Alþjóðlega lánshæfismatsfyrirtækið Moody’s Ratings veitti Landsbankanum í dag lánshæfismat sem útgefanda og vörsluaðila innlána og er matið A2/P-1 með stöðugum horfum.
Lánshæfismatið endurspeglar sterkt lánstraust bankans sem byggist á grunnmati lánshæfis (e. baseline credit assessment, BCA) og væntingum um afar lítið tap að gefnum vanefndum (e. extremely low loss given failure) sem leiðir til þriggja þrepa hækkunar í mati Moody’s á tapsáhættu (e. loss given failure, LGF).
Lilja Björk Einarsdóttir, bankastjóri Landsbankans, segir:
„Við erum mjög ánægð með þann árangur sem náðst hefur í Landsbankanum og að hann skili sér í sterku lánshæfi frá Moody’s Ratings. Sérstaklega er ánægjulegt að Landsbankinn sé metinn fremstur íslenskra banka þegar kemur að fjárhagslegum styrk. Rekstur bankans er traustur og stöðugur, fjárhagsstaðan sterk og við höfum á sama tíma haldið áfram að þróa þjónustuna og styrkja tengslin við viðskiptavini.
Undanfarin ár höfum við unnið markvisst að því að auka fjölbreytni og hagkvæmni í fjármagnsskipan bankans og sú vinna er nú að skila sér. Lánshæfismatið A2 styrkir stöðu Landsbankans á fjármagnsmörkuðum og opnar aðgang að stærri hópi fjárfesta. Til lengri tíma skapar það tækifæri til hagstæðari fjármögnunar og eflir getu okkar til að bjóða viðskiptavinum góð og samkeppnishæf kjör.“
