Fréttir og útgáfuefni

- Fréttir og tilkynningar

Úthlutanir úr Menningarnæturpotti Landsbankans 2020

Alls fá 37 verkefni einstaklinga og hópa styrki úr Menningarnæturpotti Landsbankans í ár. Styrkirnir eru á bilinu 100 – 500 þúsund kr. og eru samtals rúmlega 8 milljónir króna. Starfshópur á vegum Reykjavíkurborgar valdi styrkþegana úr hópi 168 umsókna.

Menningarnótt, afmælishátíð Reykjavíkurborgar, er fyrir löngu búin að festa sig í sessi sem einn helsti menningarviðburður ársins. Til að stefna ekki of miklum mannfjölda saman verður hátíðin með breyttu sniði í ár og dreifist dagskráin á 10 daga, 13. – 23. ágúst.

Menningarnæturpotturinn er samstarfsverkefni Reykjavíkurborgar og Landsbankans sem hefur verið máttarstólpi Menningarnætur frá upphafi.

Styrkþegar Menningarnæturpotts Landsbankans 2020:

Styrkupphæð: 500.000 kr.

Margeir Steinar Ingólfsson

Karnival á Klapparstíg

Karnival á Klapparstíg er vin í miðborginni, hálfgerður ævintýraheimur þar sem gleði, heilun og tónlist sameinast í einu allsherjar dansmaraþoni. Ótal listamenn troða upp í bland við óvæntar uppákomur.


Styrkupphæð: 400.000 kr.

Lúðrasveit verkalýðsins

Lúðrasveitir berjast

Lúðrasveitir berjast er að skipa sér sess sem árlegur viðburður á Menningarnótt. Þar keppa lúðrasveitir höfuðborgarsvæðisins um "Monthlemminn" svokallaða.


Tónlistarborgin Reykjavík – í samstarfi við plötuverslanir í borginni

Elskum plötubúðir

Hljómplötuverslanir í Reykjavík, með stuðningi Tónlistarborgarinnar, bjóða upp á tónlistardagskrá. Dagskráin verður þannig uppbyggð að fólk geti farið á milli plötuverslana og þannig náð allri dagskránni á einum degi – eins konar mini-tónlistarhátíð í hvert sinn.


Styrkupphæð: 350.000 kr.

Hildur Yeoman

Hildur Yeoman á Menningarnótt

Sýning á Skólavörðustíg með dönsurum og tónlistarfólki. Markmiðið með verkefninu er listræns eðlis en einnig að nota tengslanetið til þess að setja upp skemmtilega sýningu. Fá fólk til þess að koma og njóta lífsins í miðbænum og efla rekstraraðila í kringum okkur.


Árni Sveinsson, Unnsteinn Manúel Stefánsson, Logi Pedro Stefánsson, Sigríður María Sigurjónsdóttir

Hverfishátíðin Bakgarðurinn

Hverfishátíð og tónleikar í bakgarði við Spítalastíg. Allt helsta tónlistarfólk hverfisins stígur á stokk og tekur nokkur lög. Dagskráin verður ekki auglýst.


Styrkupphæð: 300.000 kr.

Hrafnhildur Arnardóttir / Shoplifter

Krómalón – Hugleiðsluhellar / Litrófsmeðferð

Með innsetningunni Krómalón langar mig að bjóða gestum Menningarnætur að dvelja með sjálfum sér, umvafðir brjálaðri litagleði innsetningar sem gerð er úr einkennis-efnivið mínum; gervihári. Allt rýmið verður þakið litríku hári og er sjálfstætt framhald sýningarinnar Chromo Sapiens – þar gafst áhorfendum tækifæri til að ferðast um þrjár hvelfingar.


Gallery Port

Opin vinnustofa og tónlist

Verkefnið sem lagt er upp með er að skipuleggja viðburð sem mun eiga sér stað á milli Gallery Ports, Maclands og Bravó á Laugavegi. Sett verður upp opin vinnustofa með silkiþrykks-búnaði þar sem gestum og gangandi gefst kostur á að koma, velja sér myndefni sem listamenn Gallery Ports hafa undirbúið og prenta það á blöð, taupoka eða boli.


Hits & Tits

Úti-karókí: Hits&Tits

Hits & Tits standa fyrir hinu klassíska úti-karókí á Menningarnótt þar sem stuð og gleði ráða ríkjum í karókí-partýi um hábjartan dag.


Úlfur Eldjárn, Magnús Andersen, Kristján Freyr Einarsson

Reykjavík GPS í glugga

Þú notar snjallsíma til að hlusta á verkið og heyrir mismunandi kafla tónverksins eftir því hvar þú ert í bænum. Tónlistin breytist þannig á meðan þú röltir um götur miðbæjarins og hver hlustandi finnur sína leið í gegnum verkið.


Tanja Levý, Valdís Steinarsdóttir og Brauðtertufélag Erlu & Erlu

Brauðtertan lifir - ekki borða, bara horfa

Nokkrir listamenn skapa listaverk innblásin af brauðtertunni. Verkin verða til sýnis víðsvegar um miðborgina fyrir gesti og gangandi þá daga sem Menningarnótt stendur yfir. Brauðtertan er órjúfanlegur hluti af menningarsögu okkar og henni þarf að gera hátt undir höfði á þeim mikilvæga viðburði sem Menningarnótt er.


