Helstu hagtölur í síðustu viku

Peningastefnunefnd Seðlabanka Íslands ákvað í vikunni að halda vöxtum bankans óbreyttum. Þetta var í samræmi við væntingar, en allar opinberar spár gerðu ráð fyrir óbreyttum vöxtum.

Skráð atvinnuleysi í maí var 4,3% en atvinnuleysi hefur ekki mælst lægra síðan nóvember 2008. Atvinnuleysi lækkaði um 0,6% milli mánaða, en það er í samræmi við reynslu seinustu ára að atvinnuleysi lækkar yfirleitt milli apríl og maí. Alls voru 7.837 manns atvinnulausir í lok mánaðarins sem er fækkun um 506 milli mánaða og 2.107 milli ára.

Velta innlendra greiðslukorta í maí dróst saman um 0,3% að raunvirði miðað við sama mánuð árið áður. Velta innlendra greiðslukorta í verslunum innanlands, en það er sú tala sem hefur hvað mesta forspágildi um einkaneyslu, jókst hinsvegar um 0,5% miðað við sama mánuð árið áður. Þetta bendir til þess að hraður vöxtur einkaneyslunnar seinustu ára sé að gefa eftir.

Markaðshreyfingar í síðustu viku

Úrvalsvísitalan lækkaði um 0,6% í vikunni. Bréf í Össuri  (-4,0%) og Reginn (-3,3%) lækkuðu mest í kjölfar tilkynningar kauphallarinnar að þau bréf myndu falla úr út úrvalvísitölunni um næstu mánaðarmót. Mest hækkuðu bréf í TM (+2,5%) og Magar (+2,2%). 

Krónan veiktist lítillega í vikunni á móti evru og endaði vikunna í 160,7 (EURISK +0,7%). Gagnvart bandaríkjadal styrktist krónan hins vegar lítillega og endaði vikunna í 120,4 (USDISK -0,3%).

Þátttaka í gjaldeyrisútboði Seðlabanka Íslands var góð, en alls skiptu 9,9 ma. kr. um hendur. Til samanburðar hafa að meðaltali 6,6 ma. kr. skipt um hendur í í fyrstu þremur útboðum  ársins. Sér í lagi var þátttaka í  ríkisbréfaleiðinni betri en við eigum að venjast, en alls var tekið tilboðum að verðmæti 3,7 ma. kr. í þeirri leið í samanburði við 0,8 ma. kr. að meðaltali í fyrstu þremur útboðunum.

Vikan framundan

• Á þriðjudag birtir Þjóðskrá vísitölu íbúðarverðs á höfuðborgarsvæðinu.
• Á föstudag birtir Hagstofan mánaðarlega launavísitölu. Þann dag halda Lánamál Ríkisins útboð á ríkisbréfum.

Hagtölur 18. júní 2013

Markaðsupplýsingar 18. júní 2013

Mynd vikunnar

Það er viðtekin venja hér á landi að fjárlög halda ekki. Útgjaldaaukning frá fjárlagafrumvarpi til fjárlaga og síðan til fjáraukalaga og endanlegs ríkisreiknings er oft verleg og niðurstaða versnar oftar en ekki. Síðasti birti ríkisreikningur var fyrir árið 2011, en þá versnaði rekstrarhalli ríkisins um 43 ma. kr. frá fjáraukalögum. Á næstu vikum er von á ríkisreikningi fyrir árið 2012 sem mun sýna hvort árangur var ásættanlegur á árinu 2012. 

Á myndinni sjáum við samsetning á tekjujöfnuði ríkisins seinustu ár brotið niður á upphaflegt frumvarp til fjárlaga (appelsínugulu súlurnar), mun á samþykktum fjárlögum og frumvarpi fjármálaráðherra (bláu súlurnar), fjáraukalög (fjólubláu súlurnar) og loks mun á ríkisreikningi og fjáraukalögum (grænu súlurnar). Sjá nánar í Hagsjá frá 12. júní. 

