Fréttir

27. mars 2020 13:00

Samfélagsskýrsla Landsbankans aðgengileg á netinu

Samfélagsskýrsla Landsbankans fyrir árið 2019 er nú aðgengileg á vef bankans. Í skýrslunni er fjallað ítarlega um samfélagsábyrgð bankans og áhrif starfseminnar á umhverfi og samfélag. Landsbankinn gefur árlega út samfélagsskýrslu þar sem viðmiðum Global Reporting Initiative (GRI) er fylgt. Reynt er að veita innsýn í það sem vel er gert og einnig það sem betur má fara.

Í skýrslunni er fjallað um jafnréttismál í Landsbankanum, ábyrgar fjárfestingar, innleiðingu þriggja heimsmarkmiða Sameinuðu þjóðanna í starfsemina og víðtæk samfélagsverkefni sem bankinn tekur þátt í, m.a. alþjóðlegt verkefni sem miðar að því að þróa sérstakan loftslagsmæli fyrir fjármálafyrirtæki.

Lilja Björk Einarsdóttir, bankastjóri Landsbankans, segir:

„Ljóst er að efnahagsleg- og samfélagsleg áhrif Covid-19 faraldursins verða mikil. Á tímum sem þessum er meginverkefni bankans að þjóna og styðja við viðskiptavini sína. Um leið er mikilvægt að huga að framtíðinni. Samfélagsskýrsla Landsbankans sem kemur út í dag fjallar um hvernig unnið var að samfélagsábyrgð hjá bankanum á árinu 2019. Í skýrslunni má lesa um þau fjölmörgu verkefni sem bankinn vinnur að í tengslum við samfélagslega ábyrgð, allt frá því að tryggja jafnrétti á vinnustað, til innleiðingar á aðferðafræði ábyrgra fjárfestinga og til víðtækra samfélagsverkefna sem bankinn tekur þátt í. Samfélagsábyrgð verður æ stærri hluti af rekstri fyrirtækja og vill Landsbankinn halda áfram að vera leiðandi á því sviði. Á þessu ári verður mikilvægasta verkefni bankans að veita trausta og góða fjármálaþjónustu og styðja við bakið á viðskiptavinum í þeim áskorunum sem þeir standa frammi fyrir.“

Landsbankinn er virkur þátttakandi í starfi UN Global Compact, verkefni Sameinuðu þjóðanna um ábyrgar fjárfestingar (UN PRI), er stofnaðili að samtökum um ábyrgar fjárfestingar á Íslandi (IcelandSIF) og Festu, miðstöð um samfélagsábyrgð fyrirtækja. Alþjóðlega greiningarfyrirtækið Sustainalytics gerði UFS-áhættumat (umhverfis- og félagslegir þættir og stjórnarhættir) á bankanum og var Landsbankinn í 6. sæti af þeim 376 bönkum sem Sustainalytics mældi í Evrópu.

Í september 2019 skrifaði Landsbankinn undir viðmið Sameinuðu þjóðanna um ábyrga bankastarfsemi og hefur í kjölfarið sett sér markmið sem kynnt eru í skýrslunni. Markmiðin snúa að því að meta losunarumfang lána- og eignasafns bankans, þróa græn útlán og halda áfram að vinna gegn kynbundnum launamun og stuðla að jafnrétti.

Samfélagsskýrsla Landsbankans fyrir árið 2019


26. maí 2020 16:44

Afgreiðslan í Bolungarvík sameinast útibúinu á Ísafirði

Afgreiðsla Landsbankans í Bolungarvík mun sameinast útibúinu á Ísafirði þann 1. júlí næstkomandi. Landsbankinn hefur frá árinu 2015 rekið afgreiðslu í Ráðhúsi Bolungarvíkur en samhliða aukinni notkun á stafrænni þjónustu hefur eftirspurn eftir gjaldkeraþjónustu minnkað mikið.


Nánar

26. maí 2020 07:47

Hagsjá: Mikil hækkun launavísitölu í apríl – opinberi markaðurinn kominn inn aftur

Samkvæmt tölum Hagstofu Íslands hækkaði launavísitalan um 3,3% milli mars og apríl. Síðustu 12 mánuði hefur launavísitalan hækkað um 6,8%, sem er mun meiri ársbreyting en verið hefur síðustu mánuði. Þar sem verðbólga hefur verið lítil þýða þessar miklu launabreytingar að kaupmáttur tók stökk upp á við. Kaupmáttur launa jókst þannig um 2,8% milli mars og apríl og var 4,5% meiri nú í apríl en í apríl í fyrra. Sú staða er reyndar mjög athyglisverð í ljósi þess að hallað hefur verulega undan fæti í efnahagslífinu.


Nánar

25. maí 2020 11:45

Hagsjá: Verð íslenskra sjávarafurða hélt áfram að hækka á fyrsta ársfjórðungi

Efnahagsleg áhrif Covid-19 megnuðu ekki að lækka verð á íslenskum sjávarafurðum á fyrsta ársfjórðungi.


Nánar

Skráðu þig á póstlista