Landsbankinn hefur gerst hluthafi í Qivalis, félags í eigu 37 leiðandi fjármálafyrirtækja frá 15 Evrópulöndum, og tekur þannig þátt í að þróa stöðugleikamynt í evru fyrir evrópskan fjármálamarkað.
Stöðugleikamynt eða fastgengismynt er sýndareign í formi rafeyris sem er bundinn við gengi hefðbundinnar myntar. Lausnin sem Qivalis vinnur að verður að fullu studd með varasjóðstryggingu á móti hverri útgefinni sýndareiningu. Ein stafræn evra mun jafngilda einni evru. Stöðugleikamyntin mun lúta eftirliti hollenska seðlabankans. Hluthafar eiga allir jafnan hlut og eykur samstarfið slagkraft evrópskra fjármálafyrirtækja í útgáfu sýndareigna í evrum.
Lilja Björk Einarsdóttir, bankastjóri Landsbankans segir: „Með þátttöku sinni verður Landsbankinn hluti af víðtæku samstarfi leiðandi evrópskra banka sem miðar að því að þróa framtíðarinnviði fjármálakerfisins með áherslu á öryggi, gagnsæi og skilvirkni í stafrænum greiðslum. Það er mikilvægt fyrir Landsbankann að móta og nýta þær tækninýjungar sem við teljum að geti einfaldað viðskiptavinum lífið.“
Markmið verkefnisins er að byggja upp örugga, evrópska innviði fyrir stafrænar greiðslur og uppgjör sem samræmast regluverki Evrópusambandsins, þar á meðal MiCA-regluverkinu um markaði fyrir sýndareignir.
Qivalis var stofnað árið 2025 og hefur aðsetur í Amsterdam. Verkefnið er nú í leyfisferli hjá hollenska seðlabankanum og er stefnt að því að lausnin verði tilbúin á síðari hluta árs 2026. Landsbankinn gerist nú hluthafi með þátttöku í hlutafjáraukningu félagsins. Meðal annarra þátttakenda í samstarfinu eru ABN AMRO, BBVA, BNP Paribas, Nordea, Rabobank, SEB, Swedbank, Danske Bank og UniCredit.
