Sjúkra- og slysatrygging

Allir sjálfstæðir atvinnurekendur verða að huga að persónulegum sjúkra- og slysatryggingum enda eiga þeir takmarkaðan bótarétt ef þeir slasast eða veikjast. Mikilvægt er að velja bætur sem nægja fyrir grunnframfærslu verði atvinnurekandi frá vinnu vegna slyss. Bætur slíkrar sjúkra- og slysatryggingar eru dagpeningar, örorkubætur og dánarbætur.

Ábyrgðartrygging

Ábyrgðartrygging atvinnurekstrar tekur til skaðabótaábyrgðar sem fellur á fyrirtæki vegna starfsemi þess og tekur bæði til líkamstjóna og skemmda á munum. Tryggingin er mjög mikilvæg fyrir öryggi í rekstri fyrirtækja. Skaðabótaábyrgð sem kann að falla á fyrirtæki vegna starfsemi þess getur haft mjög alvarleg áhrif á reksturinn ef trygging er ekki fyrir hendi sem tekur til slíkrar ábyrgðar.

Lausafjártrygging

Öll fyrirtæki ættu að hafa í huga að tryggja lausafjármuni sína. Lausafjártrygging er sniðin að þeirri þörf og bætir tjón á hvers kyns lausafé í eigu eða á ábyrgð fyrirtækisins, hvort sem eru vélar og tæki, lager, unnið og óunnið efni og aðra lausafjármuni. Bótasvið lausafjártryggingar er bruni en til viðbótar er hægt að tryggja gegn vatnstjónum og innbrotum. 

Launþegatrygging

Samkvæmt kjarasamningum ber vinnuveitendum að slysatryggja starfsmenn sína. Slysatygging launþega er nokkuð misjöfn eftir stéttarfélögum en almennt er um að ræða bætur vegna slysa sem verða í vinnu eða á leið til eða frá vinnu. Ef slysatrygging launþega er ekki gild er atvinnurekandi gerður ábyrgur fyrir greiðslu bóta sem launþegi á rétt á.