Í stefnunni kemur fram að bankinn ætli að hafa forystu um að byggja upp velferð til framtíðar í íslensku samfélagi. Landsbankinn vill tryggja ávinning af rekstri sínum fyrir bæði samfélagið og hluthafa með því að flétta efnahags-, samfélags- og umhverfismálum saman við starfshætti bankans. Stefnan skal vera komin að fullu til framkvæmda eigi síðar en árið 2015. Til að ná þessu markmiði hefur Landsbankinn greint og markað sér stefnu í fimm megin málaflokkum til að innleiða samfélagslega ábyrgð í bankanum.

Nánar um samfélagsstefnu Landsbankans

Bankinn hefur birt opinberlega stjórnhætti sína og hefur kynnt gagnsæja stefnu um sölu á fullnustueignum bankans. 

Bankinn hefur einnig kynnt umhverfisvæna stefnu um samskipti við birgja.

Landsbankinn undirritaði nýverið Jafnréttissáttmála UN Women og UN Global Compact. Með undirskriftinni skuldbindur Landsbankinn sig til að vinna að bættum jafnréttissmálum innan fyrirtækisins og sýna samfélagslega ábyrgð. Í sáttmálanum eru sjö viðmið sem höfð eru að leiðarljósi til þess að efla konur innan fyrirtækja og til að auka þátt þeirra í atvinnulífinu.

Landsbankinn hefur jafnað kynjahlutföll stjórn bankans og í stjórnum dótturfélaga bankans. 

Landsbankinn vill verða leiðandi í því að koma atvinnulífinu af stað á ný og hefur komið á fót heildstæðri þjónustu fyrir nýsköpunar- og sprotafyrirtæki. Bankinn hóf nýverið samstarf við Innovit nýsköpunar- og frumkvöðlasetur um atvinnu- og nýsköpunarhelgar um land allt. 

Meginmarkmið samstarfsins er að efla frumkvöðlastarf og ýta undir atvinnusköpun á Íslandi. Atvinnu- og nýsköpunarhelgarnar eru hugsaðar sem vettvangur til að virkja einstaklinga og 

frumkvöðla til athafna með því að hvetja og aðstoða þátttakendur við framvindu viðskiptahugmynda.