Fréttir

14. ágúst 2015 16:01

Þrjár milljónir til 32 verkefna úr Menningarnæturpotti

Þremur milljónum króna var í gær veitt úr Menningarnæturpotti Landsbankans til 32 verkefna og viðburða sem fram fara á Menningarnótt. Menningarnæturpottur er samstarfsverkefni Landsbankans og Höfuðborgarstofu en bankinn hefur verið máttarstólpi Menningarnætur frá upphafi. Allur fjárstuðningur Landsbankans rennur beint til listamanna og hópa sem koma fram á hátíðinni.

Styrkþegar og fulltrúar þeirra.
Fulltrúar allra verkefna sem hlutu styrk úr Menningarnæturpotti Landsbankans í ár.

Þetta er í sjötta sinn sem styrkir eru veittir úr Menningarnæturpottinum. Í ár bárust vel yfir hundrað umsóknir og valdi starfshópur á vegum Höfuðborgarstofu styrkþegana. Við úthlutun var kastljósinu meðal annars beint að viðburðum á torgum miðborgarinnar; nýjum og gömlum, stórum og litlum, fundnum og földum.

Landsbankinn mun til viðbótar við þessa styrki standa fyrir sinni árvissu menningardagskrá í útibúi sínu í Austurstræti.

Nánar um Menningarnótt

Menningarnótt verður haldin í tuttugasta sinn laugardaginn 22. ágúst. Viðburðir af öllum toga verða á torgum og götum, í húsasundum og görðum, í galleríum, verslunum, menningarstofnunum og heimahúsum og munu fylla miðborgina lífi. Yfirskrift Menningarnætur er Gakktu í bæinn og vísar til þeirrar gömlu íslensku venju að bjóða gesti velkomna og gera vel við þá. Í lok Menningarnætur verður að vanda vegleg flugeldasýning sem fengið hefur nafnið Stjörnubrim – himininn kristallast.

Höfuðborgarstofa sér um skipulagningu Menningarnætur en samstarfsaðilar eru Landsbankinn og Vodafone.

Menningarnæturpottur 2015 – styrkþegar

Styrkir að upphæð 200.000 kr.

  • Leikhúsið Ethos – Leiksýning með leikhópi sem skipaður er fólki sem hefur ekki fengið tækifæri til þess að láta hæfileika sína í ljós en meðal þeirra eru heimilislausir, hælisleitendur, fólk sem gílmir við geðfötlun eða aðra sjúkdóma. Leikhópurinn nýtur leiðsagnar Ilmar Kristjánsdóttur leikkonu og Rúnars Guðbrandssonar leikstjóra.
  • Sigþór Hallbjörnsson – Rokktónleikarnir „Rokk og ról og mótorhjól“ til minningar um mótorhjólafólk sem fallið hefur frá.

Styrkir að upphæð 150.000 kr.

  • Blúsáhugamenn – Blúshátíð á Grandagarði með þátttöku fjölda tónlistarmanna.
  • Elvar Ingi Helgason – Reggílistahátíðin „Ein ást“ en þema hátíðarinnar er að ýta undir virðingu gagnvart náunganum og fordómalaust viðhorf með söng og swingi.
  • Festisvall Fünf – Myndlistarhátíð í Vitagarði í óhefðbundnum rýmum innan og utandyra.
  • Hljómsveitin Eva og táknmálstúlkahópurinn Hraðar hendur – Tónleikar í tali og tónum sem verða túlkaðir samtímis á táknmáli.
  • JCI – Blindir sjá. Ljósmyndasýning og ljósmyndakeppni með völdum myndum frá blindum og sjónskertum.

Styrkir að upphæð 100.000 kr.

  • Bókmenntaborg UNESCO – Verkefnið „Ljósberar og Ós“.
  • Brynja Péturs – Street Dance Festival, fríir danstímar í fjölbreyttum street-dansstílum.
  • Guðrún Árný Karlsdóttir – Tónleikar í Dómkirkjunni með eigin lögum og lögum eftir Hilmar Karlsson.
  • Hitt húsið – Tónleikar með ungum og efnilegum hljómsveitum frá Eistlandi, Frakklandi, Hollandi og vinningshljómsveit Músíktilrauna 2015, Rythmatik frá Íslandi.
  • Improv Ísland – Spuna-maraþon með sextán spunasýningum í röð við undirleik Karls Olgeirssonar.
  • Listasafn Íslands – Útibíó með sögustund á listatorgi Listasafnsins.
  • Mengi – Frumflutningur á Menningarstundinni, nýjum gjörningi sem stendur yfir í allt að fjóra tíma þar sem talað verður til hjartans, en ekki heilans.
  • Nemendur í Listaháskóla Íslands – Verkefnið „Listatækið ABBA“, skemmtilegur þátttökugjörningur, sem skjalfestir viðbrögð fólks við óvæntum aðstæðum.
  • Projekt Polska – Tónleikar tríósins RGG með lögum af nýjustu plötu sinni Aura og hefur tríóið fengið í lið með sér jazztónlistamenn frá Póllandi.
  • Stefán Ingvar Vigfússon – Torgið talar - ljúf kaffiblanda, hljóðlistaverk og þátttökuleikhús, á mörkum gjörningalistar og útvarpsleikhúss.
  • Sönghópurinn Spectrum – Raddspuni þar sem áheyrendur verða baðaðir heillandi og framandi tónum í Tjarnarbíói.

