Samfélagsábyrgð

Landsbankinn hefur markað sér stefnu í samfélagsábyrgð þar sem efnahags-, samfélags- og umhverfismálum er fléttað saman við starfshætti bankans. Stefnan miðar að því að stuðla að sjálfbærni í íslensku samfélagi, vera hreyfiafl og starfa eftir ábyrgum stjórnarháttum í rekstri bankans.

Landsbankinn leiðandi í Evrópu samkvæmt mælingu Sustainalytics

Landsbankinn fær enn betri einkunn en áður í nýju UFS-áhættumati frá Sustainalytics og lækkar úr 17,5 niður í 13,5 stig á skala sem nær upp í 100. Landsbankinn er nú í 2. sæti af 382 bönkum sem fyrirtækið hefur mælt í Evrópu. Sustainalytics telur einkar litla hættu á að Landsbankinn verði fyrir fjárhagslegum áföllum vegna umhverfis- og félagslegra þátta og stjórnarhátta (UFS).

Árið 2019 var Landsbankinn með 17,5 stig en lækkar í 13,5 stig og færist úr 6. sæti af 376 evrópskum bönkum sem Sustainalytics mældi upp í 2. sæti af 382 bönkum.

Lilja Björk Einarsdóttir, bankastjóri Landsbankans: „Það felst mikil viðurkenning í því að Landsbankinn skuli vera í 2. sæti af tæplega 400 evrópskum bönkum í úttekt Sustainalytics. Við leggjum áherslu á góðan og stöðugan rekstur og að bankinn byggi upp viðskiptasambönd til langs tíma. Traust áhættumenning og samfélagsábyrgð skiptir verulegu máli og við finnum að viðskiptavinir treysta í síauknum mæli á að við séum í fararbroddi á þessum sviðum. Við erum mjög stolt af þessari niðurstöðu og ætlum svo sannarlega að halda áfram að vera leiðandi á þessum vettvangi.“

Nánar um áhættumat Sustainalytics

UFS-áhættumat metur áhættu og áhættustýringu fyrirtækis í tengslum við UFS-þætti sem taldir eru mikilvægir fyrir hvert fyrirtæki út frá undirliggjandi atvinnugreinum. Aðferðafræðin metur umfang mikilvægrar UFS-áhættu sem áhættustýring fyrirtækis nær ekki til. Því meiri áhætta sem fellur utan áhættustýringarramma fyrirtækisins, því hærra er áhættumatið.

UFS-áhættumat

Samfélagsskýrsla Landsbankans fyrir árið 2019


Samfélagsskýrsla Landsbankans 2019

Samfélagsskýrsla Landsbankans fyrir árið 2019 er nú aðgengileg á vef bankans. Í skýrslunni er fjallað ítarlega um samfélagsábyrgð bankans og áhrif starfseminnar á umhverfi og samfélag. Landsbankinn gefur árlega út samfélagsskýrslu þar sem viðmiðum Global Reporting Initiative (GRI) er fylgt. Reynt er að veita innsýn í það sem vel er gert og einnig það sem betur má fara.

Í skýrslunni er fjallað um jafnréttismál í Landsbankanum, ábyrgar fjárfestingar, innleiðingu þriggja heimsmarkmiða Sameinuðu þjóðanna í starfsemina og víðtæk samfélagsverkefni sem bankinn tekur þátt í, m.a. alþjóðlegt verkefni sem miðar að því að þróa sérstakan loftslagsmæli fyrir fjármálafyrirtæki.

Lilja Björk Einarsdóttir, bankastjóri Landsbankans, segir:

„Ljóst er að efnahagsleg- og samfélagsleg áhrif Covid-19 faraldursins verða mikil. Á tímum sem þessum er meginverkefni bankans að þjóna og styðja við viðskiptavini sína. Um leið er mikilvægt að huga að framtíðinni. Samfélagsskýrsla Landsbankans sem kemur út í dag fjallar um hvernig unnið var að samfélagsábyrgð hjá bankanum á árinu 2019. Í skýrslunni má lesa um þau fjölmörgu verkefni sem bankinn vinnur að í tengslum við samfélagslega ábyrgð, allt frá því að tryggja jafnrétti á vinnustað, til innleiðingar á aðferðafræði ábyrgra fjárfestinga og til víðtækra samfélagsverkefna sem bankinn tekur þátt í. Samfélagsábyrgð verður æ stærri hluti af rekstri fyrirtækja og vill Landsbankinn halda áfram að vera leiðandi á því sviði. Á þessu ári verður mikilvægasta verkefni bankans að veita trausta og góða fjármálaþjónustu og styðja við bakið á viðskiptavinum í þeim áskorunum sem þeir standa frammi fyrir.“

