Aðalfundur Landsbankans, sem haldinn var 19. apríl 2024, samþykkti að greiða 16.535 milljónir króna í arð til hluthafa.
Arðgreiðslan samsvarar um 50% af hagnaði ársins 2023. Greiðslan er tvískipt og er fyrri gjalddagi hinn 24. apríl 2024 en sá seinni 16. október 2024. Heildararðgreiðslur bankans á árabilinu 2013-2024 nema þar með 191,7 milljörðum króna.
Á fundinum, sem haldinn var í Reykjastræti 6, flutti Helga Björk Eiríksdóttir, formaður bankaráðs, skýrslu stjórnar fyrir árið 2023. Lilja Björk Einarsdóttir, bankastjóri, fjallaði um rekstur, stefnu og starfsemi bankans á liðnu starfsári.
Ársreikningur fyrir liðið starfsár var samþykktur, sem og tillögur um starfskjarastefnu og um kjör bankaráðsmanna. Fundurinn kaus ríkisendurskoðanda sem endurskoðanda félagsins fyrir rekstrarárið 2024. Í samræmi við heimildir ríkisendurskoðanda til að útvista verkefnum sínum hefur hann tilnefnt í framhaldi af útboði um verkefnið endurskoðunarfyrirtækið PricewaterhouseCoopers ehf. til að annast endurskoðun ársreikninga félagsins fyrir rekstrarárið 2024.
Eftirtaldir einstaklingar voru kjörnir aðal- og varamenn í bankaráð Landsbankans fram til næsta aðalfundar:
Aðalmenn:
- Jón Þorvarður Sigurgeirsson (formaður)
- Eva Halldórsdóttir
- Kristján Þ. Davíðsson
- Rebekka Jóelsdóttir
- Steinunn Þorsteinsdóttir
- Þór Hauksson
- Örn Guðmundsson
Varamenn:
- Sigurður Jón Björnsson
- Stefanía G. Halldórsdóttir
