Landsbankinn uppfærir sjálfbæra fjármálaumgjörð sína
Umgjörðin er vottuð af alþjóðlega matsfyrirtækinu Sustainalytics sem er leiðandi á þessu sviði. Hún skilgreinir með skýrum hætti hvaða verkefni stuðla að sjálfbærni og tryggir gagnsæi. Bankinn hefur nú þegar gefið út græn skuldabréf fyrir samtals 900 milljónir evra undir sjálfbærniumgjörð sinni.
Lilja Björk Einarsdóttir, bankastjóri Landsbankans, segir:
„Það er okkur mikilvægt að vera leiðandi í sjálfbærni. Grænar skuldabréfaútgáfur bankans undir umgjörðinni voru mjög vel heppnaðar og við finnum að markaðurinn gerir kröfu um skýrar, traustar og staðlaðar upplýsingar um sjálfbærni. Með þessari uppfærslu uppfyllum við ströng skilyrði sem gilda um sjálfbærniupplýsingar en traust fjármálaumgjörð er mikilvæg fyrir fjármögnun bankans.“
Nánar um uppfærslu fjármálaumgjarðarinnar
Uppfærslan er í samræmi við kröfur Green Bond Principles, Social Bond Principles og Sustainability Bond Guidelines. Auk þess voru flokkar umgjarðarinnar bornir saman við kröfur flokkunarreglugerðar Evrópusambandsins (e. EU Taxonomy). Það er niðurstaða alþjóðlega matsfyrirtækisins Sustainalytics að af verkefnum sem eru hæf undir umgjörðinni séu 59 flokkar skilgreindir í flokkunarreglugerðinni, þar af séu 46 flokkar hæfir (e. aligned), 6 flokkar hæfir að hluta (e. partially aligned) og 7 flokkar sem uppfylli ekki flokkunarreglugerðina. Önnur breyting er sú að uppfærslan tekur líka tillit til íbúðalána sem uppfylla kröfur um orkunotkun samkvæmt aðferðafræði sem er birt samhliða umgjörðinni á ytri vef bankans.
Í forystu í sjálfbærni
Landsbankinn hefur fengið framúrskarandi umsagnir í UFS-áhættumati undanfarin fimm ár frá matsfyrirtækjunum Sustainalytics og Reitun. Nýjasta UFS-áhættumat Sustainalytics mat bankann í hverfandi áhættu á að verða fyrir fjárhagslegum áhrifum tengdum UFS-þáttum. Bankinn fékk 8,5 í einkunn og er í efsta 1% af svæðisbundnum bönkum í Evrópu sem Sustainalytics metur. Í nýjasta UFS-mati Reitunar fékk bankinn framúrskarandi einkunn og er í flokki A3.
Bankinn gefur árlega út ítarlegar sjálfbærniupplýsingar um stöðu málaflokksins og má þar helst nefna GRI-skýrslu, PCAF-skýrslu um fjármagnaða losun og PRB-skýrslu um ábyrga bankaþjónustu. Bankinn hefur sett sér sjálfbærnistefnu sem er uppfærð reglulega og skýr sjálfbærnimarkmið. Auk þess vinnum við markvisst að fjórum heimsmarkmiðum Sameinuðu þjóðanna (SÞ) um sjálfbæra þróun, erum aðilar að hnattrænu samkomulagi SÞ (e. UN Global Compact) sem og viðmiðum SÞ um ábyrga bankastarfsemi (PRB). Frekari upplýsingar um sjálfbærni í starfsemi bankans eru aðgengilegar hér á vefnum.
