Ein­stök liðs­heild kvenna­lands­liðs­ins

Fyrrverandi landsliðskonan og EM-farinn Edda Garðarsdóttir skrifar hér grein um hvað það er sem skapar góða liðsheild – og hvernig sú liðsheild sem ríkir innan kvennalandsliðsins er höfuðástæða fyrir árangri liðsins í gegnum árin.
Edda Garðarsdóttir
8. júlí 2022

Fátt hefur glætt daga mína meiri gleði í gegnum tíðina en að fá að vera partur af alls kyns hópum, stórum sem smáum. Ég leyfi mér að fullyrða að það, að tilheyra hóp, er eitthvað sem við sækjum öll í, hvort sem við gerum það meðvitað eða ekki. Þeir hópar sem mest gefandi er að tilheyra eru ekki endilega hóparnir sem ná besta árangrinum, heldur þeir hópar þar sem sterk tenging myndast á milli einstaklinga. Eitt sterkasta dæmi um þetta sem ég hef upplifað var með landsliðinu í fótbolta.

Saga íslenska kvennalandsliðsins í knattspyrnu er saga einstakrar liðsheildar, og er árangur liðsins bein afleiðing hennar. Menningin sem hefur fengið að blómstra innan íslenskrar kvennaknattspyrnu, bæði í yngri flokkum og upp í sterkustu deildirnar, einkennist af sterkum einstaklingum og leiðtogum, virðingu, trausti, stórum draumum og sameiginlegum markmiðum – öllu því sem síðan leggur grunninn að sterkri liðsheild innan landsliðsins. Þessi gildi hafa styrkst enn meir með tímanum, þar sem bæst hafa við hvetjandi fyrirmyndir og stuðningur frá samfélaginu, sem fer vaxandi með hverju stórmótinu.

Hvað gerir góða liðsheild?

Einstaklingar með ólíka styrkleika gefa heildinni breidd, og samspil þeirra gerir summuna stærri en hvern lið fyrir sig. Út á við virðist fyrirliðinn draga vagninn en liðið með öflugustu liðsheildina hefur marga ólíka leiðtoga. Einn léttir andann í klefanum, annar dregur vagninn þegar erfiðleikar banka upp á, þriðji passar upp á að enginn gleymist, sá fjórði er traust vinkona þegar eitthvað bjátar á. Þetta er ekki tæmandi listi og sum geta tekið að sér fleiri en eitt hlutverk á listanum. Það er þarna sem fyrirmyndir verða til; þegar ólíkir en eftirsóknarverðir eiginleikar sterkra einstaklinga koma í ljós og fylla fólkið í kringum þá af eldmóði og vilja til að verða betri. Þegar við fáum öll að upplifa sameiginlega ábyrgð á liðsheildinni myndast traust okkar á milli. Þá fyrst getum við farið raunverulega að trúa á sameiginlegt markmið liðsins. Þá getum við leyft okkur að dreyma stóra drauma – og þá kemst smáþjóð á stórmót.

Stelpurnar okkar

Lokakeppni EM í fótbolta er að hefjast. Íslenska liðið samanstendur af 23 gífurlega sterkum leikmönnum, öflugu þjálfarateymi, sjúkrateymi, liðsstjórn og öðru starfsfólki knattspyrnusambandsins. Öll íslenska þjóðin mun fylgjast með gengi landsliðsins nær og fjær. Heitasta stuðningssveit íslenska landsliðsins flýgur til Englands í byrjun júlí með vonir um velgengni og fallegan fótbolta í farteskinu. Við vitum eitt fyrir víst, við stöndum með ykkur, hvernig sem viðrar.

Kæru landsliðskonur á EM 2022!

Þegar þið gangið út á völlinn, hvort sem þið eruð í byrjunarliðinu eða ekki, leyfið okkur öllum að sjá og finna að þið eruð sterkasta liðsheild sem hefur nokkurn tíma farið á EM fyrir Íslands hönd. Ég vil sjá einbeitingu, ég vil sjá allar njóta sín, ég vil sjá samvinnu, ég vil finna traustið á milli ykkar í beinunum og ég vil sjá ólíka leiðtoga innan liðsins passa að allar haldi sér við efnið. Þið vitið að þið hafið burði til þess að setja stefnuna hátt. Aldrei hætta.

Edda er fyrrverandi landsliðskona í knattspyrnu og hópstjóri á Upplýsingatæknisviði Landsbankans.

Þú gætir einnig haft áhuga á
6. júlí 2022

Hvernig kvennalandsliðið í fótbolta varð að þjóðargersemi

Sagnfræðingurinn og fótboltaáhugamaðurinn Stefán Pálsson lítur á sögu kvennaknattspyrnu á Íslandi, með stöðu knattspyrnu í Evrópu hverju sinni til hliðsjónar.
15. júní 2022

Hvað á að borga fyrir barnapössun?

Stundum þurfa foreldrar að skreppa eða geta ekki sótt börn á réttum tíma vegna vinnu eða náms. Sumarnámskeið eru líka yfirleitt styttri en vinnudagur. Því þarf stundum að redda pössun. En hvað á að borga á tímann fyrir barnapössun?
10. júní 2022

Hafðu bankann í vasanum í sumarfríinu

Þú getur nýtt þér nánast alla þjónustu bankans í símanum og tölvunni. Í þessari grein er fjallað um nokkrar algengustu aðgerðirnar í appinu og netbankanum sem geta komið sér vel í sumarfríinu.
Evrópsk verslunargata
11. apríl 2022

Góð ráð um kortanotkun og greiðslur í útlöndum

Við mælum með að fólk greiði með snertilausum hætti þegar það er á ferðalagi erlendis, annað hvort með Apple Pay, kortaappinu eða með því að nota snertilausa virkni kreditkorta. Það er samt enn nauðsynlegt að taka kortin sjálf með í ferðalagið.
Vefkökur

Með því að smella á “Leyfa allar” samþykkir þú notkun á vefkökum til þess að auka virkni vefsins, greina vefnotkun og aðstoða við markaðssetningu.

Nánar um vefkökur