Fréttir

06. mars 2017 16:56

Landsbankinn gefur út skuldabréf í evrum

Landsbankinn hf. gaf í dag út skuldabréf að fjárhæð 300 milljónir evra, eða að jafnvirði um 34 milljarða króna. Skuldabréfin eru til 5 ára með gjalddaga 14. mars 2022. Þau bera fasta 1,375% vexti og voru seld á kjörum sem jafngilda 130 punkta álagi ofan á millibankavexti í evrum.

Skuldabréfin voru seld til breiðs hóps fjárfesta á Bretlandi, meginlandi Evrópu, Norðurlöndunum og Asíu. Alls bárust tilboð fyrir tæplega 700 milljónir evra sem nemur meira en tvöfaldri umframeftirspurn, frá yfir 80 fjárfestum. Skuldabréfin eru gefin út undir Euro Medium Term Note (EMTN) skuldabréfaramma Landsbankans og verða bréfin skráð í kauphöllina á Írlandi þann 14. mars næstkomandi.

Landsbankinn mun nýta andvirði útgáfunnar til þess að fyrirframgreiða óhagkvæmari erlenda fjármögnun ásamt því að styrkja enn frekar lausafjárstöðu bankans.

Umsjónaraðilar útboðsins voru Bank of America, Barclays, Citigroup og JP Morgan.

Hreiðar Bjarnason, fjármálastjóri Landsbankans:

„Útgáfan í dag er einkar ánægjuleg. Fyrir það fyrsta eru kjörin hagstæðari en íslenskir bankar hafa séð á alþjóðlegum markaði á undanförnum árum, í öðru lagi heldur áfram að fjölga í hópi fjárfesta sem sjá tækifæri í að fjárfesta í skuldabréfum íslenskra fjármálafyrirtækja og í þriðja lagi er þetta lengsta útgáfan sem Landsbankinn hefur gefið út.

Hagstæðari kjör og mikill áhugi erlendra fjárfesta endurspegla vaxandi tiltrú þeirra á Landsbankanum og íslensku efnahagslífi. Ásættanleg kjör í alþjóðlegum samanburði gera Landsbankanum enn betur kleift að halda áfram öflugum stuðningi við íslenskt atvinnulíf.“

Ítarlegar upplýsingar um Landsbankann eru aðgengilegar fyrir fjárfesta og aðra áhugasama á landsbankinn.is/fjarfestar.

06. ágúst 2020 11:35

Hagsjá: Minni hækkanir íbúðaverðs um land allt á öðrum ársfjórðungi

Íbúðaverð hækkaði minna á öðrum ársfjórðungi en þeim fyrsta, en þó allt að 10% milli ára, mest á Akranesi. Talsvert virðist streyma inn af nýju húsnæði.


Nánar

04. ágúst 2020 09:15

Vikubyrjun 4. ágúst 2020

Hagstofan birti á dögunum bráðabirgðatölur um flutninga fólks til og frá landinu á öðrum ársfjórðungi og er greinilegt að útbreiðsla Covid-19-faraldursins hefur þar haft áhrif. Mun færri íslenskir ríkisborgarar fluttu af landi brott og að sama skapi fluttu mun færri erlendir ríkisborgarar til landsins en oft áður á þessum tíma árs.


Nánar

30. júlí 2020 15:59

Uppgjör Landsbankans fyrir fyrri helming ársins 2020

Afkoma Landsbankans var neikvæð um 3,3 milljarða króna eftir skatta á fyrri helmingi ársins 2020 samanborið við 11,1 milljarðs króna hagnað á sama tímabili árið 2019. Virðisrýrnun útlána nam 13,4 milljörðum króna á tímabilinu sem jafngildir um 1,1% af útlánasafni bankans, samanborið við virðisrýrnun upp á 2,4 milljarða króna á sama tímabili í fyrra.


Nánar

Skráðu þig á póstlista