Fréttir

06. júlí 2017 10:22

Landsbankinn veitir fimm milljónir króna í umhverfisstyrki

Styrkþegar umhverfisstyrkja 2017
Styrkþegar eða fulltrúar þeirra ásamt dr. Guðrúnu Pétursdóttur, formanni dómnefndar, lengst t.v. og Lilju Björk Einarsdóttur bankastjóra Landsbankans t.h.

Fimmtán verkefni hlutu umhverfisstyrki úr Samfélagssjóði Landsbankans miðvikudaginn 5. júlí sl. Fimm verkefni fengu 500 þúsund krónur hvert og tíu verkefni 250 þúsund krónur hvert, samtals fimm milljónir króna. Þetta var í sjöunda sinn sem Landsbankinn veitir umhverfisstyrki úr Samfélagssjóði bankans en í ár bárust um 70 umsóknir.

Umhverfisstyrkjum Landsbankans er ætlað að styðja við verkefni á sviði umhverfismála og náttúruverndar og dómnefnd leitast við að velja metnaðarfull verkefni sem hafa skýra þýðingu fyrir íslenska náttúru og vistkerfið. Styrkirnir byggja á stefnu Landsbankans um samfélagslega ábyrgð þar sem fram kemur m.a. að bankinn hyggist flétta umhverfismál, efnahagsmál og samfélagsmál saman við rekstur sinn.

Í dómnefnd sátu Dr. Brynhildur Davíðsdóttir, dósent í umhverfis- og auðlindafræðum við Háskóla Íslands, Finnur Sveinsson, sérfræðingur í samfélagsábyrgð og dr. Guðrún Pétursdóttir, forstöðumaður Stofnunar Sæmundar fróða um sjálfbæra þróun við Háskóla Íslands, en hún var jafnframt formaður nefndarinnar.

Eftirtaldir hlutu umhverfisstyrki úr Samfélagssjóði Landsbankans að þessu sinni:

500.000 kr. styrkir

  • Veraldarvinir - Verkefnið „Hreinsum hringveginn“. Veraldarvinir munu senda 12 hópa sem hver telur níu sjálfboðaliða hringinn í kringum landið til þess að hreinsa til á 90 áningastöðum og tíu friðlýstum svæðum við hringveginn.
  • Ferðafélaginn – Áframhaldandi þróun á vefsíðunni Ferðafélaginn. Markmiðið með síðunni er að auka áhuga barna á umhverfi sínu og stuðla þannig að aukinni náttúruvernd.
  • Blái herinn - Hreinsun á strandlengju landsins. Blái herinn er 22 ára í ár og hefur frá upphafi fjarlægt um 1.340 tonn af rusli úr náttúru Íslands. Hreinsunarverkefnin eru orðin 140 talsins.
  • Skógræktarnefnd Einingarinnar. Skógræktarnefndin Einingarinnar hóf árið 1918 skógrækt í Halldórsstaðaskógi í Bárðardal. Styrkurinn er veittur til að setja upp salernisaðstöðu í skóginum, koma þar upp útiborði og endurnýja girðingar og hlið í skóginum.
  • Landeigendafélag Bjargtanga - Landvernd í Látravík og stýring á umferða gangandi og akandi ferðamanna á svæðinu. Ætlunin er einnig að bæta aðstöðu á tjaldsvæðinu á Brunnum í Látravík og á Bjargtöngum.

