Fyrsti vaxtadagur

Fyrsti vaxtadagur er upphafsdagur lánstímans, dagurinn þegar lántaki fær andvirði lánsins afhent.

Fyrsti gjalddagi

Fyrsti gjalddagi er dagsetning fyrstu greiðslu. Fyrsti gjalddagi er almennt mánuði eftir fyrsta vaxtadag, en stundum er samið um annað. Hér má stilla fyrsta gjalddaga til að reikna með. Hann verður þó alltaf að vera síðar en fyrsti vaxtadagur.

Lánstími

Lánstíminn er tíminn frá fyrsta vaxtadegi til síðasta gjalddaga, í mánuðum talið.

Þar af afborgunarlaust

Hægt er að haga lánagreiðslum þannig að í fyrstu séu ekki greiddar neinar afborganir á gjalddögum, heldur aðeins vextir og greiðslugjald. Slíkir gjalddagar nefnast vaxtagjalddagar.

Ef vaxtagjalddagar eru notaðir, þá dreifist greiðsla höfuðstóls á þá venjulegu gjalddaga sem eftir eru. Afborganir af höfuðstóli verða því hærri á hverjum venjulegum gjalddaga, til að bæta það upp að ekkert var borgað af höfuðstólnum í fyrstu.

Þar af greiðslulaust

Hægt er að gera afborgunarlausu gjalddagana, eða einhvern hluta þeirra, líka vaxtalausa, og þar með alveg greiðslulausa. Þannig falla nokkrir fyrstu gjalddagarnir alfarið niður.

Þeir vextir sem hefðu átt að greiðast á þessum gjalddögum dreifast þess í stað á þá gjalddaga sem eftir eru. Þannig verka þessir uppsöfnuðu vextir eins og aukning í eftirstöðvum, nema hvað vextir og verðbætur reiknast ekki á þessar auknu eftirstöðvar. (Gengisþróun getur hins vegar haft áhrif á verðgildi þeirra í krónum, í lánum sem tekin eru í erlendum myntum).

Greiðslubil

Algengast er að greiðslur af láni fari fram mánaðarlega. Hægt er að hafa fleiri en einn mánuð á milli greiðslna, en bilið hleypur alltaf á heilum mánuðum. Lánstíminn er þetta bil, margfaldað með fjölda gjalddaga:

Lánstími = Greiðslubil × Fjöldi gjalddaga

Lánsupphæð

Upphæð lánsins er upphaflegur höfuðstóll þess.

Af þessari upphæð dregst upphafskostnaður lánsins (stimpilgjald, lántökugjald og útgáfa skuldabréfs), og þannig fæst út andvirði lánsins: sú fjárhæð sem lántaki fær afhenta við upphaf lánstímans.

Vextir á ári

Ársvextir láns (í prósentum), þ.e. nafnvextir, tákna hversu mikla vexti (í krónum) þyrfti að borga af höfuðstólnum á einu ári, ef hann breyttist ekkert yfir árið:

Vaxtagreiðsla á ári = Höfuðstóll × Ársvextir

eða á mánaðarlegum gjalddögum:

Vaxtagreiðsla á mánuði = Höfuðstóll × Ársvextir / 12

Í vaxtatöflu Landsbankans birtast þeir ársvextir sem gilda um skuldabréfalán í hinum ýmsu kjörvaxtaflokkum á hverjum tíma.

Verðbólguspá

Í verðtryggðu láni fara greiðslurnar eftir efnahagsþróun, og ekki er hægt að vita hana fyrir. Lánareiknirinn gerir því ráð fyrir tiltekinni verðbólguprósentu („verðbólguspá“) til að spá fyrir um verðbæturnar. Hér má stilla verðbólguspána; sjálfgefna gildið 0% er aðeins gefið sem dæmi.