Hvað fannst þér um þessa grein? Láttu okkur vita

Staða ríkisfjármála skiptir verulegu máli fyrir þróun íslensk efnahagslífs. Skuldastaða ríkisins er alvarleg og fáar tillögur virðast uppi til lausnar á þeirri stöðu. Mikils aðhalds hefur verið gætt í rekstri ríkisins á síðustu árum, en staðan er enn sú að um 15% tekna fara í vaxtagreiðslur. Skuldir og skuldbindingar ríkisins eru nú vel fyrir ofan eina landsframleiðslu og fara hækkandi. Því er mikilvægt að miklu aðhaldi verði beitt áfram og unnið markvisst að lækkun skulda.

Fjármögnun innlendra aðila á erlendum lánamörkuðum hefur ekki verið mikil á undanförnum árum, en sú viðleitni sem sést hefur í þeim efnum hefur gengið þokkalega. Þannig hafa bæði ávöxtunarkrafa og álag fyrir Ísland farið lækkandi. Ætla má að mikill agi í fjármálum ríkisins á síðustu árum hafi aukið tiltrú á íslensku efnahagslífi. Öll merki um tilslökun í fjármálum ríkisins gætu því stuðlað að lakari kjörum okkar á erlendum lánsfjármörkuðum, en kjör ríkisins á erlendum mörkuðum setja grunnkjör fyrir erlendar lántökur annarra innlendra aðila. 

Hagsjá: Mikilvægt að halda aðhaldi í ríkisfjármálum

Hvað fannst þér um þessa grein? Láttu okkur vita

Helstu hagtölur í síðustu viku

Landsframleiðsla á 1. ársfjórðungi jókst um 0,8% miðað við sama tíma í fyrra samkvæmt fyrsta mati Hagstofunnar sem birtist sl. föstudag. Einkaneyslan jókst um 0,8% og samneyslan um 0,9% milli ára. Dregið hefur úr vexti einkaneyslu að undanförnu. Fjárfesting dróst saman um 19,9% frá sama fjórðungi árið áður, samdrátturinn er að mestu vegna mikillar fjárfestingar í skipum og flugvélum á sama tíma í fyrra. Útflutningur jókst, að miklu leyti vegna aukningar ferðamanna, og innflutningur dróst saman og var 26,3 ma. kr. afgangur af vöruskiptum á fjórðungnum.

Viðskiptajöfnuður mældist hagstæður um 5,6 ma. kr. á 1. ársfjórðungi í samanburði við 45,6 ma. kr. neikvæðan jöfnuð á sama tímabil í fyrra. Án áhrifa innlánastofnana í slitameðferð var viðskiptajöfnuðurinn hagstæður um 14,4 ma. kr.

Vöruskipti við útlönd voru  óhagstæð um 6,6 ma. kr. samkvæmt bráðabirgðatölum sem Hagstofa Íslands birti í seinustu viku. Að því gefnu að Hagstofa endurskoði þessa tölu ekki upp á við, mun þetta vera mesti halli á vöruskiptum við útlönd á einum mánuði síðan í júní 2008, en þann mánuð var jöfnuðurinn neikvæður um 23 ma. kr.

Markaðshreyfingar í síðustu viku

Úrvalsvísitalan hækkaði um 0,6% í vikunni. Bréf í Fjarskipti (-3,3%) lækkuðu mest aðra vikuna í röð. Mest hækkuðu bréf í Reginn (+4,9%) og Icelandair (+2,9%). 

Krónan stóð nokkurn veginn í stað á móti evrunni (EUR/ISK +-0,1%)  í vikunni. Bandaríkjadalur veiktist í vikunni á móti evru (EUR/USD +1,7%) sem skilaði sér í styrkingu krónunnar á móti Bandaríkjadal (USD/ISK -1,6%). 

Krafan á óverðtryggðum skuldabréfum lækkaði í vikunni. Mest lækkaði krafan á RIKB14 (-0,20%) og RIKB 16 (-0,17%). Krafan á verðtryggðum bréfum hækkaði hins vegar.

