Fréttir

30. apríl 2014 14:54

Ellefu framúrskarandi íþróttamenn fá afreksstyrk

Ellefu framúrskarandi íþróttamenn fengu í dag úthlutað þremur milljónum króna í afreksstyrki  úr Samfélagssjóði Landsbankans. Fjórir fengu 400.000 króna styrk, en þeir eru allir í fremstu röð íslenskra íþróttamanna og sjö afreksmenn framtíðarinnar fengu 200.000 króna styrk hver.

Þetta er í annað sinn sem Landsbankinn veitir afreksstyrki undir þessum formerkjum og bárust nú 177 umsóknir um þá.

Markmið styrkjanna er að styðja við bakið á afreksfólki sem iðkar einstaklings- eða paraíþróttir. Styrkirnar dreifast mjög vel milli íþróttagreina og félaga. Allir styrkþegar hafa náð langt og geta státað af framúrskarandi árangri bæði innanlands og á erlendum vettvangi. Tveir skíðamenn hljóta styrki að þessu sinni, á ári vetrarólympíuleika, en annar þeirra er fulltrúi alpagreina en hinn norræna skíðagreina.

Styrkirnir voru afhentir við athöfn í útibúi Landsbankans í Austurstræti.

Steinþór Pálsson, bankastjóri Landsbankans segir: „Landsbankinn hefur um árabil stutt dyggilega við íslenskt íþrótta- og æskulýðsstarf og afreksstyrkirnir eru mikilvæg viðbót við þann stuðning. Við leggjum áherslu á að styðja við þá sem þegar hafa náð langt en einnig við ungt og efnilegt íþróttafólk. Með því viljum við reyna að gera fleirum kleift að ná afburðaárangri á sínu sviði.”

Í dómnefnd afreksstyrkja sátu Þórdís Lilja Gísladóttir lektor við Háskólann í Reykjavík, sem jafnframt var formaður, Ómar Bragi Stefánsson verkefnastjóri hjá UMFÍ og Finnur Sveinsson, sérfræðingur Landsbankans í samfélagsábyrgð. Skipanin  er í samræmi við þá stefnu bankans að fagfólk utan hans myndi jafnan meirihluta í dómnefnd.

Eftirtaldir hlutu afreksstyrki að upphæð 400.000 kr.

  • Guðmundur Sverrisson, spjótkastari í ÍR
  • Helga María Vilhjálmsdóttir, skíðakona í ÍR
  • Kári Gunnarsson, badmintonmaður í TBR
  • Sævar Birgisson, skíðagöngumaður í Skíðafélagi Ólafsfjarðar 

Eftirtaldir hlutu afreksstyrki framtíðarinnar að upphæð 200.000 kr.

  • Anna Sólveig Snorradóttir, kylfingur í Golfklúbbnum Keili
  • Egill Blöndal, júdómaður í Ungmennafélagi Selfoss
  • Emil Tumi Víglundsson, hjólreiðamaður í Hjólreiðafélagi Reykjavíkur
  • Hilmar Örn Jónsson, skylmingamaður í FH
  • Íris Ósk Hilmarsdóttir, sundkona í Íþróttabandalagi Reykjanesbæjar
  • Kristmundur Gíslason, taekwondomaður í Íþrótta- og ungmennafélagi Keflavíkur
  • Norma Dögg Róbertsdóttir, fimleikakona í Gerplu

Samfélagssjóður Landsbankans veitir fimm tegundir styrkja á hverju ári: Námsstyrki, samfélagsstyrki, nýsköpunarstyrki, umhverfisstyrki og afreksstyrki.


06. febrúar 2020 16:17

Uppgjör Landsbankans fyrir árið 2019

Hagnaður Landsbankans á árinu 2019 nam 18,2 milljörðum króna, eftir skatta. Arðsemi eiginfjár Landsbankans var 7,5% á árinu 2019, samanborið við 8,2% arðsemi árið 2018. Arðsemi eiginfjár án bankaskatts var 9,2% en markmið bankans er að ná að lágmarki 10% arðsemi eiginfjár, að teknu tilliti til áhrifa bankaskatts.


Nánar

20. febrúar 2020 08:57

Lánasjóður sveitarfélaga gefur út græn skuldabréf

Lánasjóður sveitarfélaga lauk þann 19. febrúar 2020 lokuðu útboði á nýjum grænum skuldabréfum í flokknum LSS040440 GB. Markaðsviðskipti Landsbankans höfðu umsjón með sölu skuldabréfanna.


Nánar

19. febrúar 2020 10:25

Niðurstöður endurkaupatilboðs

Landsbankinn hf. tilkynnti í dag um niðurstöður endurkaupatilboðs sem tilkynnt var þann 11. febrúar 2020 til eigenda skuldabréfa í flokki EUR 500.000.000 1,625% á gjalddaga árið 2021 (ISIN: XS1490640288) þar sem bankinn bauðst til að kaupa skuldabréfin til baka gegn greiðslu reiðufjár. Endurkaupatilboðið byggði á skilmálum endurkaupatilboðs (e. tender offer memorandum) dagsett 11. febrúar 2020.
Nánar