Fjölbreyttur HönnunarMars 2025 í Landsbankanum
Landsbankinn er einn af aðalstyrktaraðilum HönnunarMars og tekur þátt í hátíðinni með virkum hætti. Haldnir verða spennandi viðburðir í bankanum í Reykjastræti og við höfum gert myndbönd um sjö hönnuði sem birtast á Youtube-rás bankans.
HönnunarMars er eitt helsta kynningarverkefni íslenskrar hönnunar og arkitektúrs. Landsbankinn hefur verið aðalstyrktaraðili hátíðarinnar frá 2023 og leggur henni lið með ýmsum hætti.
Fjárfestum í hönnun
Föstudaginn 4. apríl verður boðið upp á örerindi og pallborðsumræður um fjármagn og hönnun í Landsbankanum við Reykjastræti 6. Með viðburðinum viljum við skapa vettvang til að fjalla um tækifærin sem felast í að fjárfesta í hönnun og mikilvægi þess. Reynslumikið fólk úr heimi hönnunar og fjárfestinga deilir sinni sýn, svarar spurningum og tekur þátt í umræðu um þetta mikilvæga viðfangsefni. Athugið að viðburðurinn fer fram á ensku.
Meðal þeirra sem koma fram eru:
- Komal Singh, hönnunarsérfræðingur lita og efna hjá Polestar
- Paul Madsen, forstjóri Normann Copenhagen
- Kristín Eva Ólafsdóttir, forstjóri Gagarin interactive
- Dario Nuñez Salazar, lýsingarhönnuður MA., IALD hjá Hildiberg
- Eyjólfur Pálsson, stofnandi og eigandi Epal
- Salóme Guðmundsdóttir, stjórnarkona HönnunarMars
Karítas Diðriksdóttir stýrir umræðunum.
Tímasetning: Föstudagurinn 4. apríl frá kl. 15.30-17.00.
Uppsprettan - Fatahönnuðir framtíðarinnar
Vel valdar flíkur frá áhugaverðum hönnuðum verða á sýningunni Fatahönnuðir framtíðarinnar í Landsbankanum við Reykjastræti 6. Gestum gefst tækifæri til að skoða flíkurnar, fá innsýn í hönnun og handverk og sjá hvert fatahönnuðir framtíðarinnar stefna. Sýningin opnar 31. mars og verður opin gestum og gangandi frá kl. 8.00-17.00 (opnunartími bankans) til 4. apríl. Gengið er inn um aðalinngang bankans við Reykjastræti.
Þátttakendur:
- Andrea Margrétardóttir
- Kári Eyvindur
- Michal Pajak Pajonik
- Sigríður Ágústa Finnbogadóttir
- Sóley Jóhannsdóttir
- Thelma Gunnarsdóttir
Uppsprettan vaknar svo til lífsins föstudaginn 4. apríl kl. 20.00.
Á föstudagskvöldið vaknar sýningin til lífsins í lifandi gjörningi, sýningu með fyrirsætum og tónlistaratriði frá Thomasi Stankiewicz. Um er að ræða samtal tísku, arkitektúrs, tónlistar og viðskipta í viðburði þar sem framúrstefnulegum hugmyndum og fatahönnun er fagnað.
Listrænn stjórnandi og framleiðandi: Anna Clausen
Tímasetning: Föstudagurinn 4. apríl frá kl. 20.00-21.30.
Aðrar sýningar í Reykjastræti 6
Að auki verða sex sýningar í þjónustu- og verslunarrými á horni Geirsgötu og Reykjastrætis 6, sem Landsbankinn leggur til. Sýningarnar verða opnar frá fimmtudeginum 3. apríl til sunnudagsins 6. apríl.
1+1+1 + Hugdetta +
1+1+1 er tilraunakennd hönnun þriggja hönnunarhúsa: Hugdettu frá Íslandi, Petru Lilju frá Svíþjóð og Aalto+Aalto frá Finnlandi. Saman skoða þau og endurhugsa hluti með þeirri aðferð að hver vinnustofa hannar hlut sem samanstendur af þremur aðskildum pörtum sem síðar púslast saman við hönnun hinna landanna. Hönnunin verður ófyrirsjáanleg og óvanaleg þar sem útkoman kemur bæði hönnuðunum og áhorfandanum á óvart.
Söltuð píka
SÖLTUÐ PÍKA er sýning sem varpar ljósi á upplifun kvenna og kvára í grafískri hönnun á Íslandi í gegnum þrjú tímaskeið: fortíð, nútíð og framtíð. Sýningin sameinar sögulegar frásagnir, samtímarýni og bjartsýna framtíðarsýn á stöðu og reynslu kvenna og kvára í faginu.
Synþenkja vol II
Ímyndaðu þér heim þar sem skynjanir skarast, hljóð fær lykt, lykt er hreyfing, hreyfing verður teikning. Venjulega gerum við ráð fyrir að sjá liti með augunum, finna lykt með nefinu og heyra tónlist með eyrunum - mörkin þarna á milli eru yfirleitt talin skýr. Þegar þessi mörk eru rofin er talað um samskynjun eða synesthesia á ensku.
Hæ/Hi: Designing Friendship
Hæ/Hi: Designing Friendship er samstarfsverkefni hönnuða frá Íslandi og Seattle sem kannar siði gestgjafa, leikræn tilþrif við matseld og félagslegan þátt eldhússins í fjórðu sýningu sinni, Hæ/Hi: Volume IV | Eldhúspartý.
Skrúði
Samstarf Stúdíó Fléttu og Icelandair heldur áfram. Eldri einkennisfatnaður fær nýtt og umvefjandi hlutverk. Í ár verður farin ný leið – efnin sniðin niður og þeim gjörbreytt. Úr verða púðar þræddir með áhugaverðri sögu sem fegra rýmið og gleðja augað.
30 ár af hönnun
30 ár af hönnun er sýning sem haldin er í tilefni af 30 ára afmæli Félags vöru- og iðnhönnuða. Boðið verður upp á brot af því besta sem íslenskir hönnuðir hafa skapað í gegnum tíðina. Þetta er ekki tæmandi yfirlit yfir hönnunarsöguna, heldur lifandi innsýn í hugmyndaflug, sköpunargleði og fjölbreytileika hönnunar á Íslandi.
