Samfélagsstefna

Samfélagsábyrgð - framtíðarsýn

Landsbankinn er traustur samherji í fjármálum

Samfélagsstefna Landsbankans miðar að því að stuðla að sjálfbærni í íslensku samfélagi, vera hreyfiafl og starfa eftir ábyrgum stjórnarháttum við rekstur bankans. Efnahagslíf, samfélag og náttúra eru hluti af sama kerfinu og vöxtur þess getur ekki farið út fyrir þau endanlegu takmörk sem náttúran setur. Sjálfbærni vistkerfa og öflugt atvinnulíf eru samþætt og samrýmanleg en ekki andstæður.

Við ætlum að vera hreyfiafl í samfélaginu með því að eiga frumkvæði að samstarfi við fyrirtæki, stofnanir og samtök um þróun á atvinnuháttum og innviðum sem stuðla að aukinni sjálfbærni íslensk atvinnulífs og samfélags með það að markmiði að tækifæri Íslands í þessu sambandi verði nýtt með sem bestum hætti fyrir land og þjóð til framtíðar. Saman sköpum við ný viðskiptatækifæri með áherslu á sjálfbærni.

Stefna Landsbankans er að vera til fyrirmyndar og vera traustur samherji í fjármálum. Við ætlum að vera í fremstu röð hvað varðar samfélagsábyrgð fyrirtækja á Íslandi. Til að undirbúa okkur enn betur ætlum við fyrir árslok 2018:

  • Að tryggja að allir starfsmenn hafi þekkingu á og skilji hvað felst í sjálfbærni.
  • Að eiga markvisst samtal við viðskiptavini, birgja og samfélagið um sjálfbærni og samfélagsábyrgð í fjármálastarfssemi.
  • Að innleiða grunnviðmið sjálfbærni við ákvarðanir bankans.

Markmið til framtíðar

Á næstu árum stefnum við að því sjálf og í samstarfi við aðra:

  • Tryggja að rekstur bankans hafi sem minnst áhrif á vistkerfið og lágmarka sóun.
  • Vera hreyfiafl í samfélaginu með því að eiga frumkvæði að samstarfi við fyrirtæki og stofnanir um þróun á atvinnuháttum og innviðum sem stuðla að aukinni sjálfbærni íslensk atvinnulífs og samfélags.
  • Taka ákvarðanir um þjónustuframboð og aðra þætti í rekstri bankans út frá forsendum sjálfbærrar þróunar.
  • Hvetja viðskiptavini og samstarfsaðila okkar til að fylgja stefnu um samfélagsábyrgð.
  • Hefja lánveitingar á grundvelli grænna skuldabréfa í samvinnu við erlenda fjármögnunaraðila.
  • Gæta að sjálfbærni við mat á fjárfestingarmöguleikum, lánveitingum og verðlagningu.
  • Greina framtaksfyrirtæki og skráð fyrirtæki með tilliti til sjálfbærni.
  • Vera til fyrirmyndar í aðgerðum gegn peningaþvætti, fjármögnun hryðjuverka og mansals.
  • Meta birgja með hliðsjón af sjálfbærni.
  • Mæla og meta árangur Landsbankans varðandi samfélagsábyrgð og sjálfbærni.

Skýr stefna í samfélagsábyrgð hefur jákvæð áhrif á útlán og ávöxtun fjárfestinga til lengri tíma og dregur úr áhættu bankans. Við ætlum að láta gott af okkur leiða og styðja við þá sýn bankans að viðskiptavinir okkar segi „svona á banki að vera“.

Nánari útskýringar

Ábyrgir stjórnarhættir

Við ætlum að vera fyrirmyndarfyrirtæki í stjórnarháttum og fylgja leiðbeinandi reglum Kauphallarinnar, Viðskiptaráðs og Samtaka atvinnulífsins þar um.

Sjá nánar

Grunnviðmið sjálfbærni

Við ætlum að fylgja þremur grunnviðmiðum sem lúta að umgengni um náttúruna og einu sem lýtur að samfélagslegu viðmiði.

Í sjálfbæru samfélagi verður náttúran ekki fyrir kerfisbundinni aukningu eftirfarandi af mannavöldum: (umfram það magn sem náttúran sjálf ræður við að vinna úr)

  • Uppsöfnun efna sem unnin eru úr jörðu.
  • Uppsöfnun framleiddra efna.
  • Hnignun (t.d vistkerfa eða gróðursvæða) af mannavöldum.
  • Aðstæður eru ekki skapaðar þar sem dregið er kerfisbundið úr getu fólks til að uppfylla grunnþarfir sínar.

