Hlaupandi meðaltöl eru ein helsta aðferðin sem beitt er við kortalestur og þau eru einfaldlega, eins og nafnið segir, meðaltöl lokaverðs á markaði yfir tiltekið tímabil. Til dæmis nær 10 daga hlaupandi meðaltal af verði hlutabréfs til lokaverðs 10 síðustu daga. Þegar nýr dagur bætist við fellur sá aftasti af. Hlaupandi meðaltölunum er hægt að beita á hvaða tímasviði sem er, allt frá mánaðakortum til fimm mínútna korta. Þau allra lengstu ná til 200 eða jafnvel 400 síðustu tímabila (t.d. er 200 daga hlaupandi meðaltal algengt á dagkortum) og þau stystu ná til þriggja tímabila. Til eru bæði einföld hlaupandi meðaltöl (e. Simple Moving Averages, SMA) og veldisvegin hlaupandi meðaltöl (e. Exponential Moving Averages). Í þeim fyrrnefndu hefur hvert tímabil jafnt vægi (10 daga meðaltal er t.d. summan af lokaverði 10 síðustu daga deilt með 10) en í veldisvegnum meðaltölum er lögð meiri vigt á síðustu tímabilin. Veldisvegin meðaltöl fylgja því breytingum frá einu tímabili til annars nokkru betur en einföldu meðaltölin.
Mælikvarðar af ýmsu tagi sem reiknaðir eru eftir verði og veltu á markaði eru nefndir tæknivísar (e. chart indicators). Þá má greina í tvo meginbálka og hlaupandi meðaltölin eru annar þeirra. Í hinum flokknum eru svonefndir sveifluvísar (e. oscillators). Hlaupandi meðaltölin eru mjög gagnleg til að skilgreina stefnu markaðsins og breytingar á henni. Eðli málsins samkvæmt jafna meðaltölin út flökt í verði og þannig kemur stefnan skýrar í ljós. Aldrei má þó gleyma að þau eru tafinn mælikvarði, þ.e. nýjasta gildið reiknast eftir tölum liðins tíma og þess vegna tekur sinn tíma fyrir breytingu á stefnu verðsins að koma í ljós. Hlaupandi meðaltöl geta líka virkað sem stuðningslínur (gólf) og viðnámslínur (loft), rétt eins og stefnulínur geta gert. Jafnan þarf að hafa hugfast að hlaupandi meðaltöl eru best í því að skilgreina stefnu upp eða niður og gera viðvart er breytingar verða á henni, en þau eru haldlítil ef stefnan er lárétt og verðið sveiflast um lárétta línu.
Þegar stefnan er lárétt kemur til skjalanna síðari flokkur tæknivísa, svonefndir sveifluvísar. Þeir sýna best þegar hlutabréfin eru að nálgast efri mörk verðbilsins eða neðri mörk þess. Styrkur þeirra er að vísa til hvenær hlutabréfin eru ,,yfirkeypt“ eða ,,yfirseld“ (e. overbought, oversold). Til að endurtaka, hlaupandi meðaltöl nýtast best þegar markaðurinn stefnir upp eða niður og sveifluvísar best þegar hann færist aðeins út á hlið. Auk þess er sá grundvallarmunur á þessum tveimur gerðum kortavísa að sveifluvísarnir fela í sér sýn á hvað gæti gerst á næstunni en það má alls ekki ætla hlaupandi meðaltölunum. Þau ,,elta“ stefnuna og varða hana þannig en sveifluvísarnir ganga upp og niður og gefa þannig aðvörun um að hlutabréfin hafi sveiflast of skart upp eða of skart niður. Með þeim hætti má stundum sjá fyrir viðsnúning í stefnu markaðsins áður en hann raunverulega verður.
Lagalegur fyrirvari
Þær upplýsingar sem er að finna á þessu vefsvæði eru unnar af starfsmönnum Landsbankans og eru þær eingöngu veittar í upplýsinga- og fræðsluskyni. Upplýsingarnar fela ekki í sér ráðgjöf um fjármál einstaklinga eða fjárfestingaráðgjöf. Lesa allan fyrirvarann
