Fréttir

17. nóvember 2015 18:43

Landsbankinn undirritar loftslagsyfirlýsingu

Landsbankinn hefur undirritað yfirlýsingu um markmið í loftslagsmálum og er í hópi rúmlega 100 íslenskra fyrirtækja og stofnana sem gert slíkt hið sama í samstarfi við Reykjavíkurborg og Festu, miðstöð um samfélagsábyrgð. Fyrirtækin hyggjast hvert með sínum hætti draga úr losun gróðurhúsalofttegunda og minnka úrgang í starfsemi sinni.

Mynd
Steinþór Pálsson bankastjóri Landsbankans undirritar loftslagsyfirlýsingu en með honum eru Dagur B. Eggertsson borgarstjóri og Ketill B. Magnússon framkvæmdastjóri Festu sem stóðu að yfirlýsingunni.

Í byrjun desember verður 21. loftslagsráðstefna Sameinuðu þjóðanna haldin í París. Þar verður rammasamningur Sameinuðu þjóðanna vegna loftslagsbreytinga (UNFCCC) samþykktur, með það að markmiði að sporna við hnattrænni hlýnun og draga úr losun gróðurhúsalofttegunda.

Þjóðir heims hafa sett sér markmið um að draga verulega úr losun gróðurhúsalofttegunda og hefur Ísland ásamt ríkjum Evrópusambandsins og fleirum lýst því yfir að dregið verði úr losun um 40%. Á Íslandi glímum við ekki við mengandi rafmagnsframleiðslu eða húshitun líkt og margar þjóðir en eitt helsta viðfangsefni okkar eru mengandi samgöngur og losun úrgangs.

Yfirlýsingin sem fyrirtæki og Reykjavíkurborg hafa skrifað undir verður afhent á loftslagsráðstefnunni í París. Aðild að yfirlýsingunni jafngildir því að þátttakendur setji sér einföld markmið fyrir lok júní 2016 um að:

  • Draga úr losun gróðurhúsalofttegunda.
  • Minnka myndun úrgangs, m.a. með því að nota minna af óendurvinnanlegu hráefni og umbúðum, endurvinna og endurnýta.
  • Mæla árangurinn og gefa reglulega út upplýsingar um stöðu ofangreindra þátta.

Nánar um verkefnið

Aðildarfyrirtækjum Festu, stofnunum og fyrirtækjum Reykjavíkurborgar og 300 stærstu fyrirtækjum á Íslandi var boðin þátttaka í verkefninu. Verkefnið er hugsað sem hvatning um að draga úr losun gróðurhúsalofttegunda á eigin forsendum og sýna þar með frumkvæði og ábyrgð gagnvart umhverfinu og samfélaginu.

Mynd
Fulltrúar 103 fyrirtækja og stofnana sem undirrituðu yfirlýsingu um markmið í loftslagsmálum í Höfða.

15. nóvember 2019 08:18

Landsbankinn breytir vöxtum

Fastir vextir óverðtryggðra íbúðalána til 36 mánaða lækka um 0,20 prósentustig en fastir vextir óverðtryggðra íbúðalána til 60 mánaða eru óbreyttir. Breytilegir vextir óverðtryggðra íbúðalána lækka um 0,15 prósentustig og aðrir breytilegir vextir óverðtryggðra útlána lækka almennt um 0,10-0,25 prósentustig.


Nánar

14. nóvember 2019 08:42

Hagsjá: 18% fækkun ferðamanna í október

Það sem af er ári hefur ferðamönnum frá Norður-Ameríku fækkað mest á sama tíma og ferðamönnum frá Kína og Rússlandi fjölgar. Um 163.000 ferðamenn komu til landsins í gegnum Leifsstöð í október og voru þeir 18,4% færri en í október 2018.


Nánar

12. nóvember 2019 09:28

Hagsjá: Fjáraukalög 2019 - ágætar horfur fyrir árið miðað við það sem vænta mátti

Samkvæmt fjárlögum árisins 2019 var heildarjöfnuður ríkissjóðs 28,6 ma.kr. Um það leyti sem fjárlagafrumvarp fyrir árið 2020 var lagt fram var reiknað með að halli yrði á rekstri ríkissjóðs um 8,8 ma.kr. á árinu 2019.


Nánar