Styrkir að upphæð 50.000 kr.

  • Óperuakademía unga fólksins – Verkefnið „Alls konar ást“ á vegum Óperuakademíu unga fólksins.
  • Samtök um danshús – Verkefnið „Amma dansar“ – opið hús í æfingasölum samtakanna.
  • Bjarni Þór Kristjánsson – Verkefnið „Eldur í afli“ þar sem eldsmiðir af öllu landinu smíða fagra gripi.
  • Sönghópurinn Gija – Tónleikar með litháískri tónlist frá ýmsum tímum.
  • Guðný Rúnarsdóttir – Verkefnið „Hvaðan ertu?“ á Káratorgi þar sem gestum og gangandi er boðið að skreyta torgið.
  • Haraldur Ægir Guðmundsson – Ljóðadjass – Bukowski til Íslands.
  • Kammerhópurinn Umbra – Tónleikarnir Rökkrið yljar með þjóðlögum og endurreisnartónlist sem tengjast dekkri hliðum mannlegrar tilivistar.
  • Listvinafélag Hallgrímskirkju – Sálmafoss – kórar og organistar flytja fjölbreytta kirkjutónlist eftir íslenskar skáldkonur og tónskáld.
  • Fidget Feet og bíbí & blaka – Nýtt verk með blöndu af nýsirkús og samtímadansi undir stjórn Chantal MacCormick og Tinnu Grétarsdóttur.
  • Tangófélag Reykjavíkur – Torgstemmning frá Buenos Aires eins og hún gerist best.
  • Mandólín – Tangótónlist frá ýmsum heimshornum.
  • Marta Magdalena Niebieszczanska og Justyna Grosel – Sýning á landlagsljósmyndum teknum í endurreisnarstíl með frumstæðri myndavél án linsu (camera obscura).
  • Tónagull – Tónleikarnir „Vísnagull“ fyrir yngstu kynslóðina.
  • Halldór Eldjárn og Þórður Hans Baldursson – Innsetningin „Þjóðarsálin“ á Austurvelli.
Styrkþegar og fulltrúar þeirra.
Leikhópurinn Ethos mun setja upp fyrstu leiksýningu sína á Menningarnótt en í leikhópnum eru ýmsir fulltrúar samfélagsins sem ekki hafa haft tækifæri til að sýna hæfileika sína, s.s. heimilislausir. Frá vinstri eru: Hjördís, Guðmundur frá Höfuðborgarstofu, Rúnar og Ilmur leikstjórar, Herbert og Elínborg frá Landsbankanum.

15. nóvember 2019 08:18

Landsbankinn breytir vöxtum

Fastir vextir óverðtryggðra íbúðalána til 36 mánaða lækka um 0,20 prósentustig en fastir vextir óverðtryggðra íbúðalána til 60 mánaða eru óbreyttir. Breytilegir vextir óverðtryggðra íbúðalána lækka um 0,15 prósentustig og aðrir breytilegir vextir óverðtryggðra útlána lækka almennt um 0,10-0,25 prósentustig.


Nánar

15. nóvember 2019 10:56

Hagsjá: Spáum að verðbólga fari í markmið í nóvember

Hagstofan birtir nóvembermælingu vísitölu neysluverðs (VNV) miðvikudaginn 27. nóvember. Hagfræðideild Landsbankans spáir óbreyttu gildi vísitölunnar milli mánaða. Gangi spáin eftir lækkar verðbólgan úr 2,8% í 2,5%.


Nánar

15. nóvember 2019 08:14

Umræðan: Hvert stefnir bankaheimurinn?

Í nýrri grein á Umræðunni er fjallað um framtíð fjártækni, m.a. um möguleikann á því að tengja ýmsar upplýsingar af samfélagsmiðlum við fjármálaöpp og fá þannig sérsniðin tilboð um vörur og lánafyrirgreiðslu.


Nánar