Fréttir

04. september 2015 17:30

Samruni Landsbankans og Sparisjóðs Norðurlands samþykktur

Samruni Landsbankans og Sparisjóðs Norðurlands hefur nú verið samþykktur af eftirlitsaðilum og tekur formlega gildi í dag 4. september 2015. Bankaráð Landsbankans samþykkti samrunann fyrir hönd bankans á fundi sínum í dag en áður hafði fundur stofnfjárhafa Sparisjóðsins veitt samþykki sitt.

Sameinað fyrirtæki verður rekið undir nafni Landsbankans frá og með mánudeginum 7. september 2015, starfsmenn sjóðsins verða þá orðnir starfsmenn Landsbankans, allar eignir og skuldbindingar sparisjóðsins renna inn í bankann og hann tekur við rekstri allra útibúa sjóðsins.

Sparisjóður Norðurlands rekur útibú og afgreiðslur á Dalvík, Raufarhöfn, Þórshöfn, Kópaskeri, Suðureyri og á Bolungarvík.  Engar breytingar verða á þjónustu við viðskiptavini fyrst um sinn, útibú og afgreiðslur verða opin á sama tíma og jafnan, reikningsnúmer haldast óbreytt, kort gilda áfram og aðgangur að netbanka verður óbreyttur. Viðskiptavinum verða síðan sendar upplýsingar um þær breytingar sem samrunanum fylgja og mun starfsfólk Landsbankans leggja sig fram um að þær valdi sem minnstum truflunum.

Viðskiptavinum er ráðlagt að snúa sér til síns útibús eða þjónustuvers Landsbankans með fyrirspurnir (sími: 410 4000, info@landsbankinn.is) og á vef bankans eru svör við algengum spurningum.

Samkvæmt því samkomulagi sem fyrir liggur munu stofnfjáreigendur í sparisjóðnum fá greitt með hlutabréfum í Landsbankanum. Heildarendurgjald til þeirra verður 594 milljónir króna með fyrirvara um áreiðanleikakönnun.

Sparisjóður Norðurlands varð til við sameiningu Sparisjóðs Svarfdæla, Sparisjóðs Þórshafnar og nágrennis þann 4. júlí 2013 og Sparisjóður Bolungarvíkur bættist við þann 30. júní 2014. Stofnfé Sparisjóðsins nam 1.008.791 þús. kr. og var í eigu 361 aðila. Stærstu eigendur voru ríkissjóður Íslands, 79,2%, Tryggingasjóður sparisjóða, 14,9%, Eignasafn Seðlabanka Íslands, 1,7% og Rekstrarfélag verðbréfasjóða ÍV, 1,7%. Aðrir áttu minna en 1%.

Stjórn sparisjóðsins leitaði til Landsbankans 9. júní 2015, til að kanna áhuga á samruna, vegna óvissu um framtíð sjóðsins. Samruni var háður samþykki bæði Fjármálaeftirlits og Samkeppniseftirlits sem nú liggur fyrir.

Nánari upplýsingar og spurt og svarað um samrunann

02. júlí 2020 14:49

Landsbankinn styrkir fimmtán framúrskarandi námsmenn

Landsbankinn úthlutaði námsstyrkjum til fimmtán námsmanna úr Samfélagssjóði bankans þann 1. júlí sl. Styrkirnir voru veittir í þrítugasta og fyrsta skipti. Heildarupphæð námsstyrkjanna nemur sex milljónum króna. Alls bárust rúmlega 500 umsóknir í ár en Landsbankinn er eini bankinn sem veitir námsstyrki.


Nánar

29. júní 2020 18:24

Umræðan: Fjármálageirinn og loftslagsvandinn

Hlutverk fjármálageirans í baráttunni við loftslagsvandann er til umfjöllunar í nýrri greinaröð Ara Skúlasonar hagfræðings á Umræðunni. Landsbankinn telur mikilvægt að fjalla um loftslagsmál og hið mikilvæga hlutverk sem fjármálafyrirtæki og fjármálamarkaðir munu gegna í þeim breytingum sem framundan eru.


Nánar

29. júní 2020 10:48

Hagsjá: Vinnumarkaðskönnun - áframhaldandi merki um veikari vinnumarkað

Starfandi fólki hefur fækkað töluvert á undanförnum mánuðum. Þá hefur vinnutími líka styst, sem þýðir að fjöldi unninna stunda, eða vinnuaflsnotkun, hefur farið minnkandi. Sé vinnuaflsnotkun nú borin saman við stöðuna fyrir ári kemur í ljós að breytingin síðustu 3 mánuði er veruleg miðað við síðustu ár og allt fram á þetta ár þegar vinnuaflsnotkun var almennt að aukast. Í maí minnkaði vinnuaflsnotkun um 8,8% miðað við maí 2019, bæði vegna fækkunar starfandi fólks og styttri vinnutíma. Í apríl dróst vinnuaflsnotkunin hins vegar saman um rúm 13%, aðallega vegna fækkunar starfandi fólks, en vinnutími styttist einnig á milli ára.


Nánar

Skráðu þig á póstlista