AMRQ“, hefur nú verið skráð á Aðalmarkað Nasdaq Iceland. Auk skráningar á Aðalmarkað Nasdaq Iceland eru hlutabréf Amaroq skráð á markað í Kanada (TSX-V) og London (AIM). Samhliða flutningnum yfir á Aðalmarkað Nasdaq Iceland hefur félagið verið afskráð af First North Iceland. Amaroq Minerals er fyrsta skráða félag sinnar tegundar á Íslandi. Félagið leggur megináherslu á leit að gulli og öðrum verðmætum málmum og hefur víðtækar rannsóknar- og vinnsluheimildir á Grænlandi, þar sem finna má gull, kopar, nikkel og aðra málma sem eru nauðsynlegir fyrir orkuskipti framtíðarinnar. Fyrirtækjaráðgjöf Landsbankans hafði umsjón með skráningarferlinu og óskum við starfsfólki og hluthöfum Amaroq til hamingju með skráninguna.
21. sept. 2023
Viðskiptavinir geta nálgast danska peningaseðla í útibúum og hraðbönkum Landsbankans um allt land. Við viljum benda viðskiptavinum á að við höfum nú hætt móttöku á 1.000 kr. og 500 kr. dönskum peningaseðlum, sem og móttöku á öllum færeyskum peningaseðlum. Engar breytingar eru á viðskiptum með 200 kr., 100 kr. og 50 kr. danska peningaseðla. Viðskipti með reiðufé fylgja kröfum laga um aðgerðir gegn peningaþvætti og fjármögnun hryðjuverka. Með hertum reglum í Danmörku hefur móttaka reiðufjár frá erlendum bönkum verið takmörkuð og því getur bankinn ekki lengur átt viðskipti með 500 kr. og 1000 kr. danska peningaseðla.
14. sept. 2023
Við vekjum athygli á að RSA SecurID appið sem notað er fyrir öruggar innskráningar og greiðslur í netbanka fyrirtækja er að breytast.
13. sept. 2023
Við opnum í dag útibú í nýja húsnæðinu okkar í Reykjastræti 6. Þar er hægt að fá þjónustu hjá gjaldkera frá kl. 10-16 og hraðbankar og önnur sjálfsafgreiðslutæki eru aðgengileg allan sólarhringinn.
12. sept. 2023
Sunna Ósk Friðbertsdóttir hefur verið ráðin regluvörður Landsbankans og hefur hún tekið til starfa. Sunna lauk BA-gráðu í lögfræði frá Háskólanum í Reykjavík árið 2008 og ML-gráðu frá sama skóla árið 2010. Hún hefur lokið prófi í verðbréfaviðskiptum og er með málflutningsréttindi fyrir héraðsdómi. Sunna hóf störf sem lögfræðingur hjá Landsbankanum árið 2010 og hefur sinnt fjölbreyttum verkefnum, bæði varðandi innleiðingu löggjafar og daglega starfsemi bankans. Hún hefur starfað við regluvörslu hjá bankanum frá árinu 2017 og var staðgengill regluvarðar frá árinu 2022. Regluvarsla hefur umsjón og eftirlit með því að Landsbankinn starfi í samræmi við innra og ytra regluverk og sinnir fræðslu og ráðgjöf um kröfur laga og reglna sem hafa áhrif á starfsemi bankans.
1. sept. 2023
Ostrzegamy przed oszustwami na stronach internetowych pojawiających się w imieniu Auðkenni, które rzekomo m.in. proponują połączenie z Landsbankinn.
31. ágúst 2023
Í kjölfar nýlegrar vaxtaákvörðunar Seðlabanka Íslands verða gerðar breytingar á vöxtum Landsbankans. Vaxtabreytingarnar taka jafnframt mið af vöxtum á markaði og öðrum fjármögnunarkjörum Landsbankans.
31. ágúst 2023
Sjálfbærnidagur Landsbankans verður haldinn, fimmtudaginn 7. september kl. 9.00 - 11.30 í Grósku, Bjargargötu 1.
31. ágúst 2023
Við vörum við svikasíðu sem birt er í nafni Auðkennis og lítur út fyrir að bjóða meðal annars upp á tengingu við Landsbankann.