Landsbankinn er virkur þátttakandi í starfi UN Global Compact, verkefni Sameinuðu þjóðanna um ábyrgar fjárfestingar (UN PRI), er stofnaðili að samtökum um ábyrgar fjárfestingar á Íslandi (IcelandSIF) og Festu, miðstöð um samfélagsábyrgð fyrirtækja. Alþjóðlega greiningarfyrirtækið Sustainalytics gerði UFS-áhættumat (umhverfis- og félagslegir þættir og stjórnarhættir) á bankanum og var Landsbankinn í 6. sæti af þeim 376 bönkum sem Sustainalytics mældi í Evrópu.

Í september 2019 skrifaði Landsbankinn undir viðmið Sameinuðu þjóðanna um ábyrga bankastarfsemi og hefur í kjölfarið sett sér markmið sem kynnt eru í skýrslunni. Markmiðin snúa að því að meta losunarumfang lána- og eignasafns bankans, þróa græn útlán og halda áfram að vinna gegn kynbundnum launamun og stuðla að jafnrétti.

Lesa samfélagsskýrslu Landsbankans 2019


Landsbankinn veitir 15 milljónir króna í samfélagsstyrki

Samfélagsstyrkir 2019
Styrkþegar eða fulltrúar þeirra auk dómnefndar og bankastjóra Landsbankans.

Samfélagsstyrkjum að upphæð 15 milljónum króna var úthlutað úr Samfélagssjóði Landsbankans þriðjudaginn 17. desember sl. Alls hlutu 33 verkefni styrki að þessu sinni. Verkefnin sem hlutu styrki eru afar fjölbreytt og gagnast fólki á öllum aldri og víða um land.

Fjögur verkefni hlutu styrk að fjárhæð 1 milljón króna, 15 verkefni hlutu 500.000 króna styrk og 14 verkefni fengu 250.000 króna styrk.

Rúmlega 700 umsóknir bárust sjóðnum að þessu sinni. Samfélagsstyrkjum Landsbankans er ætlað að styðja mannúðar- og líknarmál, menntamál, rannsóknir og vísindi, forvarnar- og æskulýðsstarf, umhverfismál og verkefni á sviðum menningar og lista.

Dómnefnd samfélagsstyrkja var skipuð þeim Ármanni Jakobssyni, prófessor við Háskóla Íslands, Felix Bergssyni, leikara og Guðrúnu Agnarsdóttur, lækni, en hún var jafnframt formaður dómnefndar.

Frá árinu 2011 hafa um 350 verkefni fengið samfélagsstyrki úr Samfélagssjóði Landsbankans og nema styrkirnir samtals 150 milljónum króna.

Nánar um styrkveitinguna

 



Heimsmarkmiðin hluti af samfélagsstefnu Landsbankans

Landsbankinn leggur áherslu á þrjú af heimsmarkmiðunum: markmið 5 um jafnrétti kynjanna, markmið 8 um góða atvinnu og hagvöxt og markmið 12 um ábyrga neyslu og framleiðslu.

Nánar um heimsmarkmiðin


Samstarf

Landsbankinn á í samstarfi á sviði samfélagslegrar ábyrgðar bæði hér á landi og erlendis. Bankinn er einn stofnaðila Festu, miðstöðvar um samfélagslega ábyrgð fyrirtækja, aðili að UN Global Compact, einn af stofnendum norrænnar deildar innan UNEP FI og fylgir leiðbeiningarstaðlinum ISO 26000.

Nánar um samstarfið


Þetta tengist líka Samfélagsstefnu Landsbankans - með beinum eða óbeinum hætti