Mannauðsstefna
Mannauðurinn er lykillinn að traustum banka
Okkur er umhugað um velferð og vellíðan starfsfólks og leggjum áherslu á gagnkvæmt traust og sveigjanleika þar sem þarfir einkalífs og vinnu fara saman.
Mannauðsstefnan
Landsbankinn er eftirsóttur vinnustaður. Við leggjum áherslu á að skapa skemmtilegan vinnustað þar sem heilbrigð liðsheild þrífst við jákvæða og árangursdrifna menningu. Okkur er umhugað um velferð og vellíðan starfsfólks og leggjum áherslu á gagnkvæmt traust og sveigjanleika þar sem þarfir einkalífs og vinnu fara saman. Þekking, metnaður og kraftur starfsfólks er lykillinn að traustum banka fyrir farsæla framtíð.
Menning
Við berum sameiginlega ábyrgð á árangri og starfsánægju á vinnustaðnum. Vinnustaðamenning okkar er í stöðugri þróun og starfsfólk er meðvitað um ábyrgð á eigin þekkingu og vexti. Við leggjum ríka áherslu á fagleg vinnubrögð og að nýtt starfsfólk fái góðar móttökur, nauðsynlegar upplýsingar og góðan aðbúnað til að sinna starfi sínu vel.
Umhverfi
Okkur er umhugað um að starfsemin sé árangursrík og skilvirk og leggjum því áherslu á gagnkvæman sveigjanleika þar sem þarfir einkalífs og starfs fara saman. Aðbúnaður og aðstaða eru eins og best verður á kosið og snjallar lausnir gera starfsfólki kleift að nýta sér ólíkar starfsstöðvar. Jafnlaunaviðmið og markviss stuðningur við starfsfólk stuðla að sanngjörnum starfskjörum.
Velferð
Til að starfsfólk geti sinnt starfi sínu vel og veitt viðskiptavinum bankans bestu þjónustu sem völ er á þarf starfsumhverfið að vera hvetjandi og inngildandi. Við viljum skapa vinnustað sem byggir á fjölbreytni og jafnrétti, þar sem allt starfsfólk nýtur virðingar og hefur jafnan aðgang að tækifærum. Öflug, samhent og traust liðsheild sem byggir á frumkvæði og lausnamiðuðu hugarfari finnur leið til að gera betur og leysa áskoranir í sameiningu.
Jafnréttisáætlun
Landsbankinn greiðir konum, körlum og fólki með hlutlausa skráningu kyns jöfn laun og sömu kjör fyrir jafn verðmæt störf. Stefnt er að því að hlutfall kynja meðal starfsfólks endurspegli samfélagið og að ákveðin störf teljist ekki kynbundin.