Fréttir

09. júní 2016 10:05

Landsbankinn styrkir fimmtán framúrskarandi námsmenn

Fimmtán námsmenn fengu námsstyrki úr Samfélagssjóði Landsbankans miðvikudaginn 8. júní. Styrkirnir voru þá veittir í tuttugasta og sjöunda sinn. Heildarupphæð námsstyrkja nemur sex milljónum króna, sem er hæsta styrkveiting banka af þessu tagi á Íslandi. Alls bárust rúmlega 700 umsóknir.

Veittir eru styrkir í fimm flokkum til framhaldsskólanema, iðn- og verknema, háskólanema, til háskólanema í framhaldsnámi og listnema. Dómnefndin leitaðist við að velja metnaðarfulla, framúrskarandi námsmenn með framtíðarsýn sem nefndin taldi líklega til að auðga íslenskt samfélag í framtíðinni. Einnig var litið til annarra atriða við valið svo sem rannsókna og greinaskrifa, sjálfboðastarfa, afreka í íþróttum og þátttöku í félagsstarfi svo nokkuð sé nefnt.

Í dómnefnd sátu: Runólfur Smári Steinþórsson prófessor við Háskóla Íslands, Auður Björk Guðmundsdóttir framkvæmdastjóri hjá VÍS, Guðrún Norðfjörð viðskiptastjóri hjá Íslensku auglýsingastofunni og Þórmundur Jónatansson í markaðsdeild Landsbankans.


Styrkþegar námsstyrkja Landsbankans 2016

Styrkir til framhaldsskólanáms – 200.000 kr. hver

Brynhildur K. Ásgeirsdóttir – Menntaskólinn við Hamrahlíð. Brynhildur spilar á sex hljóðfæri og situr í stjórn Ungmennaráðs Barnaheilla, Save the Children á Íslandi.

Hákon Örn Grímsson – Menntaskólinn í Reykjavík. Við útskrift í grunnskóla var hann verðlaunaður fyrir framúrskarandi námsárangur og leiðtogahæfileika. Hann stefnir á nám í læknisfræði.

Sólveig Hrönn Hilmarsdóttir – Sólveig er afburðanámsmaður og hefur verið í ritstjórn Skólablaðsins. Að loknu stúdentsprófi hyggst hún halda til Frakklands og læra fornfræði.

Styrkir til iðn- og verknáms – 400.000 kr. hver

Hanna Siv Bjarnardóttir – ljósmyndun. Hanna Siv stundar nám í skapandi ljósmyndun í Ljósmyndaskóla Reykjavíkur með mjög góðum árangri. Hún er þriggja barna móðir.

Jenný María Unnarsdóttir – flugkennaranám. Jenný María hefur þegar lokið atvinnuflugnámi með blindflugs- og fjölhreyflaréttindum. Hún er nú á flugkennaranámskeiði hjá Keili.

Sólon Guðmundsson – flugnám. Sólon er einn af stofnendum flugklúbbsins Fljúgðu og langar til að koma á fót félagi flugnema til að hjálpa nýliðum að fóta sig í greininni.

Styrkir til háskólanáms – 400.000 kr. hver

Guðrún Valdís Jónsdóttir – tölvunarfræði við Princeton-háskóla. Guðrún hefur verið markmaður hjá ÍA í fótbolta frá 2003 og hefur spilað með unglingalandsliðunum. Nú er hún Ivy League-meistari með Princeton.

Helga Frímann Kristjánsdóttir – stjórnmálafræði og landfræði við Háskóla Íslands. Helga stefnir á framhaldsnám í umhverfis- og auðlindafræði í Bandaríkjunum. Hún hefur ferðast um heiminn og látið gott af sér leiða.

Ingvar Hjartarson – umhverfis- og byggingarverkfræði við Háskóla Íslands. Ingvar hefur sett Íslandsmet í 3.000 m og 5.000 m hlaupi innanhúss og er margfaldur Íslandsmeistari mörgum hlaupavegalengdum. Auk þess var hann í ólympíuliði Íslands í efnafræði.