Sjálfbærni vistkerfa

Þegar rætt er um þjónustu vistkerfa er átt við að mannkynið nýtir sér þjónustu eða afrakstur vistkerfa náttúrunnar, s.s. náttúruauðlindir og ýmis náttúruleg ferli. Náttúran og þjónusta vistkerfa er í grundvallaratriðum mikilvægasti framleiðsluþátturinn í hagkerfinu. Oft er rætt um að umhverfið, samfélagið og hagkerfið séu eins og þrífótur þar sem hver fótur styður við hina tvo. Einnig má hugsa um samspil þessara þátta sem þrjú háð mengi, þar sem umhverfið er stærsta mengið og samfélagið og hagkerfið eru hluti af því. Umhverfið er hinn náttúrulegi höfuðstóll mannskyns sem sér okkur fyrir lífsnauðsynlegri þjónustu vistkerfa. Miðjumengið er samfélagið eða mannauðurinn. Hagkerfið er minnsta mengið því það stjórnast af reglum og skipulagi hina tveggja mengjanna. Atvinnulífið getur haft veruleg áhrif á getu vistkerfa til að sinna sinni þjónustu en til að atvinnulífið geti þrifist þarf það á þjónustu vistkerfa og heilbrigðu samfélagi að halda.

Sjálfbærni vistkerfa og heilbrigt atvinnulíf eru samþætt og samrýmanleg markmið.

Parísarsamkomulagið

Parísarsamkomulagið er samkomulag í loftslagsmálum sem náðist í desember 2015. Í samkomulaginu var í fyrsta sinn kveðið á um að öll ríki skuli grípa til aðgerða til að draga markvisst úr losun gróðurhúsalofttegunda, takast á við afleiðingar loftslagsbreytinga og tryggja umtalsvert fjármagn til grænna lausna og jafnframt aðstoða ríki sem verða verst úti vegna loftslagsbreytinga.

Ísland fullgilti samkomulagið haustið 2016.

Landsbankinn undirritaði í nóvember 2015 yfirlýsingu um markmið í loftslagsmálum ásamt rúmlega 100 íslenskum fyrirtækjum og stofnunum. Yfirlýsingin var gerð í samstarfi við Reykjavíkurborg og Festu, miðstöð um samfélagsábyrgð.

Landsbankinn stóð fyrir fundi um Parísarsamkomulagið og áhrif þess á íslenskt atvinnulíf og fjárfestingar í Hörpu 25. febrúar 2016.

Jafnrétti

Landsbankinn telur styrk í virkri þátttöku einstaklinga í starfssemi bankans sem endurspeglar fjölbreytileika samfélagsins. Landsbankinn vill vera í fremstu röð í jafnréttismálum.

Jafnréttisáætlun Landsbankans miðar að því að allir einstaklingar fái notið réttinda sinna án mismununar á grundvelli kyns, kyngervis, kynvitundar, kynhneigðar, aldurs, fötlunar, heilsufars, þjóðernis, kynþáttar, litarháttar, uppruna, trúarbragða, skoðana, menningar eða stöðu að öðru leyti, sem lítilsvirðir eða misbýður einstaklingi eða hópi sem fyrir henni verður.

Landsbankinn greiðir sömu laun fyrir sömu störf og tryggir að á meðal starfsmanna er ekki til staðar óútskýrður kynbundinn launamunur.

Nánar um jafnréttismál í Landbankanum

Mælingar á árangri

Landsbankinn ætlar að þróa og innleiða sjálfbærni mælikvarða og birta niðurstöður árlega samhliða árskýrslu, sem ná meðal annars yfir:

Mælikvarðar

  • Framleiðni auðlinda (ávinningur í hlutfalli að notkun auðlinda).
  • Losun skaðlegra efna og mengun frá starfseminni.
  • Losun koltvísýrings frá starfsemi okkar, útlánum og fjárfestingum.
  • Vistspor Landsbankans (álag okkar á vistkerfið).
  • Framlegð og hagnaður til skemmri og lengri tíma.
  • Jafnlaunavottun.
  • Fjölbreytni á vinnustað.

Samfélagsstefna Landsbankans

 

Málaflokkarnir eru:

  • Viðskiptavinurinn
  • Mannauður
  • Samskipti við birgja og sala eigna
  • Stuðningur við samfélagið
  • Umhverfismál