Fréttir

- Samfélagsmál

Forritarar framtíðarinnar styrktir

Styrkir úr sjóðnum „Forritarar framtíðarinnar“ voru afhentir í Ráðhúsinu í Reykjavík á föstudaginn var.  Ragnheiður Elín Árnadóttir iðnaðar- og viðskiptaráðherra afhenti styrkina að viðstöddum kennurum og börnum frá grunnskólum sem hlutu styrki að þessu sinni. Landsbankinn er meðal bakhjarla sjóðsins.

Sjóðnum bárust alls 49 umsóknir, flestar frá grunnskólum, en alls var sótt um 930 tölvur/spjaldtölvur, forritunarkennslu fyrir 2.700 nemendur og 340 kennara. „Viðbrögðin fóru fram úr björtustu vonum og óhætt er að segja að þörfin sé mikil. Helsta verkefni sjóðsins núna er að fá fleiri bakhjarla til þess að geta styrkt fleiri verkefni,“ segir Katrín Dóra Þorsteinsdóttir formaður stjórnar sjóðsins.

Virði styrkjanna eru á fjórðu milljón og skipast þeir á milli fjögurra skóla að þessu sinni:

  • Grunnskóla Bolungarvíkur
  • Áslandsskóla í Hafnarfirði
  • Brúarskóla í Reykjavík
  • Kópavogsskóla

Styrkirnir fólust m.a. í tölvubúnaði, þjálfun kennara til forritunarkennslu og forritunarnámskeiðum fyrir nemendur. Innifalið er þjálfun, handleiðsla og eftirfylgni sem Skema mun sinna.

Markmiðið að efla forritunar- og tæknimenntun í grunn- og framhaldsskólum landsins

Reiknistofa bankanna (RB) og Skema ýttu sjóðnum „Forritarar framtíðarinnar“ úr vör í byrjun árs en megin hlutverk sjóðsins er að efla forritunar- og tæknimenntun í grunn- og framhaldsskólum landsins. Skólar og sveitarfélög geta sótt um styrki úr sjóðnum til að efla tæknikennslu og notkun tækni í skólastarfi og fá til þess þjálfun, ráðgjöf og tækjabúnað, allt eftir þörfum umsóknaraðila.

Atvinnulífið tekur höndum saman

Að sjóðnum koma fyrirtæki af öllum stærðum og leggja þau honum lið á ýmsan máta, svo sem með fjárframlögum, tæknibúnaði, þekkingu og ráðgjöf. Bakhjarlar sjóðsins eru auk Landsbankans: RB, Nýherji, Íslandsbanki, Microsoft, CCP og Cyan veflausnir.

Skortur á tæknimenntuðu fólki

Upplýsingatæknigeirinn vex hratt og má segja að fáar atvinnugreinar geti í dag þrifist án tækni. Ísland stendur frammi fyrir skorti á tæknimenntuðu fólki í landinu en samkvæmt skýrslu starfshóps á vegum mennta- og menningarmálaráðuneytis, Sambandi íslenskra sveitarfélaga og Samtaka iðnaðarins útskrifast um 500 manns á ári af raungreina- og tæknisviðum háskóla landsins á meðan þörfin er um 1.000 manns.

Sjóðurinn stefnir á að úthluta tvisvar á ári en næsti umsóknarfrestur í sjóðinn er 1. apríl 2014. Opnað verður fyrir umsóknir 1. mars næst komandi á www.forritarar.is.

null
Styrkþegar í fyrstu úthlutun úr sjóðnum Forritarar framtíðarinnar.
null
Nemendur úr þeim skólum sem hlutu styrki fylgdust með athöfninni.

Samfélagsmál - 19. maí 2020 09:27

Landsbankinn leiðandi í Evrópu samkvæmt mælingu Sustainalytics

Landsbankinn fær enn betri einkunn en áður í nýju UFS-áhættumati frá Sustainalytics og lækkar úr 17,5 niður í 13,5 stig á skala sem nær upp í 100. Landsbankinn er nú í 2. sæti af 382 bönkum sem fyrirtækið hefur mælt í Evrópu.


Nánar

Samfélagsmál - 27. mars 2020 13:00

Samfélagsskýrsla Landsbankans aðgengileg á netinu

Samfélagsskýrsla Landsbankans fyrir árið 2019 er nú aðgengileg á vef bankans. Í skýrslunni er fjallað ítarlega um samfélagsábyrgð bankans og áhrif starfseminnar á umhverfi og samfélag.


Nánar