Styrkupphæð: 250.000 kr.

Grandi Mathöll

Fjölskyldufjör á Granda

Boðið verður upp á reglulega viðburði alla hátíðina, bæði inni og úti á Granda.


Eigið fé – Hlédís Sveinsdóttir

Matarmenningarhátíð 2020

Matarmenningarhátíð á Klambratúni helgina 15.-16. ágúst. Þar kemur saman úrval matarframleiðenda sem hafa tekið þátt í Götubitanum og Matarmarkaði Íslands. Hér leiðum við saman rjómann af smáframleiðendum í mat á landinu og sköpum einstaka stemningu á Klambratúni.


Omnom

Götugleði Omnom og vina

Borgarbúum og öðrum gestum er boðið á skemmtilega fjölskylduhátíð þar sem lögð verður áhersla á upplifun fyrir öll skilningarvit í sól- og skjólríka portinu við Hólmaslóð 2-4. Omnom mun leika á bragðlauka gesta með lystilega öðruvísi karnival ísréttum. Ýmsir vinir og grannar leika við hvurn sinn fingur og sirkuslistafólk leikur á gesti með trixi og gríni.


Götubiti – Robert Aron Magnusson

Matarmenningarhátíð á Klambratúni

Matarmenningarhátíð á Klambratúni helgina 15.-16 ágúst. Hér kemur saman úrval matarframleiðenda sem hafa tekið þátt í Götubitanum og Matarmarkaði Íslands. Hér finnum við rjómann af smáframleiðendum landsins á matvælum og úr verður einstök stemning á Klambratúni.


Magnús Andersen

Tilraunakennda portrett stúdíóið

Pop-up ljósmyndastúdíó í yfirgefnu verslunarrými í miðbænum. Þar býðst gestum og gangandi að koma í ókeypis portrettmyndatöku hjá atvinnuljósmyndara.


Improv Ísland

Spunamaraþon Improv Ísland

Spunamaraþonið er röð spunasýninga sem leikarar úr Improv-Ísland spinna út frá tillögum áhorfenda. Ný sýning hefst á hálftíma fresti og býðst gestum og gangandi að njóta sýninganna þeim að kostnaðarlausu.


Þóra Einarsdóttir og Peter Maté

Norrænar nætur – tónleikar

Tónleikar þar sem umfjöllunarefnið er norrænar nætur. Efnisskráin samanstendur af norrænum verkum fyrir söng og píanó, þar með töldum íslenskum sönglögum.


Dulmáni, Ós Pressan, Rockall

Speglatorg

Athyglisvert samspil samfélags og lista. Svið, opið almenningi sem samanstendur af tólf stórum speglum. Dagskrá yfir hátíðina, saman sett úr frjálsum og opnum uppákomum, fyrir allar tegundir skapandi lista.


Styrkupphæð: 200.000 kr.

Capoeira Mandinga á Íslandi

Hreyfingafestival 6 listahópa

Sex listahópar, sem eiga það sameiginlegt að ganga út frá taktfastri hreyfingu, verða með glæsilegar sýningar á Menningarnótt.


Sigríður Soffía Níelsdóttir

Eldblóm - flugeldagarðar

Í vetur hefur Sigga Soffía ræktað eldblóm fyrir flugeldagarða sem gróðusett verða í Öskjuhlíð og Árbæ og svo skotið upp síðsumars í formi flugelda á flugeldasýningu Menningarnætur.


Brynja Pétursdóttir

Dans Brynju Péturs: Street dans Carnival

Kraftmikil danssýning með hópi hæfileikaríkra street-dansara á öllum aldri. Fjölbreytt sýning með ólíkum dans-stíltegundum, mikilli orku og smitandi stemningu.


FAR Fest Afríka Reykjavík /Afrika Lole

FAR Fest Afríka Reykjavík

Afrísk-íslensk lista- og menningarhátíð. Listamenn í afrísku poppi, fönktónlist, reggietónlist og svo dunandi trommusláttur til að dansa við. Boðið verður upp á örtrommu- og dansnámskeið sem allir geta tekið þátt í.


ÞYKJÓ

Í felum

ÞYKJÓ er þverfaglegt hönnunarverkefni fyrir börn á sviði textíl-, leikfanga- og upplifunarhönnunar sem hefur það að markmiði að örva ímyndunarafl, sköpunarkraft og frjálsan leik barna.


Hlutmengi og Smekkleysa

Tónlist og hugleiðsla

Þrír viðburðir þar sem Mengi og Smekkleysa sameinast Systrasamlaginu og boðið verður upp á ókeypis tónleika í bland við hugleiðslu. Samtímis verður stuðlað að jafnvægi og heilun þar sem tónlist, djúpslökun og jóga vinna saman.


Miðstöð hönnunar og arkitektúrs // Hönnunarmiðstöð Íslands

Stefnumót við hönnuði

Stefnumót við hönnuði eru viðburðir á Menningarnótt þar sem hönnuðir halda myndræn ör-erindi um áhugaverð verkefni.


