Olíuverð (West Texas Intermediate Continuous Futures) hefur hækkað um 40% á hálfu ári og þar af 25% síðustu þrjá mánuðina. Hrávörur eftir vísitölu Reuters/Jefferies CRB hafa hækkað um 33% á hálfu ári og 10% á síðustu þremur mánuðum. Þessi hækkun hefur leitt til þess að verðbólga er vaxandi alls staðar í heiminum og seðlabankar víða um lönd hafa hækkað viðmiðunarvexti fyrr en ella. Fimmtudaginn 7. apríl hækkaði Evrópski seðlabankinn vexti sína í 1,25% úr 1%. Breski seðlabankinn hélt vöxtum óbreyttum í 0,5% með ákvörðun sama dag. Verðbólga mælist rétt undir 5% í Bretlandi og yfir 5% í Kína. Á Indlandi mælist almenn verðbólga yfir 8% en matvæli hafa hækkað yfir 10% síðustu tólf mánuði. Kortið sýnir hlutabréfavísitölu bandarískra flugfélaga en rekstur þeirra er viðkvæmur fyrir eldneytisverði. Hlutabréfin hafa lækkað um tæp 20% á sama tíma og olíuverð í Bandaríkjunum hækkar um 40%. Verð á hlutabréfum hækkar lítillega í Asíu í 14. viku en í Vesturheimi gætir lækkunar. Lækkunin er væg en kortin lýsa ekki lengur af sömu bjartsýni og eftir krappan snúning frá lággildi um miðjan mars 2011.

Mynd 1 Verð á hlutabréfum bandarískra flugfélaga tekur að falla í byrjun nóvember 2010. Samtals er lækkun frá þeim tíma nærri 20% en í febrúar, mars og apríl 2011 herðir á henni. 

Hækkun Seðlabanka Evrópu á viðmiðunarvöxtum í 1,25% var í samræmi við væntingar á markaði.  Hana ber að á sama sólarhring og aðeins skömmu eftir að stjórnvöld í Portúgal óska formlega eftir fjárhagsaðstoð frá Evrópusambandinu með sama hætti og Grikkir og Írar höfðu gert áður. Skuldavandi Evrópuþjóða ágerist enn og raddir þeirra sem telja að að allur vandi sé enn ekki kominn í ljós verða æ meira áberandi.

Áhrifa af miklum hækkunum orkuverðs og hrávöruverðs gætir í vaxandi mæli í viðskiptum með hlutabréf á Vesturlöndum. Mynd 1 sýnir hlutabréf í bandarrískum flugfélögum á vikukorti og lækkandi verð í nærri sex mánuði. Að því leyti til líkist ferillinn síðasta hálfa árið lækkun hlutabréfa á markaði í Brasilíu og á Indlandi og jafnvel í Kína, þessum sterku vígjum alþjóðlegra hlutabréfa þar sem verð í apríl 2011 er 5 til 10% lægra en hágildi í byrjun nóvember 2010. Kort á mynd 1 sýnir að 13 vikna meðaltalið mun skera niður í gegnum 34 vikna meðaltalið í næstu viku og hlutabréf flugfélaga eru þar með komin á rautt ljós í litakerfi okkar. Hlutabréf flugfélaga eru ekki leiðandi í sama skilningi og við á um tæknifyrirtæki og fjármálafyrirtæki en skynsamlegt er að taka fullt mark á framvindu þar vegna næmni fyrir hækkandi orkuverði.

Hver er staðan? Ekki eru miklar breytingar í litakerfinu eftir fremur rólega viku

Hlutabréf á Indlandi eru ekki á meðal þeirra sterkustu um þessar mundir en í litakerfinu færist þó kauphöllin í Bombai af gulu ljósi á grænt. Aðrir mælikvarðar í töflu 1 sýna veikleika hlutabréfa á Indlandi þrátt fyrir grænt ljós. RS ST sýnir -4% og hlutabréfin eru enn 5,2% undir verðinu í upphafi árs 2011 og 7% frá hágildi í nóvember 2010. Japan er á gulu ljósi en við blasir að það breytist í rautt í 15. viku. Skýringin er lækkun á markaði í Tokíó eftir jarðskjálftann í mars og hörmungar sem fylgt hafa í kjölfarið. Þá er græna ljósið í Sao Paulo í Brasilíu orðið æði dauflegt. Aðeins þarf litla verðlækkun hlutabréfa svo að gult taki við af grænu.

