Fréttir

12. mars 2012 16:55

Sala á Horni fjárfestingarfélagi hf.

Landsbankinn hefur unnið markvisst að því að selja eignarhluti í félögum í óskyldum rekstri. Horn fjárfestingarfélag hf. sem er 100% í eigu bankans heldur á nokkrum fjölda hlutabréfa í innlendum og erlendum félögum auk annarra eigna. Til að framfylgja stefnu bankans þá hefur verið til skoðunar að selja Horn með því að skrá félagið í Kauphöll.

Við skoðun á þeim kosti að skrá félagið hefur verið rætt við stærri fjárfesta. Áhugi þeirra á kaupum á hlutum í félaginu er umtalsverður enda Horn öflugt félag sem hefur skilað góðri arðsemi til eigandans frá stofnun félagsins. Hinsvegar er óvíst að Landsbankinn muni ná því markmiði að selja 80% - 90% hlut í félaginu á skömmum tíma með skráningu í Kauphöll.

Því hefur verið ákveðið að kanna fleiri leiðir varðandi sölu á Horni. Við þá vinnu verður lögð áherslu á að hámarka virði eignarhluta bankans í félögum, ásamt því markmiði að draga úr vægi hlutabréfaeignar í félögum í ótengdum rekstri á efnahagsreikningi bankans. Stefnt er að því að ljúka þessari stefnumótun á næstu vikum og upplýsa þá hvaða leið verður farin.

Heildareignir Horns eru um 30 ma.kr. og eigið fé um 24 ma.kr. Rekstur Horns fjárfestingarfélags hf. gekk mjög vel á árinu 2011 og mun félagið birta ársreikning innan skamms.