Styrkir til háskólanáms á framhaldsstigi – 500.000 kr. hver

Agnes Eva Þórarinsdóttir – doktorsnám í efnafræði við Northwestern-háskóla. Agnes útskrifaðist frá Menntaskólanum á Akureyri vorið 2012 með hæstu einkunn sem gefin hafði verið í sögu skólans. Hún hefur keppt fyrir Íslands hönd á ólympíuleikunum í efnafræði og verið virk í Sprengjugengi Háskóla Íslands.

Helga Guðmundsdóttir – meistaranám í lögfræði við Harvard-háskóla. Helga hefur lokið námi í þjóðarétti og lausn deilumála við Friðarháskóla Sameinuðu þjóðanna. Lokaritgerð hennar fjallaði um lausn á makríldeilunni og hefur verið notuð við kennslu sem dæmi um nýjar aðferðir við lausn fiskveiðideilna.

Tandri Gauksson – meistaranám í stærðfræði við ETH-tækniháskólann í Zürich. Tandri lauk stærðfræðinámi frá Raunvísindadeild Háskóla Íslands með einkunnina 10,0 í 19 af 24 námskeiðum. Hann hefur m.a starfað á Veðurstofu Íslands við gerð tölfræðilegs líkans sem meta á hættu á sjávarflóðum í Reykjavík.

Styrkir til listnáms – 500.000 kr. hver

Gunnlaugur Björnsson – meistaranám í tónsmíðum við Yale School of Music. Gunnlaugur er tónskáld og gítarleikari. Hann útskrifaðist árið 2014 með láði frá Manhattan School of Music undir leiðsögn David Leisner þar sem hann fékk afhent Andrés Segovia-verðlaunin við útskrift.

Hallfríður Þóra Tryggvadóttir – meistaranám í stjórnun og framleiðslu sviðslista við Columbia-háskólann í New York. Námið sameinar áhugamál hennar á leikhúsi, listsköpun, viðskiptum og lögfræði. Hallfríður hlaut hæsta styrk sem skólinn hefur veitt við inngöngu í námið frá upphafi.

Sólveig Gunnarsdóttir – meistaranám í arktitektúr við Cooper Union í New York. Sólveig útskrifaðist með B.A. gráðu í arkitektúr frá Listaháskóla Íslands 2013 með hæstu einkunn sem gefin hefur verið fyrir lokaverkefni síðustu ár. Hún stefnir á að nýta fagið til að hafa áhrif á umhverfi sitt og samfélag.

06. ágúst 2020 11:35

Hagsjá: Minni hækkanir íbúðaverðs um land allt á öðrum ársfjórðungi

Íbúðaverð hækkaði minna á öðrum ársfjórðungi en þeim fyrsta, en þó allt að 10% milli ára, mest á Akranesi. Talsvert virðist streyma inn af nýju húsnæði.


Nánar

04. ágúst 2020 09:15

Vikubyrjun 4. ágúst 2020

Hagstofan birti á dögunum bráðabirgðatölur um flutninga fólks til og frá landinu á öðrum ársfjórðungi og er greinilegt að útbreiðsla Covid-19-faraldursins hefur þar haft áhrif. Mun færri íslenskir ríkisborgarar fluttu af landi brott og að sama skapi fluttu mun færri erlendir ríkisborgarar til landsins en oft áður á þessum tíma árs.


Nánar

30. júlí 2020 15:59

Uppgjör Landsbankans fyrir fyrri helming ársins 2020

Afkoma Landsbankans var neikvæð um 3,3 milljarða króna eftir skatta á fyrri helmingi ársins 2020 samanborið við 11,1 milljarðs króna hagnað á sama tímabili árið 2019. Virðisrýrnun útlána nam 13,4 milljörðum króna á tímabilinu sem jafngildir um 1,1% af útlánasafni bankans, samanborið við virðisrýrnun upp á 2,4 milljarða króna á sama tímabili í fyrra.


Nánar

Skráðu þig á póstlista