Tafla 1 í 14. viku sýnir að öðru leyti væga lækkun í Vesturheimi en hún kom til að mestu í lok vikunnar eftir að lokað var í Evrópu og í Asíu. Hvað við tekur í 15. viku þegar kauphallir opna í austri er ekki ljóst. Hækkandi orku- og hrávöruverð, vaxandi verðbólga og skuldavandi mikilvægra ríkja, allt frá Japönum til Evrópuþjóða og Bandaríkjamanna, vofa yfir markaðnum. Á hinn bóginn taka uppgjör að berast fyrir fyrsta fjórðung 2011 í 15. viku. Almennt er búist við góðum uppgjörum skráðra fyrirtækja í Bandaríkjunum. Ef til vill reynast þau nægilega góð til að glæða eftirspurn og auka gleði í brjóstum fjárfesta á nýjan leik.

Tafla 1 Hægar breytingar eru á verði hlutabréfa og skuldabréfa í 14. viku, hækkun í Asíu en lækkun í Vesturheimi. Olía, hrávörur, gull og silfur halda áfram að rjúka.

Þáttur olíuverðs og hrávöruverðs á fjármálamarkaði og tímatenging árin 2007 og 2008

Olíuverð hefur hækkað um 40% á hálfu ári eins og fyrr segir og 25% síðustu þrjá mánuði. Mánaðakort á mynd 2 sýnir hækkun eftir veldisferli eða "parabolic rise" á máli tæknigreiningar. Parabóluhækkun getur ekki varað lengi. Kortið á mynd 2 sýnir tvö dæmi frá árunum 2007 og 2008. Frá ársbyrjun 2007 hækkaði olía eftir parabóluferli sem endaði með flatri aðlögun á fjórða fjórðungi það ár er verð á alþjóðlegum hlutabréfum tók að steypast. Síðan hélt olíuverð áfram að rjúka á fyrsta fjórðungi 2008 eftir nýjum parabóluferli. Honum lauk eftir 40 til 50% hækkun um mitt ár 2008 í aðdraganda hruns á fjármálamarkaði í september og október um haustið.

Mynd 2 Olíuverð var á bilinu 70 til 85 dollarar fatið frá miðju ári 2009 til haustsins 2010. Veldishækkun frá þeim tíma mun að líkindum stöðvast á næstu vikum.

Dæmin tvö um veldishækkun frá 2007 og 2008 sýna að henni lýkur annaðhvort með flötum grunni til aðlögunar eða með toppi og snúningi frá hágildi, oft kröppum. Líkur benda til að veldishækkun frá október 2010 taki senn enda en ekki er auðvelt að sjá fyrir hvort við tekur aðlögun þar sem verð breytist lítið um nokkurra vikna eða mánaða skeið – eða toppur og snúningur frá hágildi. Í ljósi þess að heimsbúskapurinn er enn á fyrri hluta nýs hagvaxtarskeiðs virðist fyrri leiðin ekki síður líkleg.

Wall Street sýnir merki um veikleika eftir mikla hækkun frá lággildi um miðjan mars

Dagkort af S&P 500 á mynd 3 sýnir að viðnám við gildið 1340 stöðvar hækkunarferil frá miðjum mars 2011. Skottið á rauðu súlunni föstudaginn 8. apríl hvílir á 13 daga línunni og engin hætta er á ferðum haldist verðið áfram ofan við hana. Það verður þó að segjast að hvern dag í 14. viku tekur við lægra lággildi og svo er að sjá að bjarndýrið hafi hafið hramminn á loft. Ugglaust hafði sín áhrif á föstudaginn 8. apríl að samstaða hafði ekki náðst á Bandaríkjaþingi um fjárlög og niðurskurð útgjalda. Samkomulag náðist að kvöldi þess dags en löngu eftir að kaupmenn á Wall Street voru komnir til síns heima og teknir að njóta helgarinnar.
 

Mynd 3 Hátt verð á olíu (purpuralínan í glugganum) og hrávörum tekur sinn toll af vísitölu stórfyrirtækja á Wall Street. Flest merki eru til hækkunar – en ljóst er að viðnámsblokkin frá hágildi þann 18. febrúar 2011 er þung fyrirstaða fyrir hækkandi verði.

