Sértæk skuldaaðlögun er aðeins ætluð þeim einstaklingum sem eru í verulegum greiðsluerfiðleikum og ljóst þykir að vægari úrræði dugi ekki til að leysa vanda þeirra til langframa.

Skilyrði er að hjón eða sambúðaraðilar séu báðir aðilar að samningi um sértæka skuldaaðlögun.

Í hnotskurn

• Sértæk skuldaaðlögun er ætluð einstaklingum í miklum greiðsluerfiðleikum, með skuldir umfram eignir en geta samkvæmt greiðsluerfiðleikamati greitt af lánum sem nema allt að 100% af verðmæti eigna. Sé greiðslugeta ekki næg er heimilt að greiða að lágmarki 70% af markaðsvirði fasteignar og 100% af markaðsvirði bifreiðar á samningstímanum.
• Skuldir sem nema frá 70-100% veðhlutfalli eru þá settar í biðlán til þriggja ára án vaxta og verðbóta. Afborganir af biðláni hefjast aftur að samningstíma liðnum.
• Skuldir sem eru umfram 100% af virði íbúðarhúsnæðis og utan greiðslugetu falla niður í lok samningstíma standi einstaklingur við samkomulagið.

Sértæk skuldaaðlögun kemur aðeins til greina ef sýnt þykir að vægari úrræði Landsbankans duga ekki til að rétta af fjárhagsstöðu lántaka og fyrirséð er að viðkomandi geti ekki staðið í skilum af lánum sínum til langframa. Landsbankinn mun framkvæma mat á greiðslugetu og ef matið leiðir í ljós að vægari úrræði duga ekki til og að lántaki uppfyllir skilyrði fyrir sértæka skuldaaðlögun er reynt að ná samkomulagi við alla kröfuhafa um að aðlaga skuldir og eignir lántaka að greiðslugetu hans.

Dæmi um uppstillingu á sértækri skuldaaðlögun

Dæmi 1

Lántaki á eign sem er metin á 30 milljónir króna en heildarskuldir hans eru 38 milljónir. Hann hefur einungis greiðslugetu sem nemur 100% af verðmæti fasteignar og bifreiða. Þær skuldir sem eru umfram greiðslugetu lántaka eru settar sem biðlán og verða afskrifaðar að samningstíma loknum.

Dæmi 2

Lántaki á eign sem er metin á 25 milljónir króna en heildarskuldir hans eru 31 milljón. Hann hefur einungis greiðslugetu sem nemur 72% af verðmæti fasteignar og 100% af verðmæti bifreiðar. Lán sem nemur 28% af verðmæti fasteignar er sett á biðlán til þriggja ára og verður tekið til greiðslu að samningstíma loknum. Þær skuldir sem eru umfram 100% veðsetningu fasteignar og bifreiðar eru settar sem samningskröfur og verða afskrifaðar að samningstíma loknum.

Dæmi 3

Lántaki á eign sem er metin á 35 milljónir, en heildarskuldir hans eru 45 milljónir. Hann hefur greiðslugetu upp á 200 þús. á mánuði. Þar af fara 164 þús. í afborganir af lánum sem nema 100% af markaðsvirði fasteignar og bifreiðar, en 36. þús. er ráðstafað til mánaðarlegrar greiðslu samningskrafna (veðskuldir umfram 100% af markaðsverðmæti fasteignar og bifreiðar, yfirdráttarlán og aðrar lausaskuldir). Að samningstíma loknum verða eftirstöðvar smaningskrafna felldar niður.

Hér má finna samkomulagið um sértæka skuldaaðlögun sem var undirritað 22. desember 2010, en samkomulagið verður endurskoðað í síðasta lagi fyrir lok árs 2012.

Hvernig sæki ég um sértæka skuldaaðlögun?

Samkvæmt samkomulagi um sértæka skuldaaðlögun skal sækja um úrræðið hjá þeim viðskiptabanka eða sparisjóði sem er aðalviðskiptabanki lántaka og er þá átt við þann banka þar sem launavelta lántaka er.

Hægt er að sækja um í öllum útibúum Landsbankans auk þess sem hægt er að fá senda umsókn um greiðslumat með því að fylla út umbeðnar upplýsingar.

Umsókn verður send á uppgefið netfang. Umsókninni þarf að skila útfylltri og undirritaðri í næsta útibú Landsbankans ásamt fylgigögnum.

Þau gögn sem þarf að skila inn vegna umsóknar greiðslumat eru:

• Staðfest afrit af síðustu þremur skattaskýrslum, hægt að prenta út á www.rsk.is
• Útprentun frá innheimtumanni ríkissjóðs, fáanleg hjá Tollstjóranum í Reykjavík eða sýslumönnum, einnig hægt að prenta út á www.skattur.is (skattar og opinber gjöld)
• Staðfesting á eftirstöðvum og greiðslubyrði allra lána
• Staðfesting á tekjum síðustu sex mánaða
• Upplýsingar um ábyrgðir sem viðkomandi er í vegna þriðja aðila