Fréttir og útgáfuefni

Landsbankinn gefur út víkjandi skuldabréf að fjárhæð 100 milljónir evra

Landsbankinn lauk í dag sölu á fyrstu víkjandi skuldabréfaútgáfu bankans að fjárhæð 100 milljónir evra. Skuldabréfin eru gefin út til tíu ára með innköllunarheimild að fimm árum liðnum. Gert er ráð fyrir að þau fái lánshæfiseinkunnina BBB- frá S&P Global Ratings.

Skuldabréfin voru seld á kjörum sem jafngilda 285 punkta álagi á miðgildi vaxtatilboða í vaxtaskiptasamningum á markaði og munu skuldabréfin bera 3,125% vexti. Heildareftirspurn nam 160 milljónum evra aðallega frá fjárfestum á Norðurlöndum, meginlandi Evrópu og Bretlandi.

Skuldabréfin verða gefin út undir EMTN-útgáfuramma bankans og er stefnt að töku skuldabréfanna til viðskipta í írsku kauphöllinni þann 6. september 2018.

Umsjónaraðilar sölunnar voru Citigroup og J.P. Morgan.

Lilja Einarsdóttir, bankastjóri Landsbankans, segir:

„Það er ánægjulegt að Landsbankinn hafi náð þeim áfanga að ljúka sinni fyrstu sölu á víkjandi skuldabréfum í evrum. Undirtektir fjárfesta voru góðar og eru til marks um að bankinn njóti vaxandi trausts á alþjóðlegum fjármagnsmörkuðum. Útgáfan er liður í að ná fram hagkvæmari fjármagnsskipan sem styður við arðsemismarkmið bankans til lengri tíma litið.“

 

Fjárfestatengsl - 30. júlí 2020 15:59

Uppgjör Landsbankans fyrir fyrri helming ársins 2020

Afkoma Landsbankans var neikvæð um 3,3 milljarða króna eftir skatta á fyrri helmingi ársins 2020 samanborið við 11,1 milljarðs króna hagnað á sama tímabili árið 2019. Virðisrýrnun útlána nam 13,4 milljörðum króna á tímabilinu sem jafngildir um 1,1% af útlánasafni bankans, samanborið við virðisrýrnun upp á 2,4 milljarða króna á sama tímabili í fyrra.


Nánar

Fjárfestatengsl - 21. júlí 2020 12:54

Landsbankinn besti banki á Íslandi að mati Euromoney

Alþjóðlega fjármálatímaritið Euromoney hefur valið Landsbankann besta bankann á Íslandi og er þetta annað árið í röð sem bankinn hlýtur þessa viðurkenningu. Við útnefninguna er litið til ýmissa þátta í rekstri og stefnu bankanna, eins og afkomu af reglulegri starfsemi, kostnaðarhagræðingar og þjónustuframboðs.


Nánar

Fjárfestatengsl - 07. maí 2020 16:48

Uppgjör Landsbankans fyrir fyrstu þrjá mánuði ársins 2020

Afkoma Landsbankans var neikvæð um 3,6 milljarða króna eftir skatta á fyrstu þremur mánuðum ársins 2020, samanborið við 6,8 milljarða króna hagnað á sama tímabili árið 2019. Virðisrýrnun útlána nam 5,2 milljörðum króna á tímabilinu, samanborið við virðisrýrnun upp á 1 milljarð króna á sama tímabili í fyrra.


Nánar