Mynd 4 Vísitala hrávöruverðs hefur hækkað um 33% frá miðju ári 2010. Viðnám við gildið 300 (lægstu gildi 2006 og 2007) eða við 350 (hágildi 2006) höfðu ekki áhrif til hægingar á hækkunarhraðanum.

Mánaðakortið á mynd 4 sýnir hrávöruverðsvísitölu Reuters/Jefferies CRB sem er útbreidd og kunnust á sínu sviði. Margt bendir til þess að senn fari að hægja á hækkunarhraða vísitölunnar en núverandi verð mun engu að síður höggva skarð í hagnað framleiðslufyrirtækja og valda almennum verðhækkunum í iðnríkjum hvar sem er í heiminum. Sem dæmi má nefna að Kínverjar hafa greint frá því að jöfnuður í vöruskiptum við útlönd hafi verið neikvæður um 1,02 milljarða USD á fyrsta fjórðungi 2011 og mun það vera í fyrsta sinn á sjö árum sem halli er í ársfjórðungstölum þeirra. Á móti kemur að hagnaður af hækkandi hrávöruverði rennur til hrávöruframleiðenda – en síðan kemur að því að hátt verð slær á eftirspurn og jafnvægi tekst á ný.

Heimsvísitala hlutabréfa hægir á sér og myndar neikvæð frávik við MACD; verð á skuldabréfum fellur hratt

Heimsvísitala Dow Jones á mánaðakorti á mynd 5 sýnir hliðstæða veikingu og S&P 500 á dagkorti á mynd 3. Í MACD glugganum er sýndur mismunur þriggja og sjö mánaða meðaltala sem svara til 15 og 35 vikna meðaltala (nálægt 13 og 34 vikum). Þótt neikvæð frávik milli vísitölunnar og MACD séu ekki sterk eru þau engu að síður fyrir hendi. MACD línan sjálf hefur lækkað í dýfunni í febrúar og mars.

Mynd 5 Á mánaðakorti hægir á hækkunarhraða heimsvísitölu Dow Jones. Fyrri hluti ársins 2010 er erfiður með hátt í 20% lækkun frá hágildi í apríl. Meginhluti lækkunar vorið 2010 var í maí.

Þótt verð á hlutabréfum haldi áfram að þokast upp í 14. viku víða um lönd nema í Vesturheimi virðist eins og blikur séu á lofti. Mynd 6 sýnir enn eitt mánaðakortið til að gefa yfirsýn um framvindu á löngu árabili. Litakortið í töflu 1 hefur sýnt óverðtryggðu bandarísku ríkisskuldabréfin á rauðu ljósi um margra vikna skeið. Gengistap vegna hækkunar á ávöxtunarkröfu á markaði er meiri en sem nemur áunnum vöxtum óverðtryggðra skuldabréfa.
Kortið á mynd 6 sýnir mikla lækkun á verði ríkisskuldabréfa með lánstíma yfir 20 ár á síðari hluta árs 2010. Í febrúar og mars 2011 tekur við hækkun sem sýnist ekki mikilvæg á þessu langa korti þótt hún hafi numið 7 til 8% en lækkun í apríl hefur fært gildið aftur niður fyrir 90.

Af kortinu á mynd 6 er augljóst að stuðningur í grennd við gildið 90 af stefnulínu sem nær allt aftur til ársins 2006 er mikill. Lengra kort sýnar raunar að stuðningslína sem liggur með nokkru minni halla en sú á kortinu á mynd 6 nær 20 ár aftur í tímann til ársins 1991. Af þessum ástæðum er ekki líklegt að hún rofni á næstu vikum. Gerist það engu að síður er það vegna þess að vextir á markaði hækka meira en væntingar standa til um þessar mundir og gæti leitt til þess að lengstu skuldabréf lækki í verði verulega umfram það sem þegar er orðið.

Mynd 6 TLT, kauphallarsjóðurinn sem speglar bandarísk ríkisskuldabréf með meðaltíma 20 ár eða lengri. Lækkun frá miðju ári 2010 er umtalsverð – og gæti orðið meiri ef stuðningur í grennd við gildið 90 rofnar á næstunni.
 

