Fréttir

14. janúar 2016 09:42

Fjármálavit: Unglingar vilja læra um fjármál

Fjármálavit nefnist kennsluefni í fjármálafræðslu fyrir nemendur í eldri bekkjum grunnskóla. Samtök fjármálafyrirtækja (SFF) standa fyrir verkefninu í samvinnu við aðildarfélögin. Landsbankinn tekur virkan þátt í verkefninu sem þykir afar vel heppnað. Krakkarnir sýna mikinn áhuga í tímum og spyrja um allt frá smálánum til íbúðarkaupa, og hvað það þýði eiginlega að vera gjaldþrota.

Enginn er fæddur fjármálasnillingur

SFF þróaði námsefnið í samvinnu við kennara og kennaranema og er markmiðið að fræða nemendur í öllum skólum landsins um grunnþætti fjármála. Einnig er námsefninu ætlað að veita innblástur í kennslu um fjármál.

Kennsluefnið samanstendur af stuttum myndböndum þar sem unglingar ræða saman um fjármál á gamansaman hátt. Síðan fylgja verkefni og umræður.

Í upphafi kennslustundar er spilað myndband með stórsöngvaranum Páli Óskari Hjálmtýssyni, en hann er verndari verkefnisins. Í myndbandinu bendir hann á mikilvægi þess að fræðast um fjármál. Allir þurfi að læra að fara vel með peningana sína.

Landsbankinn tekur virkan þátt í fræðslunni

Starfsmenn aðildarfélaga SFF um allt land heimsækja skóla á sínu svæði og miðla námsefninu án tengingar við fyrirtækin.

Kolbrún Ýr Kristjánsdóttir, fjármálaráðgjafi í útibúi Landsbankans í Mjódd, hefur heimsótt fjölmarga skóla á höfuðborgarsvæðinu.

Mynd
Kolbrún Ýr Kristjánsdóttir, fjármálaráðgjafi í útibúi Landsbankans í Mjódd

„Þetta hefur verið ótrúlega gefandi og skemmtilegt. Það er svo gaman að tala við krakkana og sjá hvernig þeir upplifa fjármál,“ segir Kolbrún.

Kolbrúnu þykir til að mynda ákaflega gaman að heyra krakkana ræða um það hvað hlutirnir kosti.

„Til dæmis þegar krakkarnir taka saman heildarkostnaðinn af einni bíóferð í viku. Það er frábært augnablik þegar þeir uppgötva heildarkostnaðinn og sjá hlutina í nýju ljósi.“

Spurningaflóð í tímum

Kolbrún segir að krakkarnir sýni ótrúlegan áhuga í tímum.

„Það er frábært að heyra þau ræða um hinar ýmsu sparnaðarleiðir og hvernig best sé að ná markmiðum sínum.“ 

Í hópavinnu eiga þau til dæmis að koma með hugmyndir fyrir leigjanda sem vill kaupa sér íbúð.

„Ein hugmyndin var að borða bara alltaf núðlur nema á laugardögum og önnur hugmynd var að borða alltaf hjá mömmu og pabba,“ segir Kolbrún.

Krakkarnir komi oft með mjög góðar hugmyndir og það sé alveg klárt að þeir hafi mikinn áhuga á að leggja fyrir. Hvort sem það er til að eiga vasapeninga eða safna fyrir bílprófi eða jafnvel fyrstu íbúðinni.

Námsefnið er mjög gott að mati Kolbrúnar

„Það sem situr eftir hjá krökkunum er án efa myndböndin þar sem jafnaldrar þeirra tala um þessi mál á tungumáli sem þeir skilja.“

Þakklátir foreldrar

Kristín Lúðvíksdóttir, starfsmaður SFF, er verkefnisstjóri Fjármálavits. Hún segir að verkefnið hafi gengið vonum framar. Börnin séu ánægð með fræðsluna og kennarar tali um að þetta hafi verið löngu tímabært.

„Og það eru ekki síst foreldrarnir sem eru þakklátir fyrir að krakkarnir fái fræðslu um fjármál. Margir segja að þeim hefði nú sjálfum ekki veitt af slíkri kennslu á unglingsárunum. Foreldrarnir eru mjög jákvæðir.“

Mynd
Kristín Lúðvíksdóttir, starfsmaður SFF og verkefnisstjóri Fjármálavits

Kristín segir að SFF hafi lengi haft áhuga á að búa til námsefni fyrir grunnskóla um fjármál til að efla fjármálafræðslu og fjármálalæsi. .

Mikilvægt að heimsækja alla krakka, hvar sem þeir búa

Frá því að verkefnið var fyrst kynnt í mars hefur Fjármálavit heimsótt tæplega 3000 nemendur í 70 skólum víðsvegar um landið.

„Við leggjum mikið upp úr því að ná til allra krakka hvar sem þeir eiga heima á landinu. Við fórum m.a á Hólmavík, Ísafjörð , Þingeyri , Suðureyri og Tálknafjörð og heimsóttum alla skólana á Akureyri. Auk þess sem við höfum farið mjög víða í skóla á Austur –og Suðurlandi.”

Kristín leggur áherslu á að þetta sé þróunarverkefni.

„Við ákváðum að byrja á námsefni fyrir elstu bekki í grunnskólum. Í vetur höfum við einblínt á það viðfangsefni að setja sér markmið í fjármálum. Í framhaldinu höfum við áhuga á þróa einnig efni fyrir yngri bekki grunnskólanna.”

Í mars verður Fjármálavit aftur með í Evrópsku peningavikunni. Það var einmitt í þeirri viku í fyrra sem Fjármálavit var fyrst kynnt til sögunnar. Tilgangurinn með þessari viku er að vekja athygli á þörfinni á auknu fjármálalæsi auk þess að skapa umræðu.

Fjarmalavit.is

06. desember 2019 15:18

Umræðan: Birkir Rúnar Gunnarsson - „Aðgengismál ekki svartagaldur fyrir örfáa“

Tæknin sem gerir símanum okkar kleift að skilja mannsraddir og gefa tækjunum okkar raddir hefur gjörbreytt lífi fólks með fötlun. Birkir Rúnar Gunnarsson, sérfræðingur í aðgengismálum, segir tækifæri tækninnar óviðjafnanleg en að það skipti öllu máli að gera hlutina rétt.


Nánar

05. desember 2019 10:36

Hagsjá: Hlutdeildarlán – ný lausn í mótun hjá stjórnvöldum

Stjórnvöld hafa boðað frumvarp um hlutdeildarlán sem er ætlað að auðvelda tekju- og eignalitlum einstaklingum að eignast íbúð. Í umfjöllun Unu Jónsdóttur, hagfræðings, kemur m.a. fram að markhópurinn þurfi að vera vel skilgreindur og séð til þess að stuðningurinn fari ekki til annarra en hann er ætlaður.


Nánar

22. nóvember 2019 13:37

Ekki hægt að skipta 500 evru seðlum eftir 5. desember

Landsbankinn mun ekki taka við 500 evru seðlum frá og með 5. desember nk. en útgáfu 500 evru seðla hefur verið hætt. Áfram verður hægt að skipta 500 evru seðlum í bönkum á evrusvæðinu, samanber meðfylgjandi tilkynningu Seðlabanka Evrópu.


Nánar