Fréttir

28. desember 2016 10:41

Landsbankinn hlýtur gullmerki Jafnlaunaúttektar PwC í annað sinn

Landsbankinn hefur hlotið gullmerki Jafnlaunaúttektar PwC í annað sinn. Bankinn hlaut gullmerkið einnig árið 2015, fyrstur banka á Íslandi.

Gullmerki Jafnlaunaúttektar PwC veitist fyrirtækjum þar sem launamunur kynja er innan við 3,5%. Með viðurkenningunni er því staðfest að launamunur kynja hjá Landsbankanum er innan þeirra marka.

Hreiðar Bjarnason, staðgengill bankastjóra, segir: „Í Landsbankanum er unnið eftir skýrri og metnaðarfullri jafnréttistefnu. Að fá gullmerki Jafnlaunavottunar PwC, annað árið í röð, er mikilvæg viðurkenning á að bankinn fylgi skýrri stefnu í jafnréttismálum. Við erum stolt af þessum árangri og við ætlum áfram að vera í fararbroddi á þessu sviði.“

Skýr jafnréttisstefna frá árinu 2010

Árið 2010 setti Landsbankinn sér það markmið að hlutur hvors kyns um sig í forystusveit bankans skyldi ekki vera undir 40%. Það markmið hefur náðst. Í framkvæmdastjórn bankans eru nú þrjár konur og þrír karlar. Í bankaráði eru fjórir karlar og þrjár konur, þ.m.t. formaður bankaráðs.

Í jafnréttisstefnu bankans kemur m.a. fram Landsbankinn stefni að jöfnu hlutfalli kynja meðal starfsmanna, að störf flokkist ekki sem karla- eða kvennastörf og að konum og körlum skuli greidd sömu laun fyrir jafn verðmæt störf.

Í Jafnlaunaúttekt PwC er gerð grein fyrir mun á grunnlaunum, föstum launum og heildarlaunum eftir kyni. Tekið er mið af aldri, starfsaldri, menntun, starfaflokki, stöðu í skipuriti og vinnustundum.

Þann 1. desember sl. störfuðu alls 1.082 hjá Landsbankanum í 1.011 stöðugildum, þar af eru 64% konur en 36% karlar.

Nánar um jafnréttismál í Landsbankanum

26. maí 2020 16:44

Afgreiðslan í Bolungarvík sameinast útibúinu á Ísafirði

Afgreiðsla Landsbankans í Bolungarvík mun sameinast útibúinu á Ísafirði þann 1. júlí næstkomandi. Landsbankinn hefur frá árinu 2015 rekið afgreiðslu í Ráðhúsi Bolungarvíkur en samhliða aukinni notkun á stafrænni þjónustu hefur eftirspurn eftir gjaldkeraþjónustu minnkað mikið.


Nánar

26. maí 2020 07:47

Hagsjá: Mikil hækkun launavísitölu í apríl – opinberi markaðurinn kominn inn aftur

Samkvæmt tölum Hagstofu Íslands hækkaði launavísitalan um 3,3% milli mars og apríl. Síðustu 12 mánuði hefur launavísitalan hækkað um 6,8%, sem er mun meiri ársbreyting en verið hefur síðustu mánuði. Þar sem verðbólga hefur verið lítil þýða þessar miklu launabreytingar að kaupmáttur tók stökk upp á við. Kaupmáttur launa jókst þannig um 2,8% milli mars og apríl og var 4,5% meiri nú í apríl en í apríl í fyrra. Sú staða er reyndar mjög athyglisverð í ljósi þess að hallað hefur verulega undan fæti í efnahagslífinu.


Nánar

25. maí 2020 11:45

Hagsjá: Verð íslenskra sjávarafurða hélt áfram að hækka á fyrsta ársfjórðungi

Efnahagsleg áhrif Covid-19 megnuðu ekki að lækka verð á íslenskum sjávarafurðum á fyrsta ársfjórðungi.


Nánar

Skráðu þig á póstlista