Hvað fannst þér um þessa grein? Láttu okkur vita

Hlutabréf hækkuðu um allan heim í sjöundu viku 2011 eftir snúning frá lággildi í Asíu þegar viðskipti hófust í Kína á nýju ári kanínunnar miðvikudaginn 9. febrúar sl. Myndin sýnir sleitulausa hækkun S&P500 frá ágústlokum ef dýfan í nóvember er undanskilin (bláa línan) og Sensex 30 vísitöluna í Bombai á Indlandi. Nóvemberdýfa þeirrar síðarnefndu er djúp enda hækkun frá septemberbyrjun meiri. Báðar vísitölur eru með rokur í desember – en svo skilja leiðir með Wall Street og Bombai. Sensex lækkar frá opnun í janúar 2011 í 17.500 úr 20.500 eða um 14% en stórfyrirtækin á Wall Street hækka um 6%. Frávikið er yfir 25% sem er mikið í ljósi þess að fylgni vísitalna á hlutabréfamarkaði er oft góð. Munu Indland og Suður-Asía draga heimsmarkað hlutabréfa niður með sér eða hefur kröftugur snúningur frá lágildi í Asíulöndum áhrif til að lengja í hækkunarskeiðinu á Vesturlöndum?

- - - - - - - - - - - - - - -

Sjöunda vika 2011 er óvenjuleg á alþjóðlegum hlutabréfamarkaði vegna þess hve hækkun hlutabréfa er víðtæk. Hún nær til allra landa nema Rússlands þar sem lækkun er 0,9%. Mest er hækkun í Thailandi og Indónesíu um 4,8% og 3,9% en í Brasilíu og Kína er hækkun 3,5% og 2,6%. Ekki leikur vafi á að snúningur til hækkunar varð í Asíu á síðustu tveimur vikum og nær til málma og hrávöru og olíu eins og fjórða blokkin í töflu 1 hér á eftir sýnir. Hækkun á silfri er 7,7% í vikunni. Heimsvísitala Dow Jones hækkar um 1,77% í sjöundu viku 2011 og hefur hækkað um 6,8% á árinu.

Hlutabréfamarkaður er margslunginn. Viss freisting er að líta svo á að hrein og bein hækkun sé framundan fyrst kauphallir í öllum heimsálfum slá saman í takt. Nú þegar er rætt í heimspressunni um að tíu ára tímabil af láréttum bylgjum á Wall Street (sjá mynd 1) sé að baki. S&P 500 vísitala stórfyrirtækja á Wall Street muni skjótast upp fyrir hágildið við 1.550 og geysast áfram upp í heiðan himinn (e. blue sky break out). Til upprifjunar má geta þess að hágildi S&P 500 árið 2000 var 1.550 og þá tók við 50 til 60% lækkun á 36 mánuðum. Næsta hágildi var í október 2007 við 1.565 og þá tók við um 60%
  

Mynd 1 Tekst S&P 500 að gera fleyg upp í heiðan heiminn og skjótast yfir blokkina við 1550 á allra næstu mánuðum? Hver veit. MACD (3,7) gildið liggur í 63,5 sem er hærra en nokkru sinni frá árinu 1999.

lækkun á 18 mánuðum. Föstudaginn 18. febrúar var lokavildi vísitölunnar 1343,01 eftir 1,04% hækkun í vikunni. Tafla 1 sýnir að lokagildið 1343,01 liggur 14% undir hágildi allra tíma frá október 2007.

Þessi sýn á framtíðina í hlutabréfum er  heillandi og ekki síst á vordögum með hækkandi sól eftir langan og strangan vetur á Vesturlöndum. Hlutabréf ganga jafnan í bylgjum. Jafnvel þótt við geysumst ekki í einum rykk alla leið yfir hágildi S&P 500 við 1565 er hugsanlegt að viðnám þar sem nær allt aftur til ársins 2000 springi á næstu misserum eftir 15 til 20% hækkun á hlutabréfum stórfyrirtækjanna.

Er leiðrétting á verði hlutabréfa í Asíu frá áramótum upphafið á langri dýfu?

