Mesta breytingin varð í tengslum við flutninga úr Kvosinni yfir í nýtt húsnæði Landsbankans við Reykjastræti 6 í Reykjavík en þeim lauk í september 2023. Starfsemi bankans í Kvosinni fór áður fram í 12 húsum, en þar af hafði bankinn átta hús á leigu. Einnig flutti bankinn úr tveimur húsum í Borgartúni. Sparnaður bankans vegna flutninganna er áætlaður um 600 milljónir króna á ári.

Undanfarin ár hefur bankinn einnig flutt úr gömlu Landsbankahúsunum á Akureyri og Ísafirði í minna og hentugra húsnæði. Á Selfossi hefur bankinn selt Landsbankahúsið og er útibúið aðeins með starfsemi í hluta þess.

Húsið er hagkvæmt og skipulag þess sveigjanlegt. Vinnuumhverfið er skapandi og örvandi, vel uppbyggt og hvetur til samstarfs og góðra samskipta. Hröð tækniþróun og örar breytingar á fjármálamarkaði krefjast nýrra vinnubragða og mun nánari samvinnu og sveigjanleika innan bankans. Vinnuumhverfið er verkefnamiðað og vel er hugað að aðstöðu fyrir starfsfólk.

Nýja húsið er í heild um 21.500 fermetrar að stærð, að tæknirýmum og bílakjallara sem nýtist öllu svæðinu meðtöldum. Skrifstofu- og þjónustuhúsnæði er um 16.500 fermetrar og af þeim nýtir bankinn um 10.000 fermetra í Suðurhúsi. Íslenska ríkið festi árið 2022 kaup á Norðurhúsinu, sem er um 5.900 fermetrar að stærð, en þar er starfsemi utanríkisráðuneytis og menningar-, nýsköpunar- og háskólaráðuneytis.

Fyrir framan austurhliðina eru tjarnir sem skapa samfellu með tengingu við tjarnirnar fyrir framan Hörpu. Næst Hörpu eru tröppur þar sem gott er að tilla sér og njóta útsýnisins yfir höfnina og sundin. Tröppurnar skapa skilyrði til útivistar og fyrir ýmiskonar viðburðahald.

Innblástur verkefnisins er fjölbreytileiki íslensks klettalandslags með sínum gjótum og gjám, láréttum lögum og lóðréttu stuðlabergi. Að utan er húsið klætt með blágrýti úr Hrepphólanámu í Hrunamannahreppi og að innan endurspeglar stölluð sjónsteypan íslenskt klettalandslag með því að líkja eftir berglögum í íslenskri náttúru.

Steinsteypufélagið veitir árlega verðlaun fyrir mannvirki þar sem saman fer frumleg og vönduð notkun á steinsteypu í manngerðu umhverfi. Verðlaunin eru veitt mannvirkinu sjálfu og öllum þeim sem komu að hönnun og framkvæmd.

Hönnuðir hússins eru C. F. Møller og Arkþing Nordic og var verkfræðihönnun í höndum EFLU verkfræðistofu. ÞG verk sá um uppsteypu hússins og Íslenskir aðalverktakar um fullnaðarfrágang. Umsjónaraðili verkkaupa var VSB.

BREEAM-staðallinn snýr m.a. að umhverfisstjórnun á byggingar- og rekstrartíma, góðri orkunýtingu og vatnssparnaði, vali á umhverfisvænum byggingarefnum og lágmörkun ýmiskonar mengunar frá byggingunni. 

Hönnun nýja hússins hlaut í júní 2023 einkunnina „frábær“ (e. excellent) samkvæmt BREEAM. Lokavottun mun fara fram þegar byggingu og frágangi verður að fullu lokið.

Nýja húsið er í heild sinni um 21.500 fermetrar að stærð, að tæknirýmum og bílakjallara sem nýtist öllu svæðinu, meðtöldum. Skrifstofu- og þjónustuhúsnæði er um 16.500 fermetrar og af þeim mun bankinn nýta um 10.000 fermetra í Suðurhúsi (sjá mynd) en selja eða leigja frá sér um 600 fermetra á 1. hæð. Íslenska ríkið festi árið 2022 kaup á Norðurhúsinu sem er um 5.900 fermetrar að stærð en þar verður starfsemi utanríkisráðuneytis og háskóla- iðnaðar- og nýsköpunarráðuneytis. Sparnaður bankans vegna flutninganna er áætlaður um 600 milljónir króna á ári.

Hönnuðir hússins eru C. F. Møller og Arkþing Nordic og er verkfræðihönnun í höndum EFLU verkfræðistofu. Innblástur verkefnisins er fjölbreytileiki íslensks klettalandslags með sínum gjótum og gjám, láréttum lögum og lóðréttu stuðlabergi. Klæðning hússins er úr íslensku blágrýti.