Dansverkstæðið

Danspartý á Dansverkstæðinu

Dansverkstæðið heldur danspartý fyrir unglinga föstudaginn 21. ágúst. Danspartý er undir áhrifum verksins Hlustunarpartý eftir Ásrúnu Magnúsdóttur. Ásrún samdi Hlustunarpartý með ungmennum á aldrinum 13 – 17 ára – þau koma einnig að þessum viðburði með Ásrúnu með undirbúningi stuttra uppákoma og atriða.


Styrkupphæð: 150.000 kr.

Lárus Blöndal Guðjónsson

Töfrar og blöðrur hjá Dillon

Grín, sirkus, töfrar og BINGÓ með Lalla töframanni.


Þorvaldur Sigurbjörn Helgason og Viktoría Blöndal

Ljóð í Gröndalshúsi

Ljóðskáldin Þorvaldur S. Helgason og Viktoría Blöndal ætla að standa fyrir ljóðakvöldi í Gröndalshúsi á Menningarnótt.


Erna Gunnarsdóttir og Othoniel Muñiz

Trampólín

Innsetningar, list og tónlist í sex daga á hátíðinni, á sérhönnuðu trampólíni.


Dansgarðurinn - Aude Busson

Paquita, Svanavatnið og Clouds

Sýnd verða brot úr frægum klassískum verkum í Safnahúsinu með nemendum úr sumarskóla Klassíska Listdansskólans.


Miðstöðin – unglingahljómsveitarstarf

Götutónleikar unglingahljómsveita

Hljómsveitirnar leika létta dagskrá af þekktum dægurlögum í bland við frumsamið efni. Um er að ræða hljómsveitirnar Karma Brigade, Dóra og Döðlurnar og hljómsveitina Vandamál.


Styrkupphæð: 100.000 kr.

Dúó Andante

Dúó Andante flytur ljúfa tóna

Dúó Andante mun flytja aðgengilega klassíska tónlist ásamt eigin útsetningum á gömlum íslenskum dægurlögum. Dúó Andante hefur áhuga á að halda þrenna tónleika á Menningarnótt sem verða ókeypis fyrir almenning.


Hermann Sæmundsson

Komið út úr skúrnum! – Hard Rock Café

Viðburðurinn er helgaður fullorðnum grasrótartónlistarmönnum sem hafa aðallega starfað í bílskúrum borgarinnar, en gleðjast yfir því að fá vettvang á Menningarnótt til að láta í sér heyra.


Steinunn Harðardóttir

dj. flugvél og geimskip spilar fyrir alla

dj. flugvél og geimskip heldur tónleika fyrir fólk og dýr. Tónleikarnir eru litríkir og glaðlegir og koma öllum í gott skap sem vilja láta hressa sig við.


Guðný Margrét Eyjólfsdóttir

Óli og Vinir 2020

Útiónleikar á Skólavörðuholti síðdegis 21. ágúst. Tónleikarnir eru haldnir í samstarfi við grasrótar-kollektívuna Póst-dreifingu.


Úlfur Eldjárn

Tónleikar í Mengi

Reykjavík GPS – tónleikar í Mengi á Menningarnótt.


Látún

Látún brassar upp stemningu í miðborginni

Balkan ska/fönksveitin Látún kemur fram á pop-up tónleikum í miðbæ Reykjavíkur og spilar sjóðheita frumsamda tónlist.

Forsíða - 30. júlí 2020 15:59

Uppgjör Landsbankans fyrir fyrri helming ársins 2020

Afkoma Landsbankans var neikvæð um 3,3 milljarða króna eftir skatta á fyrri helmingi ársins 2020 samanborið við 11,1 milljarðs króna hagnað á sama tímabili árið 2019. Virðisrýrnun útlána nam 13,4 milljörðum króna á tímabilinu sem jafngildir um 1,1% af útlánasafni bankans, samanborið við virðisrýrnun upp á 2,4 milljarða króna á sama tímabili í fyrra.


Nánar

Forsíða - 21. júlí 2020 12:54

Landsbankinn besti banki á Íslandi að mati Euromoney

Alþjóðlega fjármálatímaritið Euromoney hefur valið Landsbankann besta bankann á Íslandi og er þetta annað árið í röð sem bankinn hlýtur þessa viðurkenningu. Við útnefninguna er litið til ýmissa þátta í rekstri og stefnu bankanna, eins og afkomu af reglulegri starfsemi, kostnaðarhagræðingar og þjónustuframboðs.


Nánar

Fjárfestatengsl - 07. maí 2020 16:48

Uppgjör Landsbankans fyrir fyrstu þrjá mánuði ársins 2020

Afkoma Landsbankans var neikvæð um 3,6 milljarða króna eftir skatta á fyrstu þremur mánuðum ársins 2020, samanborið við 6,8 milljarða króna hagnað á sama tímabili árið 2019. Virðisrýrnun útlána nam 5,2 milljörðum króna á tímabilinu, samanborið við virðisrýrnun upp á 1 milljarð króna á sama tímabili í fyrra.


Nánar