Annar kostur er að lækkun hlutabréfa í Suður-Asíukauphöllum síðustu mánuði sé ekki aðeins skammvinn leiðrétting sem nú er á enda heldur byrjun á lengri dýfu. Rokan í febrúar sé viðbrögð við of skjótri lækkun á stuttum tíma (e. short term oversold). Eftirspurn þorni upp fljótlega og við taki lækkun á ný. Sú lækkun dragi á endanum hlutabréf á Vesturlöndum með sér í leiðréttingu eftir nær samfellt hækkunarskeið frá ágústlokum 2010. Tekið skal fram að Brasilía og gullnámufyrirtæki hafa fylgt Asíukauphöllum síðustu vikur, niður í dýfunni frá desember 2010 og upp aftur eftir snúning frá lággildi í janúar.

Mynd 2 sýnir Sensex 30 vísitöluna á Indlandi sem tvöfaldast í verði á tólf mánuðum frá mars 2009. Þótt þau hlutabréf hafi tekið roku haustið 2010 úr 18.000 í 21.000 liggur gildi vísitölunnar á ný við 18.000. 

Mynd 2 Hlutabréf í Sensex 30 vísitölunni í Bombai tvöfölduðust í verði á tólf mánuðum frá mars 2009. Haustið 2010 bættist enn við hækkun frá 18.000 til 21.000 en nú verðið við 18.000 enn á ný.

MACD línan (13,34) sýnir ískyggileg neikvæð frávik (sjá dagbók Rose mánudaginn 14. febrúar 2011). Kortið á mynd 2 sýnir að Sensex er hársbreidd frá því að fara á rautt ljós. MACD (13,34) línan er rétt við að fara niður fyrir núll. Allt þetta gæti bent til þess að frekari dýfa sé framundan á Indlandi. Til að rífa hlutabréf upp úr 15% lækkun frá nóvember 2010 þarf mjög mikinn kraft í eftirspurn til viðbótar við síðustu mánuði. Lítum til Brasilíu, annars af fjórum BRIC löndum, til að huga að ástandinu þar.

Hlutabréf í Brasilíu eru í líkri stöðu og í Bombai: snúningur frá lokum janúar

Kauphöllin í Sao Paulo er fjórða stærsta í Norður- og Rómönsku Ameríku á eftir NYSE, Nasdaq og Toronto í Kanada. Markaðsverðmæti hlutabréfa þar í lok nóvember 2010 nam 1.447 milljörðum USD og er lítið eitt hærra en í Deutsche Börse í Frankfurt í Þýskalandi. Markaðsverðmæti hlutabréfa í Sao Paulo er um 2,7% af heildarverðmæti skráðra hlutabréfa í veröldinni en til samanburðar er verðmæti hlutabréfa í kauphöllinni í Shanghai í Kína um 5% af verðmæti skráðra hlutabréfa alls. Auk þess að vera eitt fjögurra BRIC ríkja er hlutverk Brasilíu á heimsmarkaði hlutabréfa mikilvægt og vaxandi.

Samanburður á myndum 2 og 3 sýnir að mikil fylgni er á milli hlutabréfa á Indlandi og í Brasilíu. Hlutabréf í Brasilíu sitja enn undir hágildi frá apríllokum 2010 og hafa ekki náð hærra svo að heitið geti. Hlutabréf á Indlandi rjúka eins og fyrr segir yfir aprílhágildið 2010 síðar um sumarið en liggja um miðjan febrúar 2011 rétt við það gildi.

Mynd 3 Hlutabréf í Bovespa vísitölunni í Sao Paulo í Brasilíu hækkuðu á þrettán mánuðum frá mars 2009 um nærri því 100%. MACD sýnir alvarleg neikvæð frávik og hlutabréfin eru á gulu ljósi frá því í janúar sl.

Bæði kortin á myndum 2 og 3 sýna sterk neikvæð frávik á vikukorti á milli MACD (13,34) línu og hlutabréfaverðs. Bæði Indland og Brasilía eru á gulu ljósi í töflu 1. Báðar vísitölur hafa gefið eftir verulega í samanburði við S&P 500 stórfyrirtækin á Wall Street. Það er alveg ljóst að eftirspurn eftir hlutabréfum í BRIC löndum þarf að aukast til muna eigi þau ekki að draga niður heimsmarkaðinn allan. Fylgjumst grannt með hvað gerist í Suður-Asíu og í Brasilíu á næstunni. Frávik á milli vísitalna hlutabréfa frá mismunandi heimssvæðum getur myndast og fylgni raskast um skeið. Sagan sýnir að slík frávik vara ekki lengi og fyrr en varir leitar stefnan um allan heimsmarkaðinn í sömu átt.

