Fréttir

18. febrúar 2016 16:55

Landsbankinn áfram stoltur bakhjarl UN Women

UN Women
Steinþór Pálsson og Inga Dóra Pétursdóttir við undirskriftina í Hörpu.

Landsbankinn og UN Women á Íslandi hafa skrifað undir samstarfssamning til næstu tveggja ára um áframhaldandi stuðning við UN Women, með sérstaka áherslu á verkefnið HeForShe. Framlag bankans nemur þremur milljónum króna á tímabilinu.

Landsbankinn verður áfram einn helsti bakhjarl HeForShe og mun styðja við herferðir, viðburði og auglýsingar sem snúa að verkefninu. Markmiðið er að hvetja karlmenn og stráka til að láta til sín taka í baráttunni fyrir jafnrétti kynjanna á öllum vígstöðvum, við barnauppeldi, á heimilinu, á vinnustöðum, skólum, almenningsstöðum og á netinu.

Nú þegar hafa 10.424 karlar gerst HeForShe hér á landi. Það eru einn af hverjum sautján en markmiðið er að þeir verði einn af hverjum fimm.

Mikilvægt að ná til karla

Inga Dóra Pétursdóttir framkvæmdastýra UN Women á Íslandi kveðst ánægð með samstarfið. „Stuðningur Landsbankans gerir okkur kleift að kynna HeForShe fyrir landsmönnum. Við viljum sérstaklega ná til allra karlmanna og stráka. Samkvæmt rannsókn UN Women verður jafnrétti náð árið 2095 ef við höldum áfram á sömu braut og á sama hraða. Með bæði kyn um borð er talið að jafnrétti náist helmingi hraðar.”

Steinþór Pálsson bankastjóri Landsbankans segir UN Women sinna mjög mikilvægu starfi. „Við viljum leggja okkar að mörkum í mikilvægri baráttu UN Women. Með samtakamætti er hægt að láta góða hluti gerast hratt. Jafnrétti næst því aðeins að bæði kynin rói í sömu átt og að við leggjumst öll á árarnar.”

Mikil áhersla á jafnréttismál

Landsbankinn hefur á undanförnum árum lagt mikla áherslu á jafnréttismál og hefur hlotið gullmerki jafnlaunaúttektar PWC. Þá er bankinn með virka jafnréttisstefnu, jafnlaunastefnu og frá árinu 2010 hefur verið miðað að því að hlutur hvors kyns í forystusveit bankans sé ekki undir 40%.

Útvega konum vernd og öruggt athvarf

Landsbankinn hefur stutt við starf UN Women með margvíslegum hætti undanfarin ár. Um þessar mundir eru samtökin að vekja fólk til meðvitundar um bágar aðstæður flóttakvenna. Konur á flótta hafa ekki verið fleiri frá því við lok seinni heimstyrjaldar. Um 500 þúsund konur og börn flýja nú heimalönd sín og leggja leið sína til Evrópu. Talið er að 12% kvenna sem ferðast yfir Miðjarðarhafið séu barnshafandi. Konur og stúlkur á flótta eiga í stöðugri hættu á að vera beittar ofbeldi, kynferðislegri misnotkun eða mansali.

UN Women hefur brugðist við neyðinni á landamærastöðvum Evrópu með því að útvega konum vernd og öruggt athvarf; koma upp aðskildum salernum og sturtuaðstöðu fyrir konur og karlmenn, setja upp kynjaskipta svefnskála, veita starfsfólki á landamærunum þjálfun í þekkja einkenni mansals og hvernig bregðast eigi við, auk þess að veita þolendum kynbundins ofbeldis áfallahjálp.

25. september 2020 16:09

Landsbankinn aðili að viljayfirlýsingu um fjárfestingar í þágu sjálfbærrar uppbyggingar

Landsbankinn er aðili að viljayfirlýsingu um fjárfestingar í þágu sjálfbærrar uppbyggingar sem ríkisstjórnin og aðilar sem fara fyrir hátt í 80% af eignum á íslenskum fjármálamarkaði hafa staðfest.


Nánar

25. september 2020 08:04

Hagsjá: Áfram neikvæð tíðindi af vinnumarkaði – varla tímabundið ástand

Stytting vinnutíma ætti að öllu jöfnu að fela í sér að heildarlaun hækki minna en launavísitala þar sem yfirvinnutekjur skerðast. Heildarlaun alls hækkuðu um 5,8% milli 2. ársfjórðungs 2019 og 2020. Á sama tíma hækkaði launavísitalan um 6,7% þannig að stytting vinnutíma kemur greinilega fram í þróun heildarlauna. Þróun innan einstakra greina og markaða er mismunandi. Þannig hækkuðu heildarlaun í gisti- og veitingarekstri einungis um 1,4% á þessum tíma.


Nánar

23. september 2020 10:37

Hagsjá: Launavísitala hækkaði lítillega í ágúst – endurskoðun kjarasamninga framundan

Launin á almenna markaðnum hækkuðu um 6,5% á frá 2. ársfjórðungi 2019 fram til sama tíma 2020 og um 7,2% á þeim opinbera. Mæld launavísitala hækkaði um 6,8% á sama tíma. Töluvert bil hafði myndast á milli launaþróunar á almenna og opinbera markaðnum nær allt síðasta ár.


Nánar

Skráðu þig á póstlista