Fréttir

28. febrúar 2012 16:32

Árangursrík Atvinnu- og nýsköpunarhelgi á Akureyri

Atvinnu- og nýsköpunarhelgi fór fram á Akureyri 24.-26. febrúar síðastliðinn í samstarfi við Akureyrarstofu, Háskólann á Akureyri og Tækifæri fjárfestingasjóð. Landsbankinn og Innovit standa fyrir Atvinnu- og nýsköpunarhelgunum og er markmiðið að skapa vettvang fyrir nýsköpun og efla þannig atvinnusköpun í landinu.

Yfir þrjátíu hugmyndir voru kynntar á föstudagskvöld og unnu níutíu þátttakendur að þróun um tuttugu viðskiptahugmynda yfir helgina. Þátttakendur unnu í hópum og fengu aðstoð fjölda leiðbeinanda við framgang viðskiptahugmynda. Að auki voru flutt gagnleg erindi um hvernig hægt væri að koma hugmyndum í framkvæmd. Nítján vinnuhópar kynntu niðurstöður helgarinnar á sunnudeginum.

Veittar voru viðurkenningar og peningaverðlaun í nokkrum flokkum:

  • Viðskiptahugmyndin "Whale buddy" hlaut fyrstu verðlaun auk verðlauna fyrir bestu kynninguna. Um er að ræða snjalltækjaforrit sem nýtist bæði við leiðsögn í hvalaskoðun og gagnaöflunar í atvinnugreininni.
  • Önnur verðlaun og jafnframt verðlaunin „Val fólksins“ hlaut "Life line" fyrir viðskiptahugmynd að öryggisbúnaði í flotgöllum sjómanna og gæsluliða.
  • Þriðju verðlaun hlaut hugmyndin um tannstöngla úr íslenskum stráum: "Tannstrá".
  • Sú viðskiptahugmynd sem þótti líklegast til árangurs á svæðinu var "Orkulundur – heilsukaffihús og veitingastaður á Akureyri".
  • Hópurinn sem var talinn ná mestum árangri yfir helgina stóð að "Fjölskyldulínunni – stuðningur við uppalendur".

Þátttakendur sem hlutu viðurkenningar fengu peningaverðlaun, samtals að fjárhæð 1.500.000 kr., fyrir tilstuðlan fyrirtækja af svæðinu.

Fjölmörg fyrirtæki og stofnanir á svæðinu studdu viðburðinn og lögðu sitt af mörkum til að helgin væri sem glæsilegust.

Það er von Landsbankans, Innovit, og Akureyrarbæjar að sem flestar þeirra hugmynda sem fram komu verði að verðmætum fyrirtækjum þegar fram líða stundir.

Atvinnu- og nýsköpunarhelgarnar eru að erlendri fyrirmynd, en "Start-up weekend", eru haldnar víða um heim. Fyrirhugað er að halda nokkrar slíkar helgar til viðbótar í vetur.

Nánari upplýsingar um helgarnar og skráningu má finna á www.anh.is.

Stuðningsaðilar (í engri sérstakri röð): Atvinnuþróunarfélag Eyjafjarðar, Samtök iðnaðarins, Blikkrás ehf., Stefna hugbúnaðarhús, Kjarnafæði, Norðlenska, Norlandair, Grand Þvottur ehf., Alcoa, Bílaleiga Akureyrar, Vífilfell, Lostæti veislu- og veitingaþjónusta, Kexsmiðjan, Vís, Kristjánsbakarí, MS, Rafeyri, Eimskip, Kone, Frost, Samherji, Slippurinn, Norðurorka, Raftákn.

29. september 2014 14:07

Hagsjá: Fasteignamarkaður í jafnvægi – en óvissa framundan

Ýmsir hefðbundnir mælikvarðar benda til þess að ágætt jafnvægi ríkir á fasteignamarkaði höfuðborgarsvæðisins. Þetta jafnvægi er hins vegar brothætt og það er töluverð óvissa framundan.


Nánar

29. september 2014 10:29

Vikubyrjun: mánudagurinn 29. september

Vísitala neysluverðs lækkaði um 0,12% milli mánaða. Þetta var undir væntingum, en við höfðum gert ráð fyrir 0,2% hækkun. Langmest munar um að flugfargjöld til útlanda lækkuðu um tæp 30% sem hafði -0,5% áhrif á vísitöluna. Ársverðbólgan mælist 1,8% í september, í samanburði við 2,2% í ágúst og hefur verið undir verðbólgumarkmiði Seðlabankans í átta mánuði samfellt.


Nánar

26. september 2014 16:03

Ráðstefna: Er danska leiðin sú rétta?

Á ráðstefnu Landsbankans um íbúðalán 25. september 2014 var fjallað um íbúðalánakerfið og þær hugmyndir sem eru uppi um breytingar á því. Sumir frummælanda voru á því að danska leiðin, eða útfærsla á henni, væri rétta leiðin fyrir Ísland. Aðrir sögðu enga þörf fyrir grundvallarbreytingar á íslenska húsnæðiskerfinu.


Nánar