Tafla 1 sýnir víðtæka hækkun hlutabréfa og hrávöru um allan heim

Það er fátítt að allar 22 landavísitölur hlutabréfa í töflu 1 sýni hækkun nema ein (Rússland). Þessi niðurstaða í lok sjöundu viku 2011 sýnir einfaldlega að mikið fé streymir til kaupa á hlutabréfum um allan  heim þannig að eftirspurn er umfram framboð. Sumar aðrar vísbendingar sýna líka að krafturinn í hækkun hlutabréfa í Bandaríkjunum er meiri um þessar mundir en um margra ára skeið. MACD (3,7) línan á mánaðakortinu á mynd 1 hefur ekki verið hærri síðan árið 1999 eða í tólf ár. Reynsla hækkunarbylgju hlutabréfa 2003 til 2007 sýnir okkur að á slíkum tíma geta komið fram frávik í hækkun á milli heimssvæða eða mismunandi kauphalla eins og gerst hefur núna.

Tafla 1 Orkufyrirtæki í Bandaríkjunum sýna mesta hækkun frá áramótum (12,8%) en hlutabréf í Madrid á Spáni eru í öðru sæti (11,7%).

Silfur hækkar mest í vikunni eða 7,7%. Málmar, hrávörur og orka af ýmsu tagi hafa hækkað mikið á síðustu vikum. Sú hækkun er almennt til marks um að væntingar séu um aukinn hagvöxt og meiri eftirspurn. Spákaupmenn fjárfesta á þessum markaði og af því hlýst stundum meiri hækkun en sem nemur raunverulegri eftirspurn vegna framleiðslukerfisins. Forvitnilegt er að líta nánar á hrávöruvísitölu Reuters/Jefferies sem er einn besti mælikvarði á hrávörueftirspurn sem völ er á.

Hrávöruvísitala Reuters/Jefferies sýnir kröppustu hækkun síðan rétt fyrir hrun

Kortið á mynd 4 hefur verið sett nákvæmlega eins og þau á myndum 1 til 3 nema hvað mynd 4 sýnir sex ára tímabil. Hrávöruhækkun frá miðju ári 2010 á sér ekki fordæmi annað en síðustu tólf mánuði fyrir hrun. Á miðju því tímabili, þ.e. í lok október 2007, náðu hlutabréf á Vesturlöndum hágildi allra tíma og í kjölfarið fylgdi 50 til 70% lækkun á 18 mánuðum.

Mynd 4 CRB vísitala hrávöruverðs náði hágildi allra tíma um mitt árið 2008, þremur mánuðum fyrir hrunið á fjármálamarkaði á Vesturlöndum.

Hækkun CRB vísitölunnar frá miðju ári 2010 er í 340 frá 260 eða liðlega 30%. Vísitalan á fyrir höndum að rekast á viðnám við gildið 360 frá árinu 2006 en þangað er um 6% leið. Við lokun föstudaginn 18. febrúar 2011 hafði 50% af lækkun vísitölunnar á árinu 2008 unnist til baka (sjá mynd 5). Viðnámsblokk liggur við gildið 360 frá árinu 2006 og alkunna er að mikinn kraft þarf að komast í gegnum Fibonacci gildin frá 50% endurheimtu til 62% endurheimtu.
 

Mynd 5 CRB vísitalan og 57% lækkun hennar á árinu 2008. Við lokun föstudaginn 18. febrúar hafði helmingur af þeirri lækkun unnist til baka.

Allt þetta ásamt því hve mikinn kraft þarf til að knýja áfram hækkun hlutabréfanna í BRIC löndunum eins og sýnt var hér fyrir framan bendir vissulega til þess að hægja kunni á hækkun hlutabréfa jafnt sem hrávöruverðs á næstu vikum. Tæknigreining getur aldrei sagt okkur hvað gerist á næstunni, aðeins hvað líklegt er að gerist. Vissulega eru til í sögunni tímabil þar sem hlutabréf hækka án afláts og hrávörur og orkuverð með. Til að greina framvinduna sem best þurfum við að vakta vel hrávöruverð og hlutabréfaverð í BRIC löndunum. Þar kann að leynast lykillinn að því hvenær næsta hágildi næst í kauphöllum á Vesturlöndum.

Hvað fannst þér um þessa grein? Láttu okkur vita