Mundu eft­ir netör­ygg­inu - líka þeg­ar þú ert í fríi

Veikasti hlekkurinn í vörnum gegn netsvikum erum við sjálf. Við viljum þess vegna vekja athygli á nokkrum góðum ráð um varnir gegn netsvikum.

Góð ráð gegn netsvikum

• Farðu mjög varlega þegar þú færð tölvupóst, SMS eða skilaboð á samfélagsmiðlum sem innihalda hlekki. Ef þú áttir ekki von á skilaboðum frá viðkomandi aðila skaltu fara sérstaklega varlega.
• Ekki samþykkja innskráningu með rafrænum skilríkjum nema þú sért í raun og veru að nota þau til að skrá þig inn.
• Passaðu þig á fölskum leikjum á samfélagsmiðlum, s.s. á Facebook. Ef þú tekur þátt máttu búast við að fá skilaboð (t.d. á Messenger) um að þú hafir unnið og síðan er óskað eftir kortaupplýsingum til að hægt sé að leggja „vinninginn“ inn á kortið. Svikararnir geta þá notað upplýsingarnar til að taka út af kortinu þínu.
• Algengt er að sendir séu falskir tölvupóstar eða SMS sem líta út fyrir að koma frá t.d. bönkum, flutningsfyrirtækjum eða streymisveitum á borð við Netflix eða Disney+. Ef smellt er á hlekkinn opnast fölsk síða þar sem reynt er að fá fólk til að gefa upp korta- eða bankaupplýsingar.
• Passaðu þig á tilboðum um ýmis konar „fjárfestingartækifæri“ þar sem lofað er skjótum og öruggum gróða.
• Aldrei leyfa ókunnugum að taka yfir tölvuna þína með forritum á borð við AnyDesk. Það er þekkt aðferð hjá svikurum.
• Passaðu vel upp á notandanafnið og lykilorðið þitt fyrir netbankann og appið - aldrei deila þeim með öðrum. Þú skalt ekki heldur hleypa öðrum inn í netbankann þinn.
• Lestu SMS með staðfestingu á Visa-greiðslum vel. Þegar þú notar Visa-kortið hjá vefverslunum sem eru með merkið „Verified by Visa“ færð þú sent SMS með einnota lykilorði (e. secure code). Þar koma líka fram upplýsingar um upphæð greiðslunnar, gjaldmiðil og nafn söluaðila. Eru allar þessar upplýsingar örugglega réttar?

Hvað á ég að gera ef ég verð þolandi svika?

• Hafðu samband við okkur sem fyrst í síma 410 4000, með tölvupósti á landsbankinn@landsbankinn.is eða á netspjalli.
• Ef kortinu eða kortanúmerinu þínu er stolið getur þú fryst það strax í Landsbankaappinu.
• Utan afgreiðslutíma banka getur þú hringt í 525 2000, neyðarnúmer Valitors sem er útgefandi Visa-korta.

Greinin var fyrst birt 21. júní 2021 og uppfærð 8. júlí 2022.