Fréttir

27. janúar 2016 17:38

Landsbankinn áfram bakhjarl Stofnunar Vigdísar Finnbogadóttur

Mynd
Vigdís Finnbogadóttir, Steinþór Pálsson bankastjóri, Jón Atli Benediktsson rektor Háskóla Íslands og Guðmundur Hálfdanarson forseti Hugvísindadeildar við undirritun styrktarsamnings Landsbankans við Stofnun Vigdísar Finnbogadóttur í erlendum tungumálum.

Landsbankinn hefur endurnýjað styrktarsamning sinn við Stofnun Vigdísar Finnbogadóttur í erlendum tungumálum til þriggja ára. Samningurinn var undirritaður í hátíðasal Háskóla Íslands miðvikudaginn 27. janúar síðastliðinn, en framlag bankans nemur sex milljónum króna á tímabilinu. Landsbankinn hefur styrkt stofnun Vigdísar með veglegum hætti á síðustu árum.

Auk Steinþórs Pálssonar bankastjóra undirrituðu forsvarsmenn tíu annarra fyrirtækja úr íslensku atvinnulífi styrktarsamninga við stofnunina. Jón Atli Benediktsson rektor Háskóla Íslands undirritaði samningana fyrir hönd skólans í Hátíðarsal HÍ að viðstaddri Vigdísi Finnbogadóttur, Illuga Gunnarssyni mennta- og menningarmálaráðherra og fjölda annarra gesta.

„Stofnun Vigdísar Finnbogadóttur sinnir mikilvægu hlutverki í starfi tungumála og menningar. Við í Landsbankanum höfum fylgst með þessari uppbyggingu með miklum áhuga og höfum lagt starfinu lið með stolti um árabil,“ segir Steinþór Pálsson bankastjóri Landsbankans.

Hæsta framlagið frá Landsbankanum

Fyrirtækin sem standa að samningunum eru Landsbankinn, Icelandair Group, Radisson Blu Hótel Saga, Arion banki, Alvogen, Bláa Lónið, Kvika, Reginn, Íslandsbanki, Íslandshótel og N1. Styrkirnir eru allir nema einn til þriggja ára og nema árleg framlög frá 500 þúsundum til tveggja milljóna króna. Alls nema styrkirnir 33,5 milljónum króna á samningstímanum. Framlög fyrirtækjanna skipast þannig:

  • Landsbankinn – 6 milljónir kr.
  • Icelandair Group – 4,5 milljónir kr.
  • Radisson Blu Hótel Saga – 3,5 milljónir kr.
  • Alvogen, Arion banki, Bláa Lónið, Kvika og Reginn – 3 milljónir kr. hvert
  • Íslandsbanki, Íslandshótel og N1 – 1,5 milljón kr. hvert
Mynd
Ellefu fyrirtæki í íslensku atvinnulífi munu styrkja stofnun Vigdísar Finnbogadóttur á næstu þremur árum. Við hlið Vigdísar fyrir miðju myndar eru Auður Hauksdóttir, formaður stjórnar Stofnunar Vigdísar Finnbogadóttur og dótturdóttir Vigdísar, Aþena Vigdís Eggertsdóttir, sem opnaði nýjan vef Vigdísar á nokkrum tungumálum.

Styrkjunum verður varið til daglegrar starfsemi vegna undirbúnings Vigdísarstofnunar – alþjóðlegrar miðstöðvar tungumála og menningar, sem mun starfa undir merkjum Mennta-, vísinda- og menningarmálastofnunar Sameinuðu þjóðanna (UNESCO). Með starfsemi alþjóðlegu tungumálamiðstöðvarinnar er ætlunin að heiðra störf Vigdísar í þágu tungumála og halda áfram því brautryðjendastarfi sem hún hefur unnið á alþjóðavettvangi sem fyrsti og eini velgjörðarsendiherrra tungumála í heiminum hjá UNESCO.

Við sama tækifæri opnuðu Illugi Gunnarsson mennta- og menningarmálaráðherra og Aþena Vigdís Eggertsdóttir, dótturdóttir Vigdísar, nýja heimasíðu Vigdísar á nokkrum tungumálum – www.vigdis.is. Vinnu við síðuna var hrundið af stað í tilefni af 100 ára afmæli kosningarréttar kvenna á síðasta ári fyrir styrk frá mennta- og menningarmálaráðuneytinu og utanríkisráðuneytinu.

Á horni Suðurgötu og Brynjólfsgötu rís nú bygging Stofnunar Vigdísar Finnbogadóttur en hún mun hýsa alþjóðlegu tungumálamiðstöðina auk kennslu og rannsókna í erlendum tungumálum. Áætlað er að hún verði tekin í notkun um næstu áramót. Þar verður einnig Vigdísarstofa og aðstaða fyrir ráðstefnur og sýningar um framandi tungumál og menningu sem opnar verða gestum og gangandi. Sérstök áhersla verður lögð á að miðla upplýsingum um tengsl Íslands við umheiminn í sögu og samtíð til erlendra ferðamanna. Í þessu nýja þekkingarsetri felast gríðarleg tækifæri til nýsköpunar, ekki síst í tengslum við vísindastarfsemi og menningartengda ferðaþjónustu.

Með veglegum framlögum sínum taka fyrirtækin höndum saman við Háskóla Íslands um að hrinda þessu metnaðarfulla verkefni í framkvæmd.

06. apríl 2020 10:37

Vikubyrjun 6. apríl 2020

Alþjóðaferðamálastofnunin (e. World Tourism Organization) á von á að komum erlendra ferðamanna á heimsvísu fækki um milli 20% og 30% milli ára í ár vegna Covid-19 faraldursins. Þetta verður í þriðja sinn frá aldamótum sem komum erlendra ferðamanna fækkar á milli ára en árið 2003 fækkaði þeim um 0,4% vegna SARS faraldursins og 2009 um 4% vegna alþjóðlegu fjármálakreppunnar.


Nánar

06. apríl 2020 09:17

Hámark á snertilausum greiðslum með greiðslukortum hækkar í 7.500 krónur

Ákveðið hefur verið að hækka hámarksfjárhæð greiðslu með snertilausum VISA-greiðslukortum úr 5.000 krónum í 7.500 krónur. Til að breytingin taki gildi þarf að breyta hugbúnaði í posum. Byrjað verður að uppfæra posa í matvöruverslunum og apótekum og er gert ráð fyrir að því ljúki fyrir páska.


Nánar

03. apríl 2020 14:19

Aðalfundur Landsbankans 22. apríl 2020

Aðalfundur Landsbankans hf. verður haldinn miðvikudaginn 22. apríl 2020 kl. 13.00. Fundinn átti upphaflega að halda 27. mars 2020 en honum var frestað vegna útbreiðslu Covid-19.


Nánar