Fréttir

14. mars 2012 20:10

Landsbankinn selur 5% hlut í Marel fyrir 5,2 milljarða króna

Útboði á allt að 5% eignarhlut Landsbankans hf. í Marel hf. lauk klukkan 16:00 í dag, miðvikudaginn 14. mars 2012. Markaðsviðskipti Landsbankans höfðu umsjón með útboðinu fyrir hönd Landsbankans.

Eftirspurn í útboðinu var mjög góð og óskuðu fjárfestar eftir því að kaupa 74,3 milljónir hluta í Marel, eða sem nemur um 10,1% af heildarhlutafé Marel. Tilboð bárust í hluti á bilinu 138-142 krónur á hlut, en 88% af fjárhæð tilboða var á genginu 142 krónur á hlut.

Sölugengi í útboðinu var ákvarðað 142 krónur á hlut. Heildarnafnverð samþykktra tilboða, eftir skerðingu, var 36.778.455 hlutur eða sem samsvarar 5% af heildarhlutafé Marel. Heildarsöluverðmæti samþykktra tilboða, eftir skerðingu, í útboðinu var því rúmlega 5,2 milljarðar króna.

Öll samþykkt tilboð voru boðin fjárfestum á sama gengi, þar sem lægsta samþykkta gengi réð sölugenginu. Samþykkt tilboð sem bárust á sama gengi og sölugengi voru skert sem nam umframeftirspurn, en þó aldrei niður fyrir 100.000 hluti að nafnverði á hvern fjárfesti. Skerðingin var 52% á þann fjölda hluta  sem voru umfram 100.000 hluti að nafnverði. Tilboðum sem bárust á lægra gengi en sölugengi var hafnað.

Steinþór Pálsson, bankastjóri Landsbankans:
„Marel er eitt öflugasta fyrirtæki á Íslandi og hefur verið skráð í Kauphöll frá árinu 1992. Mikil eftirspurn fjárfesta í útboðinu er einkar ánægjuleg, en Landsbankinn hefur verið stór hluthafi í Marel undanfarin ár og hefur sú eign skilað bankanum góðri ávöxtun. Við hlökkum til að vinna áfram með Marel sem lánveitandi og viðskiptabanki félagsins og taka með þeim hætti þátt í að tryggja áframhaldandi vöxt og viðgang félagsins.“

Útboðið fór fram dagana 13. og 14. mars 2012 og var fjárfestum boðið að gera tilboð í að lágmarki 100.000 hluti að nafnverði í Marel á verðbilinu 138-142 krónur á hlut.

Viðskiptadagur útboðsins er 14. mars 2012 og greiðslu- og afhendingardagur vegna viðskiptanna er mánudagurinn 19. mars 2012.

Útboðið fór fram í samræmi við útboðsskilmála sem birtir voru í fréttakerfi NASDAQ OMX á Íslandi hf. og á vefsíðu Landsbankans, www.landsbankinn.is þann 12. mars 2012. Í útboðinu var nýtt undanþáguheimild frá útgáfu lýsingar, í samræmi við heimild í c-lið. 1. töluliðar, 1. málsgreinar 50. greinar laga nr. 108/2007, um verðbréfaviðskipti.

30. október 2014 14:36

Landsbankinn hf. stækkar flokk sértryggðra skuldabréfa

Landsbankinn hf. hefur í dag lokið sölu á sértryggðum skuldabréfum sem eru viðbót við LBANK CB 17, áður útgefinn flokk af hálfu bankans. Útgáfan er stækkuð um 1.200 m.kr. á ávöxtunarkröfunni 6,3%. Áður hafði Landsbankinn gefið út 200 m.kr. í sama flokki og nemur því heildarstærð flokksins 1.400 m.kr.


Nánar

30. október 2014 09:55

Landsbankinn þátttakandi í Arctic Circle ráðstefnunni

Landsbankinn verður bakhjarl og virkur þátttakandi á Arctic Circle ráðstefnunni um framtíð norðurslóða, sem haldin verður í Hörpu dagana 31. október-2. nóvember. Undir merkjum Arctic Circle starfa jafnt fræðimenn, þjóðarleiðtogar og innlendar og erlendar stofnanir og fyrirtæki að málefnum norðurslóða.


Nánar

30. október 2014 08:48

Hagsjá: Landspítalinn – nokkrar tölulegar staðreyndir

Landspítalinn Háskólasjúkrahús er mikið til umræðu um þessar mundir í skugga læknaverkfalls og mikillar umræðu um stöðu spítalans. Í þessari Hagsjá er fjallað um nokkrar tölulegar staðreyndir um stöðu spítalans og þróun hans á síðustu árum.


Nánar