Markets overview

Hlutfall lausra starfa af heildarfjölda starfa hefur aukist mikið á þessu ári. Á árinu 2019 voru laus störf upp undir 2% af fjölda starfa meginhluta ársins en síðan lækkaði hlutfallið á 4. ársfjórðungi og var nokkuð svipað allt fram á árið 2021. Á fyrsta ársfjórðungi í ár fór hlutfallið upp í tæp 2% og svo upp í 4% á 2. ársfjórðungi samhliða því sem hagkerfið var að komast af stað. Ferðaþjónustan nýtur nokkurrar sérstöðu varðandi hlutfallslega fjölgun starfa, en á 2. ársfjórðungi var fjöldi lausra starfa um 12% af fjölda starfa í greininni. Á sama tíma voru laus störf í byggingarstarfsemi um 6% og þau voru um 5% í verslun, veitinga- og gististöðum.

Búferlaflutningar hafa tekið breytingum eftir að faraldurinn braust út. Erlendir ríkisborgarar fluttu margir af landi brott, á sama tíma og færri íslenskir ríkisborgarar fluttu út. Staðan á örðum ársfjórðungi er svipuð því sem sást fyrir faraldur hvað fjölda aðfluttra í heild umfram brottflutta varðar, en samsetningin eftir ríkisfangi hefur tekið breytingum.

Vísitala neysluverðs (VNV) hækkaði um 0,16% milli mánaða í júlí og er ársverðbólga óbreytt frá fyrri mánuði í 4,3%. Þetta var minni hækkun en við áttum von á, en við höfðum spáð 0,3% hækkun milli mánaða.

Launafólki sem fékk staðgreiðsluskyldar greiðslur fyrstu fjóra mánuði 2021 fækkaði um 5,6% frá sama tíma 2020. Launasumman hækkaði um 5,8% á nafnverði á sama tíma. Það gæti bent til þess að tekjulægra fólk hafi í meira mæli horfið af vinnumarkaði en það sem hafði hærri tekjur. Hér er sérstaða ferðaþjónustunnar enn meiri en var varðandi launagreiðslurnar. Í ferðaþjónustunni hefur þeim sem fá staðgreiðsluskyldar greiðslur fækkað um tæp 42%, á meðan fækkunin í öðrum greinum er innan við 2%. Af þessum greinum er það einungis í opinberri stjórnsýslu og sjávarútvegi sem launafólki fjölgar.