- Fréttir og tilkynningar
Hagfræðideild spáir 0,75 prósentustiga lækkun stýrivaxta
Í síðustu yfirlýsingu Peningastefnunefndar kom fram að nefndin telji að svigrúm sé enn til staðar til lækkunar stýrivaxta að því gefnu að gengi krónunnar haldist stöðugt og verðbólga hjaðni í samræmi við spár. Nýjasta verðbólgumæling Hagstofunnar og stöðugt gengi krónunnar undanfarinn mánuð sýnir að þetta svigrúm er fyrir hendi. Frá síðasta vaxtaákvörðunarfundi Seðlabankans 3. nóvember hefur þróun hagvísa ekki gefið tilefni til annars en að halda áfram á þeirri braut sem mörkuð var með 0,75 prósentustiga lækkun stýrivaxta í september. Þannig hefur viðskiptavegið meðalgengi krónunnar og skuldatryggingarálagið á íslenska ríkið haldist stöðugt þrátt fyrir töluverðar sviptingar á mörkuðum í Evrópu.
Hagfræðideild Landsbankans er sammála því mati Seðlabankastjóra að aðhaldsstig peningastefnunnar sé enn of hátt. Í ræðu hans á aðalfundi Sambands íslenskra sparisjóða kom fram að „miðað við slakann í hagkerfinu eru virkir raunstýrivextir sem nema á bilinu 2-2½% einfaldlega of háir eftir að markmið um gengisstöðugleika og verðbólgu hafa náðst“. Raunstýrivextir Seðlabankans m.v. mælda verðbólgu hafa verið að hækka á undanförnum mánuðum samfara hraðri hjöðnun verðbólgunnar og aðhaldsstigið hefur því aukist. Mikilvægt er að bregðast við því. Hagfræðideild Landsbankans telur að það verði gert með lækkun stýrivaxta um 0,75 prósentustig nú.
Næsti vaxtaákvörðunarfundur Seðlabankans hefur ekki verið tímasettur en líklegt má teljast að hann verði snemma í janúar. Verði 75 punkta lækkun núna ofan á mun bankinn engu að síður hafa nokkurt svigrúm áður en vaxtagólfinu verður náð.
Til baka
