Fréttir og útgáfuefni

- Fréttir og tilkynningar

Hömlur ehf. selur Pizza-pizza ehf.

Hömlur ehf., dótturfélag Landsbankans hf., hefur selt fyrirtækið Pizza-pizza ehf. til hóps fjárfesta undir forystu Birgis Þórs Bieltvedt sem átti hagstæðasta tilboðið í opnu söluferli. Söluverð alls hlutafjárins er 210 milljónir króna en að auki nema vaxtaberandi skuldir 350 milljónum króna. Salan og nýir kaupendur hafa verið samþykktir af Domino's Pizza International. Salan er með fyrirvara um samþykki Samkeppniseftirlitsins.

Pizza-pizza ehf. er umboðsaðili Domino's Pizza International á Íslandi og rekur 14 sölustaði undir vörumerki Domino's. Fyrsti Domino's staðurinn á Íslandi opnaði árið 1993 og hefur Domino's síðan verið leiðandi á pítsumarkaði á Íslandi. Starfsmenn félagsins eru um 340 í um 140 stöðugildum. Félagið hefur farið í gegnum fjárhagslega endurskipulagningu hjá Landsbankanum.

Fyrirtækjaráðgjöf Landsbankans hafði umsjón með söluferlinu sem hófst 12. maí 2011. Söluferlið var opið öllum áhugasömum fjárfestum sem stóðust hæfismat og gátu sýnt fram á fjárfestingargetu að lágmarki 300 milljónir króna. Margir sýndu fyrirtækinu áhuga og skiluðu 20 aðilar inn óskuldbindandi tilboði. Sex þeirra fengu aðgang að gagnaherbergi til að afla sér frekari upplýsinga um félagið og skiluðu allir bindandi tilboði.

Söluferli Pizza-pizza ehf. er í fullu samræmi við nýja stefnu Landsbankans um sölu á fullnustueignum.

Tindar verðbréf veitti nýjum eigendum Pizza-pizza ehf. ráðgjöf í söluferlinu.

Birgir Bieltvedt, forsvarsmaður nýrra eigenda Pizza-pizza ehf., stofnaði félagið 1993 og kom að rekstri þess fram til ársins 2005. Núna, sex árum seinna, kemur hann aftur að félaginu og kveðst "vera spenntur fyrir því að takast að nýju á við þetta verkefni og innleiða ýmsar nýjungar sem koma til með að styrkja félagið enn frekar og gera Domino's Pizza að leiðandi vörumerki á sínu sviði með gæði, þjónustu og stöðugleika að leiðarljósi."

Steinþór Pálsson, stjórnarformaður Hamla og bankastjóri Landsbankans segir: "Landsbankinn tók Pizza-pizza ehf. yfir í mars á þessu ári og hóf þá þegar að undirbúa sölu félagsins. Við erum sérstaklega ánægð með hversu hratt og vel söluferlið gekk fyrir sig og óskum félaginu og nýjum eigendum þess velfarnaðar."