Fjármögnunarmöguleikar

Þú ert með frábæra viðskiptahugmynd og hefur sett upp sterka viðskiptaáætlun. Til að koma í veg fyrir fjárþurrð á fyrstu mánuðunum fórstu vel yfir allar áætlanir um stofn- og rekstarkostnað nýja fyrirtækisins. Það er ekki ósennilegt að þú þurfir aukið stofn- eða veltufé til að koma fyrirtækinu af stað. Þar sem það getur verið erfitt að sækja aukið fjármagn inn í fyrirtækið þarftu að vera vel upplýst/ur um allar þær leiðir sem þú getur farið til að afla fjármagns.

Líklega þarftu fyrst og fremst að leita að fé í eigin vösum við stofnun fyrirtækisins, en vinna svo hratt í að skapa fyrstu sölutekjurnar. Þar sem viðskiptahugmyndir eru misflóknar og miskrefjandi í framkvæmd getur verið nauðsynlegt að fá lán frá öðrum inn í fyrirtækið eða fjárfesta í því. Fjölskylda og vinir geta verið þér innan handar, en einnig kemur til greina að sækja um styrki eða greiðslur úr hinum ýmsu sjóðum sem standa frumkvöðlum til boða. Þegar þú hefur komið rekstrinum af stað og ert farinn að skapa fyrirtækinu tekjur er mun líklegra að þú getir sótt um bankalán og/eða laðað að fjárfesta.

• Eigið fé
• Sölutekjur
• Fjölskylda og vinir
• Styrkir og sjóðir
• Nýsköpunarlán
• Fjárfestingarumhverfið og fjárfestar

 

Eigið fé

Eigið fé er þín fjárfesting í verkefninu. Ef þú hefur trú á viðskiptahugmyndinni og fjárfestir þínu eigin fé í verkefninu er líklegra að bankar og fjárfestar séu tilbúnir til að gera slíkt hið sama. Eigið fé dregur einnig úr þörfinni fyrir bankalán sem getur verið íþyngjandi fyrir lítil fyrirtæki á fyrstu rekstrarárunum.

Nýsköpunarlán

Viðskiptavinum sem eru með góða viðskiptahugmynd og vilja vinna að nýsköpun stendur til boða yfirdráttarlán á hagstæðari vaxtakjörum en á hefðbundnu yfirdráttarláni. Lánin eru m.a. ætluð til tækjakaupa, kaupa á hugbúnaði, þátttöku á námskeiðum, kaupa á sérfræðiþjónustu og þátttöku í vörusýningum.

Nánar um nýsköpunarlán

Sölutekjur

Sum fyrirtæki setja alla áherslu á að hanna, þróa og framleiða vöruna. Þau geta lent í því að markaðurinn viti lítið um vöruna eða ávinninginn sem hún getur fært viðskiptavinum. Önnur fyrirtæki átta sig á mikilvægi markaðsmála og verja því hluta af tímanum í pakkningu vörunnar og kynningu fyrir markaðnum. Þessi fyrirtæki eru dugleg í að sýna og segja frá vörunni.

Þú verður að selja til að skapa sölutekjur. Þó svo að þú komir til með að verja meiri tíma í markaðsmálin er þeim tíma vel varið - þú verður að verja hluta af tímanum í að eiga bein samskipti við viðskiptavini. Sölutekjur munu ekki skila sér inn í fyrirtækið fyrr en salan hefur átt sér stað. Því verður þú að koma þér upp skilvirku markaðs- og söluferli þar sem þú sérð fyrir þér framleiðslu, markaðssetningu og sölu sem eitt heilsteypt ferli sem hefur skýran upphafs- og endadag.

Styrkir og sjóðir

Stuðningsumhverfi frumkvöðla hefur breyst mikið til batnaðar á undanförnum árum. Fjölmargir aðilar, s.s. ríki, sveitarfélög og fyrirtæki hafa unnið ötullega að uppbyggingu frumkvöðlasetra, námsefnis, sjóða, styrkja og annars sem frumkvöðlar þurfa á að halda. Stuðningurinn spannar nú allt frá mótun viðskiptahugmyndar til verkefna er tengjast innri og ytri vexti fyrirtækisins.

Styrkjaumhverfið er afar fjölbreytt og fer það eftir eðli verkefnisins til hvaða sjóða þú getur leitað eftir styrkjum. Frumkvöðlasetur, fyrirtæki, ráðuneyti, sjóðir og stofnanir hafa sett inn á vefsvæði sín yfirlit og umsóknir fyrir sjóði og styrki sem mikilvægt er að kynna sér.

Listi yfir fjölmarga styrki

Fjárfestingarumhverfið og fjárfestar

Fjárfesta er víða að finna, bæði á Íslandi og erlendis. Að undirbúa fyrirtækið og gera það að aðlaðandi fjárfestingarkosti er krefjandi verkefni sem kallar á sérfræðiþekkingu. Því er ráðlagt að nýta sér reynslu og aðstoð sérfræðinga hjá þar til bærum aðila eins og Landsbankanum. Einnig bjóða frumkvöðlasetrin upp á margvíslega faglega aðstoð sem mikilvægt er að nýta sér.

Það getur tekið tíma og reynst erfitt að ná inn fjármagni í gegnum fjárfesta. Hluti af vandanum getur legið í tímasetningu. Frumkvöðlar kvarta undan því að fjárfestar komi of seint inn í ferlið og það tefji vöxt fyrirtækisins. Fjárfestar telja að ekki sé grundvöllur fyrir því að stíga inn í fyrirtæki með áhættufjármagn fyrr en reksturinn er kominn á gott skrið og nýta eigi vaxtatækifæri s.s. með sókn á erlenda markaði. Ef þú vilt höfða til fjárfesta þarftu að finna leiðir til að lágmarka áhættu og hámarka ávöxtun.

Listi yfir fjárfesta

Fjölskylda og vinir

Fjölskylda og vinir geta verið traustir bakhjarlar, ekki eingöngu sem aðilar sem þú getur leitað ráða hjá heldur einnig eftir fjármagni. Að leita til fjölskyldu og vina ætti ekki að vera feimnismál heldur jafn eðlilegt og að sækja um styrk úr sjóði, fé frá fjárfestum eða bankalán hjá Landsbankanum. Þó ferlið sé einfaldara þá ættir þú að bera jafn mikla virðingu fyrir slíkri bón og bera þig eins að.

Mikilvægt er að kynna vel viðskiptahugmyndina og viðskiptaáætlunina og selja fjölskyldunni ávinninginn á að taka þátt í verkefninu með þér. Þeim mun meiri vinnu sem þú setur í undirbúning og framkvæmd kynningarinnar, þeim mun líklegra er að fjölskylda og vinir séu tilbúin til að aðstoða þig.

Verðu ávallt góðum tíma í að undirbúa þig. Áður en þú semur við fjölskyldu eða vini þarftu að vera búin/n að afla þér upplýsinga um ávöxtunarkröfur fjárfesta og vexti af bankalánum. Ef þú sækist eftir láni, gerðu þá áætlun um hvernig þú munir greiða lánið til baka og á hvaða vöxtum.