Fréttir

05. mars 2015 14:45

Bættur hagur heimila og fyrirtækja með lægra olíuverði

Á opnum morgunfundi Markaða Landsbankans 5. mars kom fram að lækkun olíuverðs gæti haft umtalsverð áhrif á ráðstöfunartekjur íslenskra heimila. Sparnaður vegna bensínlækkunar eingöngu jafngilti 3% launahækkun hjá meðalmanni. Jafnframt munu aðstæður til reksturs fyrirtækja almennt batna og þjóðarbúið mun spara sér um 40 milljarða í gjaldeyri.

Í erindi Daníels Svavarssonar, forstöðumanns Hagfræðideildar Landsbankans, kom einnig fram að ef olíuverð helst á svipuðum slóðum verða áhrifin á hagvöxt umtalsverð. Þannig gæti 40-50 dala lækkun olíuverðs skilað 0,8-1 prósentu meiri hagvexti en ella á næstu tveimur árum. Lægra olíuverð hefði þegar valdið því að verðbólga hefur lækkað en án verðbreytinga á bensíni og dísilolíu hefði verðbólga í febrúar mælst 1,7% í stað 0,8%.

Fólk ferðast meira þegar olíuverð lækkar

Sigríður Hrefna Hrafnkelsdóttir, framkvæmdastjóri smásölusviðs Olís, sagði ljóst að lækkun olíuverðs hefði haft mikil áhrif á neytendur en á einu ári hefði útsöluverð á eldsneyti hjá Olís lækkað um ríflega 20%. Þessi lækkun á olíu hefði haft jákvæð áhrif á Olís. Ástæðan væri sú að fólk ferðast meira þegar olíuverð lækkar sem veldur því að meira er selt af eldsneyti. Einnig kemur fólk oftar á bensínstöðvar og það hefur valdið því að sala á vörum á bensínstöðvum hefur aukist.

Halldór Benjamín Þorbergsson, framkvæmdastjóri viðskiptaþróunar Icelandair Group hf., sagði að skammtímaáhrif af lækkun olíu á rekstur flugfélaga væru almennt lítil, einkum vegna þess að flugfélög hefðu komið sér upp eldsneytisverðsvörnum sem tryggðu þau fyrir sveiflum á olíuverði. Ef olíuverð héldist á svipuðum slóðum til framtíðar yrðu áhrifin á hinn bóginn veruleg.

Getur vel verið að olíuverð rjúki upp aftur

„Það er fullsnemmt að slá því föstu að olíuverð muni haldast á þessu verðbili. Þetta er svo sem enginn tombóluprís og það getur vel verið að það rjúki upp aftur. En við fögnum þessu á meðan það er, sagði Haukur Þór Hauksson, aðstoðarframkvæmdastjóri Samtaka fyrirtækja í sjávarútvegi (SFS).

Upptökur, glærusýningar og útdrættir úr erindum

02. júlí 2020 14:49

Landsbankinn styrkir fimmtán framúrskarandi námsmenn

Landsbankinn úthlutaði námsstyrkjum til fimmtán námsmanna úr Samfélagssjóði bankans þann 1. júlí sl. Styrkirnir voru veittir í þrítugasta og fyrsta skipti. Heildarupphæð námsstyrkjanna nemur sex milljónum króna. Alls bárust rúmlega 500 umsóknir í ár en Landsbankinn er eini bankinn sem veitir námsstyrki.


Nánar

29. júní 2020 18:24

Umræðan: Fjármálageirinn og loftslagsvandinn

Hlutverk fjármálageirans í baráttunni við loftslagsvandann er til umfjöllunar í nýrri greinaröð Ara Skúlasonar hagfræðings á Umræðunni. Landsbankinn telur mikilvægt að fjalla um loftslagsmál og hið mikilvæga hlutverk sem fjármálafyrirtæki og fjármálamarkaðir munu gegna í þeim breytingum sem framundan eru.


Nánar

29. júní 2020 10:48

Hagsjá: Vinnumarkaðskönnun - áframhaldandi merki um veikari vinnumarkað

Starfandi fólki hefur fækkað töluvert á undanförnum mánuðum. Þá hefur vinnutími líka styst, sem þýðir að fjöldi unninna stunda, eða vinnuaflsnotkun, hefur farið minnkandi. Sé vinnuaflsnotkun nú borin saman við stöðuna fyrir ári kemur í ljós að breytingin síðustu 3 mánuði er veruleg miðað við síðustu ár og allt fram á þetta ár þegar vinnuaflsnotkun var almennt að aukast. Í maí minnkaði vinnuaflsnotkun um 8,8% miðað við maí 2019, bæði vegna fækkunar starfandi fólks og styttri vinnutíma. Í apríl dróst vinnuaflsnotkunin hins vegar saman um rúm 13%, aðallega vegna fækkunar starfandi fólks, en vinnutími styttist einnig á milli ára.


Nánar

Skráðu þig á póstlista