250.000 kr. styrkir

  • Skógræktarfélag Ólafsvíkur – Bætt aðgengi með grisjun trjágróðurs og lagningu göngustíga í dalverpi ofan Ólafsvíkur. Einnig verða kennileiti á svæðinu merkt til að koma í veg fyrir fyrningu örnefna.
  • Áhugamannafélag um samgöngur í Grunnavík – Endurnýjung á göngubrú yfir Staðará í Grunnavík á vinsælli gönguleið um Jökulfirði.
  • Hið íslenska náttúrufræðifélag - Félagið heldur almenna fræðslufundi mánaðarlega þar sem íslenskir náttúruvísindamenn greina frá rannsóknum sínum og niðurstöðum. Styrkurinn er veittur til að auðvelda miðlun þessa erinda svo fylgjast megi með þeim á netinu og gera þau aðgengileg til frambúðar.
  • Áhugamannafélagið Pílagrímar - Félagið hefur þegar stikað stóran hluta pílagrímaleiðarinnar frá Bæ í Borgarfirði að Skálholti. Styrkurinn er veittur til að bæta og endurnýja merkingar á áningarstöðum á hinni 120 km löngu leið.
  • Björn Halldórsson og Gunnlaugur Sigurðsson - Uppgræðsla Valþjófsstaðafjalls og nágrennis. Markmiðið er að uppgræðslusvæðið verði sjálfbært, þ.e. að gróður drepist ekki þótt áburðadreifingu sé hætt.
  • Fuglavernd - Frá árinu 1997 hefur Fuglavernd endurheimt votlendi í Friðlandinu í Flóa við Ölfusá. Styrkurinn er veittur til að útbúa kynningarefni um friðlandið og þann árangur sem náðst hefur.
  • Lionsklúbbur Vestmannaeyja – Endurbætur á göngustíg að fuglaskoðunarhúsi í Stórhöfða í Vestmannaeyjum.
  • Diana Divileková – Gerð aðstöðu til endurhæfingar á slösuðum villtum fuglum. Ætlunin er að byggja 50-60 fermetra netabúr með þaki til að þjálfa og endurhæfa fuglana.
  • Ferðafélag Íslands – Gerð göngustíga og lagfæringar á eldri stígum í Þórsmörk til að bæta aðgengi ferðalanga að náttúru Þórsmerkur.
  • Landvernd – Strandhreinsunarátak sem Landvernd mun standa fyrir á Degi íslenskrar náttúru þann 16. september næstkomandi.
Fleiri myndir frá afhendingunni má sjá hér

02. júlí 2020 14:49

Landsbankinn styrkir fimmtán framúrskarandi námsmenn

Landsbankinn úthlutaði námsstyrkjum til fimmtán námsmanna úr Samfélagssjóði bankans þann 1. júlí sl. Styrkirnir voru veittir í þrítugasta og fyrsta skipti. Heildarupphæð námsstyrkjanna nemur sex milljónum króna. Alls bárust rúmlega 500 umsóknir í ár en Landsbankinn er eini bankinn sem veitir námsstyrki.


Nánar

29. júní 2020 18:24

Umræðan: Fjármálageirinn og loftslagsvandinn

Hlutverk fjármálageirans í baráttunni við loftslagsvandann er til umfjöllunar í nýrri greinaröð Ara Skúlasonar hagfræðings á Umræðunni. Landsbankinn telur mikilvægt að fjalla um loftslagsmál og hið mikilvæga hlutverk sem fjármálafyrirtæki og fjármálamarkaðir munu gegna í þeim breytingum sem framundan eru.


Nánar

29. júní 2020 10:48

Hagsjá: Vinnumarkaðskönnun - áframhaldandi merki um veikari vinnumarkað

Starfandi fólki hefur fækkað töluvert á undanförnum mánuðum. Þá hefur vinnutími líka styst, sem þýðir að fjöldi unninna stunda, eða vinnuaflsnotkun, hefur farið minnkandi. Sé vinnuaflsnotkun nú borin saman við stöðuna fyrir ári kemur í ljós að breytingin síðustu 3 mánuði er veruleg miðað við síðustu ár og allt fram á þetta ár þegar vinnuaflsnotkun var almennt að aukast. Í maí minnkaði vinnuaflsnotkun um 8,8% miðað við maí 2019, bæði vegna fækkunar starfandi fólks og styttri vinnutíma. Í apríl dróst vinnuaflsnotkunin hins vegar saman um rúm 13%, aðallega vegna fækkunar starfandi fólks, en vinnutími styttist einnig á milli ára.


Nánar

Skráðu þig á póstlista