Kaupleigusamningar byggja á því að Landsbankinn kaupir tæki og leigir það til leigutaka sem greiðir það niður með leigugreiðslum í ákveðinn umsaminntíma. Landsbankinn er því eigandi tækisins á meðan á leigutíma stendur, en leigutaki hefur fullan umráðarétt yfir því á meðan.

Leigutaki tryggir tækið í sínu nafni og greiðir af því öll eðlileg gjöld, skatta og skyldur, eins og t.d. bifreiðagjöld og þungaskatt, ásamt öllum öðrum kostnaði sem kann að koma til  vegna viðgerða og/eða skemmda.

Með kaupleigu skuldbindurleigutaki sig til að kaupa tækið í lok samningstíma á fyrirfram ákveðnu lokaverði, sem er yfirleitt 1% til 3% af upphaflegum leigugrunni.

Þegar atvinnutæki er tekið á kaupleigu er það eignfært í bókum leigutaka á leigutímanum og getur hann því fært afskriftir til gjalda ásamt vöxtum og kostnaði af leigugreiðslum. Hann fær þó ekki eignarhald í atvinnutækinu fyrr en við lokagreiðslu.

Landsbankinn greiðir kaupverðið án virðisaukaskatts. Leigan reiknast af kaupverði án virðisaukaskatts en leigutaki greiðir allan virðisaukaskattinn til seljanda strax í upphafi. Leigutakinn fær virðisaukaskattinn endurgreiddan sé hann með virðisaukaskattskyldan rekstur. Því leggst enginn virðisaukaskattur ofan á leigugreiðslur.