Fréttir

29. mars 2015 16:42

Samruni Landsbankans og Sparisjóðs Vestmannaeyja

  • Fjármálaeftirlitið (FME) hefur tekið ákvörðun um samruna Landsbankans og Sparisjóðs Vestmannaeyja.
  • Samruninn tók gildi sunnudaginn 29. mars kl. 15:00.
  • Frá og með þeim tíma urðu allir starfsmenn sparisjóðsins starfsmenn Landsbankans.
  • Landsbankinn hefur yfirtekið allar eignir og skuldbindingar sjóðsins, þ.m.t. útlán og innlán viðskiptavina.
  • Starfsemi útibúa Sparisjóðs Vestmannaeyja verður óbreytt fyrst um sinn og öll fimm útibú sjóðsins opna á hefðbundnum tíma mánudagsmorguninn 30. mars.
  • Netbankar eru aðgengilegir viðskiptavinum eins og verið hefur.
  • Landsbankinn er vel í stakk búinn til að taka við rekstri og skuldbindingum sparisjóðsins.
  • Landsbankinn býður viðskiptavini sparisjóðsins velkomna.

Sparisjóður VEstmannaeyja

Sparisjóður Vestmannaeyja hefur um nokkurt skeið ekki uppfyllt lögbundnar kröfur um eigið fé og þurfti því að finna lausnir á fjárhagsvanda sínum. Stjórn sparisjóðsins leitaði því til Landsbankans eftir að aðrar tilraunir til að endurreisa sjóðinn báru ekki árangur.

Í framhaldi komust stjórn sparisjóðsins og Landsbankinn að samkomulagi um samruna félaganna. Í kjölfarið hefur FME í dag, 29. mars, tekið ákvörðun um samruna þeirra á grundvelli bráðabirgðaákvæðis VI í lögum 161/2002 um fjármálafyrirtæki.

Við samrunann er virði stofnfjár sparisjóðsins metið á 332 milljónir króna. Matið er háð hugsanlegum leiðréttingum en getur þó aldrei orðið minna en 50 milljónir króna og aldrei meira en 550 milljónir króna. Sem endurgjald fyrir stofnfé sparisjóðsins fá fyrrum stofnfjáreigendur sparisjóðsins hlutabréf í Landsbankanum sem samtals nemur tæplega 0,15% af útgefnu hlutafé bankans, en endanlegur hlutur er háður mati á virði stofnfjár sparisjóðsins.

Sparisjóður Vestmannaeyja er með starfsstöðvar á fimm stöðum á landinu: Í Vestmannaeyjum, á Selfossi, Höfn, Breiðdalsvík og Djúpavogi. Landsbankinn rekur útibú á Selfossi og Höfn og þar verða útibú sameinuð fljótlega.

Lögð verður áhersla á að samruninn efli þjónustu við viðskiptavini og samskipti þeirra við bankann. Öll útibú sparisjóðsins opna á venjubundnum tíma á mánudag og viðskiptavinir geta snúið sér til sinna þjónustufulltrúa að venju. Fyrst um sinn munu reikningar og reikningsnúmer haldast óbreytt.

Þorbjörg Inga Jónsdóttir, fráfarandi stjórnarformaður Sparisjóðs Vestmannaeyja segir:
„Stjórn Sparisjóðs Vestmannaeyja hefur að undanförnu leitað leiða til að tryggja rekstrargrundvöll sjóðsins. Með samkomulagi við Landsbankann hefur náðst farsæl niðurstaða sem tryggir hag sjóðsins, eigenda hans og viðskiptavina og almannahag á þeim stöðum þar sem sparisjóðurinn hefur starfsemi. Vegna stöðu sparisjóðsins var óhjákvæmilegt að leita samstarfs við traustan aðila til framtíðar og við viljum þakka Landsbankanum fyrir samstarfið á undanförnum dögum.“

Steinþór Pálsson, bankastjóri Landsbankans segir:
„Sparisjóður Vestmannaeyja hefur gengt mikilvægu hlutverki á þeim stöðum þar sem hann hefur haft starfsemi. Landsbankinn mun leggja sig fram um að taka vel á móti viðskiptavinum sparisjóðsins og sinna þeim eins og best verður á kosið. Við leggjum áherslu á að samþætting í kjölfar samrunans gangi vel og hratt fyrir sig til þess að tryggja öfluga fjármálaþjónustu á þessum svæðum. Ég býð viðskiptavini sparisjóðsins velkomna í Landsbankann.“

Ákvörðun Fjármálaeftirlitsins vegna Sparisjóðs Vestmannaeyja

Nánari upplýsingar og spurt og svarað um samrunann

06. desember 2019 15:18

Umræðan: Birkir Rúnar Gunnarsson - „Aðgengismál ekki svartagaldur fyrir örfáa“

Tæknin sem gerir símanum okkar kleift að skilja mannsraddir og gefa tækjunum okkar raddir hefur gjörbreytt lífi fólks með fötlun. Birkir Rúnar Gunnarsson, sérfræðingur í aðgengismálum, segir tækifæri tækninnar óviðjafnanleg en að það skipti öllu máli að gera hlutina rétt.


Nánar

05. desember 2019 10:36

Hagsjá: Hlutdeildarlán – ný lausn í mótun hjá stjórnvöldum

Stjórnvöld hafa boðað frumvarp um hlutdeildarlán sem er ætlað að auðvelda tekju- og eignalitlum einstaklingum að eignast íbúð. Í umfjöllun Unu Jónsdóttur, hagfræðings, kemur m.a. fram að markhópurinn þurfi að vera vel skilgreindur og séð til þess að stuðningurinn fari ekki til annarra en hann er ætlaður.


Nánar

22. nóvember 2019 13:37

Ekki hægt að skipta 500 evru seðlum eftir 5. desember

Landsbankinn mun ekki taka við 500 evru seðlum frá og með 5. desember nk. en útgáfu 500 evru seðla hefur verið hætt. Áfram verður hægt að skipta 500 evru seðlum í bönkum á evrusvæðinu, samanber meðfylgjandi tilkynningu Seðlabanka Evrópu.


Nánar