Vikan framundan

• Í morgun birti Hagstofan upplýsingar um fjármál hins opinbera á fyrsta ársfjórðungi. Seinna í dag birta Lánamál ríkisins Markaðsupplýsingar.
• Á miðvikudag verður vaxtaákvörðun Peningastefnunefndar Seðlabanka Íslands birt. Hagfræðideild Landsbankans spáir óbreyttum stýrivöxtum.
• Á fimmtudag er útboð á ríkisvíxlum. Sama dag birtir Seðlabankinn upplýsingar um greiðslumiðlun og um gjaldeyrisforðann.
• Á föstudag birtir Vinnumálastofnun upplýsingar um skráð atvinnuleysi.

Hagtölur 10. júní 2013

Markaðsupplýsingar 10. júní 2013

Mynd vikunnar

Á mynd vikunnar sjáum við breytingu á landsframleiðslu frá sama fjórðungi árið áður. Samkvæmt fyrsta mati Hagstofunni var hagvöxtur á 1. fjórðungi 2013 0,8%. Spár um hagvöxt fyrir árið 2013 hafa farið lækkandi frá því í haust. Hagstofan, Seðlabankinn, ASÍ og viðskiptabankarnir þrír hafa allir lækkað hagvaxtarspár sínar og er meðaltal spáa 1,7% fyrir árið 2013. Sjá nánar í Hagsjá.

Hvað fannst þér um þessa grein? Láttu okkur vita

Hagfræðideild Landsbankans spáir því að stýrivöxtum verði haldið óbreyttum á fundi Peningastefnunefndar nk. miðvikudag. Bæði verðbólgustig og hagvöxtur um þessar mundir bjóða frekar upp á lækkun vaxta en hækkun og því er viðbúið að nefndin þurfi að lækka vexti þegar fram í sækir haldist verðbólgan lág áfram og hagvöxtur tekur ekki við sér á seinni helmingi ársins.

Nokkuð hefur slegið á væntingar í hagkerfinu og hagsvaxtarspár fyrir árið 2013 hafa farið lækkandi að undanförnu. Nýjar tölur Hagstofunnar um 0,8% hagvöxt á fyrsta ársfjórðungi eru í samræmi við það. Verulega hefur hægt á vexti einkaneyslu og samdráttur fjárfestingar er enn mikill.

Nýjar tölur um 6,6 ma. kr. halla á vöruviðskiptum við útlönd í maí eru í svipuðum anda. Þetta er mesti halli sem mælst hefur í einum mánuði frá því í júlí 2008. Til samanburðar var 4,9 ma. kr. afgangur af vöruskiptum í apríl. Breytingin skýrist bæði af samdrætti í útflutningi og auknum innflutningi milli mánaða.

Hagsjá: Verulegur samdráttur fjárfestingar

Hvað fannst þér um þessa grein? Láttu okkur vita

Þrátt fyrir reglubundnar fréttir um mikið fjör á fasteignamarkaði í einstökum vikum sýna tölur síðustu missera hægfara þróun upp á við og að hægt hefur á þeim vexti sem var á fyrstu árunum eftir hrun. Velta á markaðnum á höfuðborgarsvæðinu er mjög sveiflukennd milli vikna, en það sem af er þessu ári er sala húsnæðis 87% af meðaltali síðustu 10 ára, en um 60% af því sem var á árunum 2003-2007.

Verð fasteigna á höfuðborgarsvæðinu hefur verið tiltölulega stöðugt síðustu mánuði og hefur einungis hækkað um 0,6% frá áramótum. Raunverð sérbýlis á höfuðborgarsvæðinu er nú það sama og það var í upphafi árs 2011 og raunverð fjölbýlis um 3% hærra. Athygli vekur að undirgögn Hagstofu vegna vísitölu neysluverðs um hækkun markaðsverðs húsnæðis á höfuðborgarsvæðinu eru ívið hærri en tölur Þjóðskrár, sem safnar gögnum um íbúðaverð og birtir þau.

Hagsjá: Lítið að gerast á fasteignamarkaði

Hvað fannst þér um þessa grein? Láttu okkur vita